Рассказ собственного сочинения "Сюкпря, авай!" на эрзянском языке.

Ёвтнема "Сюкпря, авай!" Тирякадо-авадо сёрмадозь ламо. Стака муемс валтнэнь, конатне арасельть ёвтазь. Ансяк, арсян, а ули берянь таго весть ледстямс аванок. Ули валмеревкс-«Зярдо ули - а кватятано, ёмавтсынек - авардтяно...» Пек видестэ мерезь! Седе покш ёмавкс а ков, зярдо кортамось моли тиринь авадо! Маряви весе масторось чами сонтемензэ. Ансяк чарькодтяно тень эйс шканзо ютазь, кода уш сон арась мартонок. Авам - те весе, мезе ули монь эйсэ парось. Сон тонавтымим вечкеме тиринь масторонть. Сонзэ кувалма мон редия весть, кодамо мазый цеця потсо паксясь. Ды седе тов свал кармить неемензэ те мазычинть. Авам – те эйкакшпингень пароёжо ды лембечи. Савиль аванень аламос ковгак лисемс, кудось сеск теевиль чаво, кельме, чопода. Ансяк сон совиль,чиилинь каршозонзо ды кармилинь ускомо лангстонзо ушонь оршамопельтнень, пелезь, илязо туе мекев. Кодамо сон монень марявиль кудонь оршамопельтнесэ малавиксэкс, лембекс, чевтекс! Авам васенцеде ветимим школав ды монь самс мелявтсь: – «Кода сон тосо?». Седе мейлеяк, кода мон касынь ды туинь тиринь кудостон, авам зярдояк эзь лотка, седеень раздезь, кевкстнеме эсь прянзо: - «Кода сон тосо?» Авам а кадылимим зярдояк. Сон стувтылизе эсь прянзо , путылизе весе виензэ монь парочинь кис. Авам тень а явови тиринь мастордон. Сынь сюлмавсть вейс. Тень кувалма ледстнемам…. Ульнесь шка монь эрямосон, зярдо кадовинь ськамон. Авам , аламоскак эзь арсе, кадызе весе сонсензэнть ды сась эрямо монень. Сонензэ марявсь, весе зыянонть сон кедьсэнзэ кавто ёнга сравтнесазо. Видеяк, кода маштыль, усксиль эйсэнь кенярксчис. Лисиль те сонзэ. Зяро сон монень ёвтнесь эрьва мезде, икеле монень а содавикстэнть ! Кодат лембеть минек ульнесть чокшнэнек! Кеняркс марто чиилинь важодема таркасто кудов.Сон ульнесь а чаво. Ансяк совилинь , сергедилинь - «Авай!» Ды весе ульнесь пек паро... Кармась само тундо. Мон рединь, таго-мезе авань марто а истя : чатьмони ды чиде чис тееви нусманякс. Кевкстнян: - « Мезе мартот, авай?» Ёвты :- « Сэредян.» - « Мезеть сэреди?», - таго кевкстьса. -«А содан мезем, ансяк сэредян.» Истя ютасть кавто таргот . Весть авам мери: - « Потсо валом ёвтаса… Монсень велев покш мелем туемс ансяк тон пек жаль маряват тень. Кежеть иляст са. Тонь кедьсэ паро эрямось. Ансяк тосо монь тиринь чачома таркам. Тосо мон эринь 80 иеть ды весемесь маряви тень монсень. Чистэ онстон несынь лейпрятнень, паксятнень, монсень кудом. Нармунтнеяк ват, ки соды косто ливтить тиринь масторозост…» Сельведень турсо тусть чудеме, неть валтнэнь марязь. Авам монь кис оно зяро шка кирди прянзо а эсь олясонзо. Ней, эрязь седе тов, арсян, косто саевсь монь эйс те вечкемась весе эрзянь улемантень. Ансяк авань эйстэ. Сон эзь рузыя, кода лиятне. Пек вечкилизе весе эрзянсенть. Ледстнян, кода валдомиль ды мазылгадыль чамазо, зярдо кунсолыль эрзянь моро….Пек вечкилинь мон неть нурькинеть шкатнень. Марявиль, весементь максовлия, ансяк авам кадоволь истямо чамасо….. Зяро ней, авай, кевкстневлинь кедьстэть эрзянь эрямочиденть ! Зяро тон тень ёвтневлить! Ансяк шканзо а велявтсак. Сюкпря, авай, валдо ойменть кис, конась, маряви, нейгак а кады монь эйсэ.