Статья к 105-летию А.П.Кешокова

«-Сэ фыкъысхуейуэ сывмыгъуэтмэ

Дунейр сбгынауэ фимыгугъэ

ЗылI къимыгъащIэ сэ згъэщIами,

Сыт щыгъуи гъащIэр си щIэщыгъуэщ»



Лъэпкъ тхыдэм зи цIэр дыщэпск1э иратха, Урысей Федерацэм и къэрал саугъэтым и лауреат, социалист лэжьыгъэм и лIыхъужь, усакIуэ, тхакIуэ гъуэзэджэ КIыщокъуэ Алим Пщымахуэ и къуэ.

«CыкIуэнт нэхъ псынщIэу»:

СыкIуэнт нэхъ псынщIэу схузэфIэкIым-

Мычэму си шыр согъэлъэхъу.

Ныбжьэгъу, уэ фIыкIэ уигу сыкъэкIым,

Си гъуэгу кIыхь хъуну къызэхъуэхъу.

Сэ куэдрэ, куэдрэ сигу къолъадэ

Шы жэр сытесу къэскIухьын,

Ди хэку губгъэушхуэм сынилъадэу

Зэдэжэм пыIэр яфIэсхьын.

Хэт ейми содэ сэ а пыIэр,

Ухуейми, си щхьэм хуремыхъу,

КIуэфынкъым жыжьэ зи гур щIыIэр –

Шум лъэсыр гъуэгум щыдэмыхъу.

Насып мыухыр зи гуращэр

Махуэл и гъуэгум щыхуэмей,

Псэуну гъащIэр зыхуэфащэр

МыувыIэу кIуэхэр аркъудейщ.

Псы уэру лъагъуэ пхызыхынум,

Къарур жэхункIэ имыух.

Си гъащIэ ябгэр щызухынум,

Шы жэр сытесу сыреух.

КIыщокъуэр 1914 гъэм июлым и 22-м Щхьэлыкъуэ къуажэм къыщалъхуащ. Алим и адэ Пщымахуэ и зэманым елъытауэ щIэныгъэфI зиIэ лIыт. Абы егъэджэн Iуэхум фIыуэ хищIыкIырт, тхыдэм, есэпым, хабзэ-бзыпхъэм хъарзынэу щыгъуазэт, диным хуеджат, хьэрыпыбзэкIи урысыбзэкIи псалъэрт икIи тхэрт.

1926 гъэм Алим Бахъсэн дэт школ-интернатым щеджэну ягъакIуэ. Абы щыгъуэ егъэджакIуэ къыщыхуохъур Къэбэрдей псор зэрыгушхуэ усакIуэ телъыджэ ЩоджэнцIыкIу Алийрэ абы и ныбжьэгъуфI ЛIыгъур Ибрэхьимрэ. 1931 гъэм щегъэжьауэ, Алим щоджэ Владикавказ дэт пед-институтым, щIэныгъэ нэхъыщхьэ игъуэтауэ 1935 гъэм къокIуэжри адыгэбзэрэ урысыбзэрэ иригъаджэу Налшык щолажьэ. иужькIэ ар Москва макIуэ, аспирантурэм щеджэну.

1938 гъэм КIыщокъуэ Алим Налшык дэт щIэныгъэ-къэхутакIуэ институтым и директору ягъэув. 1939 гъэм абы къыIуашри дзэм къулыкъу щищIэну яшэ.

1941 гъэм КIыщокъуэ и япэ усэ тхылъыр къыдокI, ауэ, Хэку зауэшхуэр къохъейри, а тхылъым щыгуфIыкIын хунэмысауэ усакIуэр фронтым Iуохьэ.

Япэ махуэхэм къыщыщIэдзауэ зауэр иухыху КIыщокъуэр псэемыблэжу зэуапIэм Iутащ. Ар япэ щIыкIэ щытащ ротэм и командиру, итIанэ 115-нэ шу дивизэм – НацдивизиекIэ зэджэу щытам – хагъэхьэ. Нэхъ иужькIэ, СССР-м и ТхакIуэхэм я союзым зэрыхэтыр къалъытэри, ар фронтым Iутхэм папщIэ къыдэкI «Сын Отечества» газетым къулыкъу щищIэну ягъакIуэ. Хэку зауэшхуэм Алим къикIыжащ майору, зэрихьэ лIыгъэм къыпэкIуа орден, медаль зыбжанэ и бгъэм хэлъу. Ар мыбы балъкъэр усакIуэ Къайсын Кулиевым щыхуозэри а тIур, «зым Iэпыхур адрейм къищтэжу» жыхуиIэм хуэдэу, газетым щолажьэ. Мыбде сыкъэувы1уу К1ыщокъуэ Алимрэ Кайсын Кулиевымрэ сытепсэлъьэхьыну сыхуейт.

