Сочинение Лъэпкъ ш1эжь маф

Зэо блэк1ыгъэм и1угъу, истаф,

Гур зыгъэузырэр шъыгъо ш1эжь маф.

Ш1эжь л1ыхъужъхэу зыпсэ зытыгъэхэр,

Зыщымгъэгъупшэх л1акъоу к1одыгъэхэр!

Угу къэгъэк1ыжь хым хэк1одагъэхэр,

Нэк1убгъо хьылъэу тхыдэм хэхьагъэхэр.

Ныхэм янэпсэу ч1ыгум тепхъагъэхэр ,

Тыхэм абгъэгухэу дзэм пэш1уек1уагъэхэр...

Шъыгъо, адыгэр, ахэм апае,

А мафэм ахэр шъхьэфитэу гъае.

Ау гъыбзэ закъом зызэпемыгъэщ-

Лъэпкъым ил1ыгъэ л1эш1эгъум хэщ.

Сихъу Султ1ан.

Дунаим ц1ыф лъэпкъ зэфэшъхьафыбэ щэпсэу. Лъэпкъ пэпчъ ежь игъогу тетэу мак1о. Ащ фэдэкъабзэу тилъэпкъы итарихъ гъогу илъэс мин пчъагъэ хъугъэу къек1у. Ош1э- дэмыш1э къэгъэзэгъухэми, къин тлъэгъузэ тыздэк1оегъэ къушъхьэ лъагэхэми а гъогум тапхырищыгъ. Сыд фэдиз икъиныгъэми , ар зэпытчызэ непэрэ мафэм тыкъэсыгъ, «неущ ишымыгъасэ» тызэрешэсын фаери тш1эзэ тэпсэу...

Титарихъ гопчын умылъэк1ыщт къэгъэзэгъу, тищы1эныгъэ охып1э куум изыдзэгъэгъэ хъугъэ-ш1агъ Урыс —Кавказ заор. 1864- рэ илъэсым ар ухыгъэ хъуи , илъэсишъэрэ шъэныкъорэ т1урэм къык1оц1 къушъхьэ гъогу къиным тытетым фэдэу, тыдэк1уаезэ 2016- рэ илъэсым тыкъынэсыгъ.

Лъэпкъгъэк1од заоу пачъыхьагъум адыгэхэм къариш1ыл1агъэм фэдэ Урысыем итарихъи къыхэфагъэп. Кавказ заом икъежьап1э щыублагъэу ик1эух нэс техэк1о нэшанэ и1агъ. Ц1ыфук1ыным имызакъоу , лъэпкъгъэк1одыныр , ч1ыгубгынэныр ащ ылъапсэ илъыгъэх.

Адыгэ лъэпкъым щымыгъупшэжьын шъобж ащ къырихыгъ. Минишъэ пчъагъэ хэк1одагъ , лъэпкъ культурэм , хабзэм ч1энэгъэшхо фэхъугъ , лъэпкъым ихахъо инэу зэтыри1эжагъ.

Пачъыхьэм ц1ыфыгъэнчъагъэу зэрихьагъэм хэти ынэпс къыригъэхын фэдэу къысщэхъу. Ежь пачъыхьэм идзэк1ол1хэми а ц1ыфыгъэнчъагъэр афэщэчыщтыгъэп. Къинэу адыгэхэм ащэчыгъэм шъхьацышъор ымыгъэтэджын ылъэк1ырэп. Чъы1эр , гъаблэр , узыр — тыдэ к1уагъэми ауж ик1ыщтыгъэхэп.

Заом ыуж егъэзыгъэ кощыным икъиныгъохэу адыгэхэм ащэчыгъэр тарихъым инэк1убгъо хьылъэу хэхьагъ. Ц1ыфэу хы 1ушъом щызэрэугъоирэм япчъагъэ мафэ къэс хахъощтыгъ. А зэпстэур техак1ом алъэгъущтыгъ , ау агухэр ушъэбыщтыгъэп , нахь псынк1эу ч1ыгур , « зэрагъэкъэбзэным» пылъыгъэх. А зэманым адыгэхэм ятхьамык1агъо хэбаик1ыгъэхэр урыс ык1и тырку щэфак1охэмрэ къухьэ1ыгъхэмрэ.

Непэрэ мафэхэм хэхэс адыгэхэм япчъагъэ миллионитфым к1эхьэ. Тыркуем , Шамым, Иорданием, Мысырым, Ливием , Югославием, Израиль, Германием , Австралием, Судан, Канадэм - пстэумк1и къэралыгъо 40- м ехъум арысых. Джаущтэу Кавказ заом ыпкъ къик1ык1э зэрэдунаеу адыгэхэр щитэкъухьагъэ хъугъэх. Ар хэти непэ ыш1эн фае — адыгэхэми ,адыгэхэм яч1ыгу щыпсэухэрэми! Ары зэгуры1оныгъэмрэ ныбджэгъуныгъэмрэ алъапсэр.

Сыд фэдэрэ зауи тхьамык1агъо къыздехьы. Заом имэш1олыгъэ хэти нэмысыным пае , зэгуры1оныгъэ ти1эу тыпсэуным тыфэбэнэн фае.Ц1ыф лъэпкъ зэфэшъхьафэу дунаим щыпсэурэм мамырныгъэр агъэлъап1эу псэунхэу сафэлъа1о.