Рассказ собственного сочинения "Эрзянь бабине" на эрзянском языке.

Ёвтнема "Эрзянь бабине".  Теле. Лёса баба таго пурнась Свердловов. Бабинентень топодсть 72 иеть.Ильтицят сон а учокшны. Ансяк чокшне урьвазо чийнесь шабрань цёранень ды мартонзо кортась бабанть ускомадонть Оброшноев. Пурнынзе Лёса баба а покшт казнензэ(покштнэнень саевмекс а косто) ды сырьгась килангс. Течи урьваськак эзь кежиявтне тень лангс, тонадсь эрьва телень ававтонзо туемантень.Те-вишка,мезе Лёса баба мериль сонстензэ кенярксокс.Седе ламо мезеяк. Кизэнь перьк зняро лангсонзо лейпотмаксто тикше таргиль! Парт таркатнева а мерильть леднеме. Ды скалонть эрявсь трямс. Тикшень анокстамкась весе ульнесь сырькаенть лангсо. Урьвась тусь колхозонь стадань ваномо. Сонензэяк стака. Мирдезэ, Лёса бабань цёразо, кулось. Кадовсть вишкадо вишкат колмо эйкакшт. Урьванть теке сюпавксчизэ ульнесь-сырнень превть ды кедть ававтсо ,конась течи тусь ошов. Озась бабинесь поездэс. Вейке купэсэ мартонзо ардыть покшт ломанть. Пагононь коряс генералт, а седе аламо. Озасть столекшес ды ушодсть кортамо икелень шкатнеде.Токадизь революциянть ,теицянзо Ленинэнь. Эзь кирдеве бабась – « Мезе Ленин,покш килангонь салыця!» Генералтнэ сельместкак тетькизь, арасель истямо се шкатнева…. «Бабай, ёвтнек мезе содат»- энялдыть ды ускить стольэкшес. Кармась бабась ёвтнеме седе ,конадонть се шкава аламот содыльть ды сетнеяк чатьмонильть.Кургонь автезь кунсолыть генералтнэ эрзянь бабиненть. Мезе а ушодыть кортамо,Лёса баба седеяк соды. Ды тевесь шожда.Сырькаесь а куватьс якась тонавтнеме, лоткавтызь. Эрявсь важодемс кудоюткова:штердемс, сюлмамс. Ансяк ловномо тонадсь Лёса баба. Кизна а коли ульнесь ловномс. Тевтнеде ламо. Ды кода телесь сыль, сестэ бабинесь ловнылинзе весе нуцькатнень тонавтнемань кинигатнень.Эрямопингесь казизе покш превсэ. Ловномсто арсилизе весе ,ды явилизе ,косо виде, косо арась.Сонськак уш умок эри да ламо мезе некшнесь. Поездэсь арды,теке лавсьне нурси. Купэсэнть лембе. Ёвтнемат , ракамот……Генералтнэ таргасть коньяк, каванить бабиненть. «Бабай, ды ков ардат?»-кевкснить. -« Свердлов ошов,цёран, монь тосо лембе седеень, тейтерень эрить». –«Ды куватьс тосо кармат эрямо?» -«Знярс а паньсамизь содамотне.» Таго купэсэ ракамо……