Къайсын Кулиевыр – балъкъэр усак1уэшхуэ, журналист, военно кориспондент, ц1ыхубэ усак1уэ. Къэрал саугъэтхэм я лауреат, общественнэ лэжьак1уэшхуэ.



Къайсын Кулиевым орден, медаль, куэд къыхуагъэфэщауэ щтащ: Октябрь революцэм и орденыр, Ленин и орденыр, Хэку Зауэшхуэ орден I, II степенхэр, М. Горькэм и ц1эк1э щы1э Къэрал саугъэт, Орден Трудового Красного знамени, КъБР-м и ц1ыхубэ усак1уэ ц1э лъап1э.

«КIыщокъуэр гъащIэм щIэщыгъуэу хэлъыр гурыхьу, купщIафIэу, нэгъэсауэ зи тхыгъэхэм къыщызыгъэлъэгъуа тхакIуэщ.КIыщокъуэ Алим и фIыгъэкIэ лъэпкъ куэдым зыхащIащ къэбэрдей цIыхубэм я псэм и IэфIагъыр, лъэпкъым хэлъ гуапагъэр, цIыхугъэр, лIыгъэр», – итхыгъащ балъкъэр усакIуэшхуэ, КIыщокъуэ Алим и ныбжэгъу пэж Кулиев Къайсын.

КIыщокъуэ Алимрэ Кулиев Къайсынрэ Шэджэм куейм къыщалъхуат, икIи псэуху а тIур зэныбжьэгъуащ. Лъэпкъ зэныбжьэгъугъэр ягъэлапIэу, хэкум хуаIэ лъагъуныгъэри Хэку зауэшхуэм и зэманым а тIум къагъэлъэгъуащ. Iэщэри, къалэмри зэгъусэу ягъабзэу я хэкур яхъумэжащ, дэтхэнэ цIыхуми щапхъэ яхуохъуу. А тIур ебгъапщэ хъунут Iуащхьэмахуэ и щыгуитIым.



« Зы лэгъупыкъум и кIапитIыр

Дэ тIум тIэщIэлъу дыкъэхъуащ.

Ди Шэджэпсым и IуфитIыр

Адэ унапIэ дэ тхуэхъуат.»

Хэку зауэшхуэм теухуауэ а лъэхъэнэм КIыщокъуэ Алим и Iэдакъэм къыщIэкIа усэ нэхъыфIхэм ящыщщ «Си фочым IэплIэ есшэкIауэ», «Сэлэт шырыкъу», «Майм и 9-м 1945 гъэм», «Сэлэт сэлам», «ЗэкъуэшитI» нэгъуэщI

ЗауэлI IэнатIэр къиухыу и унэ къигъэзэжа нэужьи, ар и псэм хэлъ литературэм и гур утIыпщауэ хуэлэжьэну хущIыхьэркъым: республикэр хуэныкъуэт зауэм зэтрикъутахэр къэзыIэтыжын цIыху щыпкъэхэм. А лъэхъэнэм КIыщокъуэр ягъэув ди республикэм щIэныгъэ IуэхухэмкIэ и наркому (министру). Илъэс зытIущ докIри ар къулыкъукIэ драгъэкIуэтей – партым и Къэбэрдей обкомым идеологиемкIэ и секретару хах. Апхуэдэ лэжьыгъэшхуэм зыкъыдэбгъахуэу утхэну, дауи, тынштэкъым. ИтIани абы усэщIэхэр етх, тхылъи къыдегъэкI, зэрыхулъэкIкIэ къэрал-парт къулыкъумрэ зэдехь. 1950 гъэм Алим Москва макIуэ аспирантурэм щеджэну икIи а зэманым и Iэзагъымрэ щIэныгъэмрэ емызэшыжу хегъахъуэ, тхыдэм, бзэм, эстетикэм теухуауэ куэд зрегъащIэ, тхэнми нэхъ зретыж.

1953 гъэм КIыщокъуэр республикэм къашэжри, Министрхэм я Советым и тхьэмадэ къуэдзэ ящI.

