Шабинарай туршалганууд

5-дахи класста үнгэргэгдэхэ хэшээлһээ гадуур хүдэлмэри

Сэдэб: Шираб Нимбуевай “Тархайн хүбүүн Зархай” гэһэн литературна онтохоноор буктрейлер зохёон байгуулга

Гаршаг

1. Оролто

а) Проектын үзэхэ зүйл б) Проектын үзэхэ юумэн

в) Проектын зорилго

г) Шиидхэхэ асуудалнууд

д) Шэнжэлэлгын арга боломжонууд

е) Шиидхэгдээгүй асуудал – Проблемэ

ё) Гипотезо

1. Гол хуби

2.1. Асуулга үнгэргэлгэ (анкетэ)

а) Һурагшадай уншалгын һонирхолыень шэнжэлэн үзэлгэ.

б) Буктрейлер – зохёол уншалгада һонирхол түрүүлхэ шэнэ арга.

в) Буктрейлернүүдэй бии болоһон тухай тобшо мэдээн.

2.2. Буктрейлер зохёон байгуулгын шатанууд:

1. Буктрейлерэй сэдэб. 2. Буктрейлерэй жанр болон стиль. 3. Буктрейлерэй түсэб байгуулга. 4. Буктрейлерые бүридхэн бүтээлгэ (монтаж).

3. Проектын дүн

1. Буктрейлер олондо харуулалга.

2. Һургуулиинга номой сан ошолго. 4. Тобшолол 5. Практическа удха шанар

Оролто

Уншалгын хүсөөр хүүгэд дэлхэйе шэртэн, өөрыгөө мэдэржэ һурана.

В.А. Сухомлинский

Дуратай номоо гартаа баряад, хуудаһануудыень иража, уншалгын шэдитэ орон руу шэнгэжэ байхада хэды һайхан гээшэб даа. Зохёол соохи геройнуудай юртэмсэ руу орожо, тэдэнэйнгээ түлөө һанаагаа зобожо, сэдьхэлээ хүдэлгэн, шэнэ юумэ нээжэ, үйлэ хэрэгүүдэйнь хүгжэлтыень һонирхон байхаш. Харин түгэсхэлдэнь хүрэхэдөө, зохёолтоёо хахасахаяа һанахагүйш. Би, ерээдүйн багша, һурагшадаа номдо дуратайгаар хүмүүжүүлхэ гэжэ зорилго урдаа табихаб. Эгээл эндэһээ буктрейлер гэһэн проект зохёон байгуулха бодол намда ерээ юм.

Мүнөө сагта Интернет, телевидени гэхэ мэтэшэлэн хүүгэдэй һонирхолыень бүрин татажа, уншалгын һонирхол буураад байна гэжэ мэдээжэ. Энэ хадаа проектын гол шиидхэгдээгүй асуудалынь болоно.

Проектын шэнжэлхэ зүйл – буктрейлер, үзэхэ юумэн – буктрейлер зохёон байгуулха.

Зорилго: буктрейлертэй танилсуулжа, һурагшадые буктрейлер бүтээжэ һургаха болоно.

Зорилго бэелүүлгын тула иимэ шиидхэхэ асуудалнууд гараба:

• һурагшад хэр зэргэ уншаха дуратай гээшэб гэжэ асуулга үнгэргэхэ;

• буктрейлер яажа бүтээхэб гэжэ номуудые, Интернедэй материалнуудые һурагшад үзэхэ, шэлэжэ абаха;

• буктрейлер гэжэ арга мүнөө сагта хэр хэрэгтэй байхаб гэжэ элирүүлхэ;

• сценари зохёожо, шэлэжэ абаһан зохёолоор буктрейлер һурагшад бэлдэхэ;

• суг һурадаг нүхэдтөө, ондоо һурагшадта ролик харуулха;

• ажалайнгаа дүн гаргаха.

Тус сэдэбээр проект бэлдэхэдээ, иимэ арга методүүд хэрэглэгдээ:
шэнжэлэлгын, мэдээсэл суглуулалгын, суглуулһан материалнуудай анализ, бэдэрэлгын г.м.

Гипотезо: Минии һанахада, буктрейлер зохёон байгуулхада, уран зохёол уншалгада һурагшадай һонирхолынь дээшэлүүлэгдэхэ.

2. Гол хуби

2.1. Асуулга үнгэргэлгэ

Нэн түрүүн асуудалнуудые бэлдээб. “Уншаха дуратай гүт?” гэжэ нэрэтэй анкетэ зохёогооб. Анкетын асуудалнуудта үнэн сэхээр харюусахыень уряалан үнгэргөөб.

Асуудалнууд:

1. Ном уншаха, али мультфильм хараха дуратай гүш?

2. Һүүлэй үедэ һургуулиин программаһаа гадуур ямар зохёолнуудые уншаабши?

3. Ямар зохёол тухай олондо хөөрэхөө һананабши?

