Разработка урока-викторины "Джумлелер колейдоскопы".

Оджа: Асанова Зоре Халиловна.

Башлангъыч сыныфлар оджасы. МБУМ "Эшреф Шемьи-заде адлы 42-нджи ОУМ".

Къырымтатар тили 3 сыныф. Мевзу: Джумлелер колейдоскопы. Дерс-викторина.

Дерснинъ макъсады: Кечкен мевзу боюнджа талебелернинъ бильгилерини умумийлештирмек, текрарламакъ. Джумле акъкъында дерс-викторинаны кечирюв. Джумле мевзусынен багълы малюматларыны пекитмек. Талебелернинъ агъзавий ве язма нутукъларыны зенгинлештирмек, инкишаф этмек. Талебелерни незакетли, медениетли олмагъа алыштырмакъ.

Регулятив УОА

• озь иш ерини тешкиль этмек,

• дерснинъ макъсадыны анъламакъ, къоюлгъан вазифелерни чезмек ичюн ёлларыны тапмагъа бильмек.

Огренюв УОА

• оджанынъ суаллерине джевап бермек;

• керек малюматны тапмагъа бильмек;

• язы элементлерини берильген нюмюне боюнджа текрарламагъа;

Коммуникатив УОА

• Дерсте, аятта олгъан диалогларда фааль иштирак этмек,

• – къырымтатар тилини динълемеге ве анъламагъа бильмек;

• – къырымтатар тилинде окъумагъа ве язмагъа бильмек

Коргезме: карточкалар, джедвеллер, оюнлар, йылдызчыкълар, ресимлер, смайликлернинъ ресими, джумлелер.

Дерс кетишаты:

I.Тешкилий къысым.

Селямлашув!

Сыныфны дерске азырлыгъыны тешкерюв.

-Балалар дерске азырсынъызмы?

-Къана корсетинъиз насыл кейфиетнен бугунь дерске кельдинъиз? (талабелер смайликлерини корсетелер)

II. Дерс кектишаты:

-Балалар, бугунь дерсимиз оюннен кечеджек ве эр оюннынъ къаиделери ола, бизим дерсимизнинъ къаиделери де оладжакъ.

Къаиделер:

1. Сыныфымыз эки командагъа болюнеджек.

2.Эр команданынъ капитаны оладжакъ.

3.Эр команданынъ ады оладжакъ, команданынъ адыны капитанлар сайладжакълар.

4. Оджа суаль берген сонъ капитан къолунда олгъан команданынъ ишаретини котереджек, тек сонъ джевап команданынъ азасы береджек.

5.Эгер команда азалары капитан ишатетини котермезден эвель джевап берсе, джевап сайылмаз, экинджи команда джевап бере.

6.Эр догъру айтылгъан джевапкъа йылдыз бериледжек, кимде чокъ йылдызлар олса о команда енъе.

7.Биринджи ерини къазангъан команда 5 бааны аладжакъ.

-Къаиделерини эписи анълады?

-Пек яхшы, командалар капитанны такъдим этинъиз.(Эр команда капинларыны сайлайлар, ве команданынъ адыны капитанлар сайлап алалар).

-Демек командаларнынъ адлары "Кунешчиклер", "Чечеклер".

-Мен сизлерге мувафакъиетлер тилейим. Башладыкъ.

1вазифе "Викторинанынъ мевзусы".

-Бу вазифеде бугуньки мевзумызны бельгиледжекмиз, тахтада сакъланылгъан мевзу, мен сизлерге суаль берем, эр догъру джевап берген суалинъизге арифлер ачыладжакъ, амма унутманъыз команданынъ ишаретини котермеге, эгер еринъизден джевапны къычырсанъыз сайылмаз экинджи командагъа сёз бериледжек.

Тахтада къапалы сёз асылгъан, оджа суаллер окъуй, командалар, джевап берип арифлер ачыла.