Шэч хэмылъу, зыIута IэнатIэшхуэхэм я фIыгъэкIэ, тхакIуэм гъащIэм нэхъыбэ хищIыкIи хъуащ, ар цIыху куэдми яIущIащ, абы куэди къилъэгъуащ. Ауэ литературэм зыкIи емыхьэлIа лэжьыгъэ хьэлъэм къаруушхуэ тригъэкIуадэрти, ар зэран хуэмыхъуу къанэртэкъым.

Алим тхэну Iэмал нэхъ щигъуэтар 1959 гъэм Къэбэрдей-Балъкъэр ТхакIуэхэм я союзым и тхьэмадэу хаха нэужьщ. Пэжщ, а зэманым ирихьэлIэу КIыщокъуэм усэ тхылъ зыбжанэ къыдигъэкIат, «Хъуэпсэгъуэ нур» романри и кIэм нигъэблэгъат. Апхуэдэу щытми, парт-къэрал къулыкъухэм къыпэрыкIа иужькIэщ адыгэ усакIуэшхуэм и талантым нэхъ зригъэшэщIыну къыщехъулIар.

КIыщокъуэр СССР-м, РСФСР-м я тхакIуэхэм я союзхэм и секретару хах икIи Москва щыпсэуну Iэпхъуэн хуей мэхъу.

1971 гъэм Алим ягъэув СССР-м и литературнэ фондым и тхьэмадэу. Абы и къулыкъу иныр зэрехьэ къэралышхуэр зэтезыгъэщэхэжа перестройкэм щIидзэху.

КIыщокъуэ Алим къыхуагъэфэщауэ щытащ «ЕтIощIанэ лIэщIыгъуэ блэкIам и тхакIуэ щэджащэ» цIэр. Орденрэ медалу куэд къыхуагъэфэщащ:

Вагъуэ Плъыжь орденыр, Хэку Зауэшхуэ орден I, II cтепенхэр, Октябрь революцэм и орденыр, Ленин орденыр, М. Горькэм и цIэкIэ щыIэ Къэрал саугъэт, КъыфIащащ КъБР-м и цIыхубэ усакIуэ цIэ лъапIэ.

К1ыщокъуэм и тхыгъэхэр зэхуэхьэсауэ томих хъууэ къыдэк1ащ.

Абыхэм я щыщ «Хъуэпсэгъуэ Нур», «Эмирым и сэшхуэ», «Кхъужьыф1э», «Щынэ хужьыкъуэ».

УсакIуэшхуэм, тхакIуэшхуэхэм куэдрэ къахуихуэркъым я дуней гъащIэр кIыхьу къыщIэкIыну. Ар къэбэрдей литературэм и тхыдэми щынэрылъагъущ. Лъэпкъым и дежкIэ фIыгъуэшхуэу жыпIэ хъунущ КIыщокъуэ Алим и гъащIэр зэрыкIыхьар.

ЖытIа псор зэхэтлъхьэжмэ, нэрылъагъущ къэбэрдей литературэм къызэпича гъуэгуанэм и нъхъыбэр къыгуэпх мыхъуну КIыщокъуэ Алим и творчествэм зэрыпыщIар. Ар лъэпкъ тхыбзэм и гъуазджэм Iуащхьэмахуэ хуэдэу къыхолъагэкI – нэхъыжьхэм я дежкIэ гъуазэу, зи къалэмыр узэщIа хъуарэ адыгэ литературэр езыгъэфIэкIуэну тегушхуэхэм я дежкIэ тегъэщIапIэ щыпкъэу. ИкIи шэч хэлъкъым КIыщокъуэм и творчествэр иджырей поэзиеми прозэми я зы лъэхъэнэ уардэу тхыдэм къызэрыхэнам.

И псэр пытыху, зэрыжаIэу, Алим и гур творчествэм етауэ щытащ. Иужь илъэсхэм абы и Iэдакъэ къыщIэкIащ усэу, прозэу тхыгъэ купщIафIэ тхылъ зыбжанэ. И ныбжьыр илъэс 87-м иту 2001 гъэм январь мазэм и 29-м Алим дунейм ехыжащ.

Шэджэм къалэ дэтщ К1ыщокъуэ Алимрэ Кайсын Кулиевымрэ я фэеплъ сын. Налшык къалэм администрацэм и унэм и гупэм деж щытщ КIыщокъуэм и фэеплъ сыныр а уэрамыми Алим и цIэр зэрехьэ. КIыщокъуэ Алим щеджа еджапIэми и цIэр зэрехьэ.

Налшык къалэм и уэрам нэхъ дахэ дыдэхэм ящыщ зым Кулиев Къайсын и цIэр зэрехьэ, а уэрам дыдэми и фэеплъ сыныри тетщ.