4. Гэртэшни номууд олон гү?

5. Онтохонуудые уншаха дуратай гүш?

1. Буктрейлер – зохёол уншалгада һонирхол түрүүлхэ шэнэ арга.

Һурагшадтаяа Интернет сооһоо буктрейлер тухай һонирхолтой мэдээсэл олохо.

Жэшээнь: сэхэ оршуулхада, бук – ном, трейлер – зар рекламын богонихон зураглал.

Буктрейлер хадаа номой гү, али зохёолой эгээл һонирхолтой, танихада бэлэн үе, ушар, үйлэнүүдые оруулдаг юм. Тэрэнэй гол зорилго – уншагшые һонирхуулха.

Буктрейлерэй туһаар олон хүндэ зохёохы бүхы шадалаа гаргажа, дуратай ном тухайгаа соносхохо, танилсуулха арга болоно гэхэ мэтэшэлэн һурагшадта ойлгуулха.

Буктрейлерэй түүхэ 2002 ондо эхилээ юм. Америкын Луизиана штадта үнгэрһэн номуудай үзэсхэлэн дээрэ анха түрүүшынхиеэ 2003 ондо харуулагдаа. Гэбэшье 2005 онһоо олондо мэдээжэ боложо, үргэнөөр хэрэглэгдэжэ эхилһэн байна. Мүнөө сагта манай Россида һурагшадай дунда нилээд алдартай болоо юм. Олон һурагшад өөһэдынгөө буктрейлернүүдые зохёожо туршаһан гэжэ тэмдэглэхэ.

.

1. Буктрейлер зохёон байгуулхын шатанууд:

1-дэхи шата. Эхилээд буктрейлерэй нэрэ һанаха. Энэ арга хэрэглэжэ, дуратай, һайшаагдаһан уран зохёолшон тухайгаа хөөрэжэ арга бии болоно. Анкетэ үнгэргэһэнэй удаа, асуулгаар анализ хэжэ, ехэнхидээ һурагшад программаар үгтэһэн зохёолнуудые уншаһан байгаа гэжэ ойлгоходоо, һаяшаг һонирхожо үзэһэн Шираб Нимбуевич Нимбуевай “Тархайн хүбүүн Зархай” гэһэн литературна онтохо шэлэжэ абаабди. Мэдээжэ зохёолоороо шэнэ юумэндэ һурахадань, бэлэншье байха гэжэ һанагдаа.

2-дохи шата. Зохёон байгуулагдаха видеоролигой жанр болон стиль тухай бодомжолхо.

• Слайд-шоу;

• Зохёолой удхаар интерактивна зурагууд;

• Нааданай түхэлтэй видеоролик;

• Анимационно зураглал г.м.

Эсэстэнь хүгжэмтэ слайд-шоу шэлэжэ абаабди.

3-дахи шата. Түсэб, сценари бэшэхэ.

• Хэшээлдээ онтохоной бүлэгүүдээр бэшэһэн түсэбүүдые хэрэглэхэ;

• Хэшээлдээ хэрэглэһэн уран зурааша Ирина ба Ольга Ертахановануудай иллюстрацинуудые шэлэжэ абаха;

• Һурагшадые 3 зохёохы бүлэг болгожо хубааха: сценаристнууд, режиссернууд, операторнууд.

• Хүгжэм шэлэхэ.

• Буктрейлер бүтээн суглуулха.

Ажалай дүн.

Буктрейлер олондо харуулха (эхин ангиин һурагшад, жэшээнь).

Һургуулиингаа номой сан ошожо, бүтээлтэеэ танилсуулха. Ябууд шэнэ номуудые анхарха, шэлэхэ.

Тобшолол: Гипотезо (багсаагдаһан бодолни) баталагдаба.

Юрэнхыдөө шухала дүнгүүдые гаргабаб. Буктрейлернүүдые зохёон байгуулха гээшэ һурагшадай һонирхол, илангаяа уншалгын һонирхол дээшэлүүлгэдэ нилээд хэрэгтэй арга болоно. Интернет сооһоо юушье олохоор юм ааб даа. Мүнөө үеын хүүгэд толгой соогоо олон юумэ багтаахаяа оролдодоггүй гэжэ һанахаар. Бэлэн юумэ Интернет сооһоо олоод байхада, ехэ ажал бэшэ. Гэбэшье хүүгэдтэ номой санда ямар олон һонирхолтой номууд байна гээшэб, тэдэниие уншажа, ямаршье зохёолдо шэнэ ами оруулха аргатайт гэжэ урмашуулхада, үхибүүд баярлажа, уншахаяа оролдохо гэжэ һанагдана.

Практическа удха шанар: Буктрейлернүүдые уншалгын, хэлэлгэ хүгжөөлгын хэшээлнүүдтэ, классһаа гадуур хэмжээ ябуулгануудта үргэнөөр хэрэглэжэ болохо.