Пшысэу "Бэлыдж"

Пшысэу «Бэлыдж»

( нысхъап театрэм щыгъэуцугъэу)

Мурадыр: 1.пшысэм изэк1элъык1уак1э къыдалъытэзэ, сабыйхэм къэ1отэк1э амалхэр къа1эк1эгъэхьэгъэныр;

2.творческэ гупшысак1эм ык1и къэ1отэжьыным иэмоциональнэ лъэныкъо алъыплъэгъэныр;

3.сабыйхэм ялогическэ гупшысак1э зегъэушъобгъугъэныр;

4.пшысэм къыхэфэрэ сюжетхэм хъун лъэк1ыщтымрэ къэугупшысыгъэмрэ зэхаш1ык1ыным лъыплъэныр;

5. адыгабзэм ибаигъэ зэхягъэш1эгъэныр.

Нэрылъэгъу 1эпы1эгъур: сурэтк1э тхыгъэ пшысэу «Бэлыдж», театральнэ ширмэр, нысхъапхэр – «Бэлыджэм» хэт геройхэр къэзгъэлъагъохэрэр, пшысэм ехьыл1эгъэ иллюстрациехэр.

Пшысэм икъэгъэлъэгъон.

Къэз1уатэрэр – к1элэп1ур.

Къэзгъэлъагъорэр – сабыйхэр.

Еомэ-еэмэ, зэра1омэ зэра1отэжьэу л1ыжъ ц1ык1урэ ныо ц1ык1урэ щы1агъэх. Гъатхэр къызэсым л1ыжъым бэлыджэ ыгъэт1ысхьанэу ыгу къэк1ыгъ. Хатэм хахьи ч1ыгур ыгъэушъэбыгъ, машэ ыш1и бэлыджык1э рилъхьагъ.

Охътэ ш1ук1ае теш1агъэу л1ыжъым ышхынэу бэлыджэ ыгу къэк1ыгъ. Ныом зыфигъази ри1уагъ: «А ныу, зэ бэлыджэу згъэт1ысхьэгъагъэм икъэбар зэзгъэш1эн, игъо хъугъэн фае». Ар къы1уи л1ыжъ ц1ык1ур хатэм дэхьагъ. Л1ыжъым ылъэгъугъэр гъэш1эгъоны – бэлыджэр инышхоу, ежьи нахь лъагэу, плъыжъыбзэу, хъопсагъоу къэк1ыгъ. Анахь мак1эу ч1ыгум зыщыте1этык1ыгъэ бгъумк1э къек1уал1и, тхьапэхэр зэхиубытагъэх, бэлыджыр къыкъудыигъ, ау фэгъэсысыгъэп. Ет1ани къыкъудыигъ, ящани къыкъудыигъ, сыдэу зеш1и къыфыхэчыгъэп.

Л1ыжъым ыгу къыпызыгъ, ау «зэ ныом сыкъеджэн, нэбгырит1ум ар къыхэтчын» ы1уи джагъэ. Ныор гу1эзэ, къэхъугъэр ымыш1эу къэчъагъ. Ащи бэлыджым иинагъэ ыгъэш1агъо икъугъ. «А ныу, моу зэ сыкъэубыти, мы бэлыджыр къэтэгъэкъудый», ы1уи л1ыжъым, уцугъэх, ау сыд заш1и рачышъугъэп. Ныом ыгу къэк1ыгъ пхъорэлъф пшъэшъэжъыем къеджэнэу. Пшъэшъэ ц1ык1ури къачъи, ныор ыубытыгъ, ныом л1ыжъыр ыубытыгъ, л1ыжъым бэлыджыр ыубытыгъ - къакъудыи, къукъудыи, ау къафыхэчрэп.

Пшъэшъэжъыер хьэ ц1ык1ум къеджагъ. Хьэм пшъэшъэжъыер ыубытыгъ,пшъэшъэжъыем ныор ыубытыгъ, ныом л1ыжъыр ыубытыгъ, л1ыжъым бэлыджыр ыубытыгъ - къакъудыи, къукъудыи, ау къафыхэчрэп. Хьэр чэтыум къеджагъ. Чэтыум хьэр ыубытыгъ, хьэм пшъэшъэжъыер ыубытыгъ, пшъэшъэжъыем ныор ыубытыгъ, ныом л1ыжъыр ыубытыгъ, л1ыжъым бэлыджыр ыубытыгъ - къакъудыи, къукъудыи, ау къафыхэчрэп.

Сыд аш1эщт? Унэм псэ зыпытэу исыр зэк1э бэлыджым фырикъурэп. Мыщ дэжьым чэтыум ыгу къэк1ыжьыгъ цыгъо ц1ык1у горэ джэхэшъо лъапсэм зэрэщыпсэурэр. Чэтыур цыгъо ц1ык1ум къеджагъ. Цыгъом чэтыур ыубытыгъ, чэтыум хьэр ыубытыгъ, хьэм пшъэшъэжъыер ыубытыгъ,пшъэшъэжъыем ныор ыубытыгъ, ныом л1ыжъыр ыубытыгъ, л1ыжъым бэлыджыр ыубытыгъ - къакъудыи, къукъудыи, ящэнэрэм къыхачыгъ.

Ныор мэгуш1о, пшъэшъэжъыер къашъо, хьэмрэ чэтыумрэ дэпк1ыех, цыгъо ц1ык1ум зигъэпагэу бэлыджышъхьэм тес, л1ыжъым е1о «Джары, пстэуми узэдэ1эпы1эмэ, анахь 1оф къинри псынк1эу пфызэш1охыщт».

Зыгъэхьазырыгъэр: Ш1уц1э С.А.

Мыекъуапэ - 2009