Суаллер:

1) Там бир фикир ифаделеген сёз я да сёзлер группасына не дейлер.(Джумле)

2) Джумлелер неден тизилир.(Сёзлерден)

3) Джумледе биринджи сёз насыл язылыр?(Буюк арифнен)

4)Джумленинъ сонъунда не къоюлыр?(Нокъта, суаль, нида ишарети)

5)Джумлелер макъсадына коре насыл чешит олалар?(Икяе, суаль, эмир джумлелери)

-Машалла, демек бугуньки викторинамыз "Джумле" мевзусынен багълы оладжакъ.

2 вазифе "Сёзлер"

Тахтада сёз язылгъан, эр бир команда япракъларда бу сёзнинъ арифлеринен янъы сёзлер уйдура, тек бу сёзде олгъан арифлернен уйдурмакъ зияде ариф къошмакъ мумкюн олмаз, анълашылды?

Бу вазифеге бир дакъкъа бериле тек сонъ джевапларынъызны сырынен айтаджакъсынъыз, ким чокъ айтса о енъе.

Ильхамландырмакъ.

3вазифе:

Эр командагъа сёзлер бериле, бу сёзлерни догъру тертипте тизсенъиз джумле олур. Джумлени тизген сонъ насыл джумле олгъаныны айтмакъ керек, ким биринджи тизсе ишаретлерини котерелер.

Джумлелер:

Балачыкълар, бозманъыз къуш юваларын.

Метинге серлева къоймакъ мумкюнми?

4 вазифе:

-Джумленинъ насыл баш азаларыны билесинъиз?

-Тахтада джумлелер язылгъан, бир талебе эр командадан чыкъып джумлелерде баш азаларыны тапып бельгелемек керек оладжакъ. Сайланъыз ким чыкъаджакъ, ярдым этмеге олмай, эгер еринъизден айтсанъыз вазифе сайылмаз.

1 команданынъ джумлелери:

Асан китапханеден меракълы китап алды.

Эльдар ве Лейля оюн тёгерегине къатнайлар.

2 команданынъ джумлелери:

Чанъ къакъылды балалар сыныфкъа кирдилер.

Кучьлю ягъмур ягъды.

Джумлелерни тешкерелер.

Раатлыкъ дакъкъасы:

-Балалар, келинъиз сизлернен "Догъру я да янълыш" оюнны ойнайыкъ, ерлеринъизден турынъыз, эгер мен окъугъан джумлелернен разы олсанъыз башларынъызны саллайсынъыз, къолларынъызнен алгъышлайсынъыз, эгер разы олмасанъыз, башынъызнен ёкъ деп, къолларынъызнен де ишарет ёкъ деп корсетесинъиз. Азарсынъыз?

" Догъру я да янълыш "

1. Раледе оджалар отура?

2.Къар беяз ола?

3. Метин джумлелерден тизиле?

4.Бугунь дерсте исим мевзусынен таныш олдыкъ?

5.Джумлелер арифлерден тизиле?

6.Муптеда КИМ? НЕ? суаллерине джевап бере?

7.Тавукълар миявлай?

8.Сыгъыр балаларгъа сют бере?

9.Сиз яхшы окъугъан талебелерсиз?

5 вазифе "Капитанлар ярышы"

-Балалар сыныфкъа кирмезден эвель, мен джумлелерни сакъландым, бу джумлелер кягъытчыкъ устюнде язылгъан, капитанларнынъ вазифеси джумлелерни тапмакъ ве макъсадына коре насыл олгъаныны айтмакъ.

Чокъ джумлелер тапкъан капитан йылдызчыкъ къазана.

III. Дерсни нетиджелев.

-Викторинамыз сонъуна кельди. Къана балалар, айтынъыз бугуньки дерсимиз насыл мевзунен багълы эди?

-Догъру, Джумле мевзусынен багълы эди. Келинъиз энди эр капитанлар къазангъан йылдызчыкъларны саялар, кимде чокъ олса о команда енъди ве эписи команда къадимлери 5 баа алалар. Мен сизлерни хайырлайым!

IV.Рефлексия.

-Балалар, дерсимизнинъ сонъунда пейда олгъан дуйгъуларынъызны ифаделенъиз. Смайликлернинъ ресимлерини костеринъиз.

-Бугунь сизлер пек яхшы чалыштынъыз. Мен сизлерге бахшыш азырладым, бу татлылыкълар.