Кулиев Къайсын щыпсэуа унэри музей ящIыжащ.

КIыщокъуэ Алим къигъэна и уэсятым ипкъ иткIэ, ар Москва кърашыжри и къуажэкхъэм, и адэ-анэр, и къуэшыр зыщIэлъым, щыщIалъхьэжащ.

КIыщокъуэ Алим хужаIахэм щыщ пычыгъуэхэр

КъызыхэкIа лъэпкъым и гъащIэм нэхъ Iуэхугъуэшхуэу, гукъинэжу къыщыхъуахэр, езыр зыхэта къэхъукъащIэ телъыджэхэр абы и усэ пшыналъэхэм фIэщхъуныгъэ хэлъу къыщыгъэлъэгъуащ.

Тихонов Николай

КIыщокъуэр нэгъуэщIхэм яхыумыгъэгъуэщэн усакIуэ телъыджэщ. Абы и творчествэм и фIыпIэ нэхъыщхьэу къэплъытэ хъунущ гупсысэ жан, акъыл куу зэрыхэлъыр, и темэр IупщIу зэрыубзыухуар…

КIыщокъуэ Алим усакIуэщ икIи сэлэтщ, усакIуэщ икIи ухуакIуэщ…

Светлов Михаил

Гъащ1эм щыхъумэн хуей 1уэхугъуэхэм гу лъозыгъатэ тхыгъэхэщ К1ыщокъуэ Алим и 1эдакъэ къыщ1эк1ахэр. К1ыщокъуэм хуэдэ тхак1уэ ди лъэпкъым къызэрыхэк1ам дригушхуэу дыпсэун хуйещ.

Алим Пшемахович Кешоков- Кабардинский поэт, прозаик. Герой Социалистического труда, Лауреат Государственной премии, Международной премии имени Михаила Шолохова в области литературы и искусства, Народный поэт Кабардино-Балкарии.

Кайсы́н Шува́евич Кули́ев — советский балкарский поэт и прозаик, журналист, военный корреспондент. Народный поэт КБАССР. Лауреат Ленинской премии, Государственной премии СССР и Государственной премии РСФСР имени Горького. Депутат Верховного Совета СССР 5, 9, 10 и 11 созывов.

Кешоков и Кулиев встретились в конце 1942 года, до войны они не были лично знакомы. Встретившись на войне, дальше по фронтовым дорогам Алим и Кайсын зашагали вместе.

Поэт Алим Кешоков вспоминал: «Кайсына ранило под Севастополем, я тащил его на себе в госпиталь. Кровь его залила мне одежду так, что невозможно было разобраться, чья она - моя или друга. Его уложили в полуторку вместе с двумя десятками таких же, как он, раненых. Я уже простился с ним, и вдруг Кайсын срывает с себя плащ-накидку и бросает мне: «Носи на здоровье».

Сам Кайсын Кулиев говорил об Алиме Кешокове: «...наше братство скреплено кровью. Большую часть жизни я провел вместе с ним - лучшим писателем Кабарды.

Кулиев не забывал тот подвиг Алима, перед смертью, находясь в больнице он написал:

…Я помню прекоп, и злобный свист свинца,

И пулею твою пробитую фуражку…

А ты, достойный сын достойного отца,

И храбр и стоек был в тот день студеный, тяжкий.

Алим Кешоков также писал стихотворения, посвященные Кайсыну Кулиеву:

Мы пили воду из Чегема-

Ты наверху, а я внизу,

И нам с тобой дарило небо

Одну зарю, одну грозу.

Кайсын Кулиев говорил: «Кабардинцы и Балкарцы, дружите друг с другом так, как мы дружили с Алимом Кешоковым».



Они дружили более сорока лет. Их долгая мужская дружба, чистая и честная, является примером для всех жителей нашей многонациональной республики. Их сравнивают с двумя вершинами Эльбруса – Алим Кешоков и Кайсын Кулиев два мудрейших кавказца с широкой душой. Высокий образец дружбы и духовного родства.



Алим Кешоков говорил: Все, что я писал и пишу, относится к моей республике, к той земле, которая взрастала меня и вскормила. К истории и судьбе народа, который породил меня. Я навечно связан со своим народом и, естественно, все перемены в его жизни и судьбе меня всегда волновали, ничто незамеченным не проходит.

«Все, что я писал и пишу, относится к моей республике, к той земле, которая взрастила меня и вскормила. Я навечно связан со своим народом и, естественно, все перемены в его жизни и судьбе меня всегда волновали, ничто незамеченным не проходит.