Внекласснӧй занятие «ТУИСОК»
Предмет: внекласснӧй занятие
Класс: 3-4
Тема: «Туисок»
Занятиелӧн тип: урок-исследованнё
Форма: фронтальнӧй, индивидуальнӧй и групповӧй
Мог: туиссэз керӧмӧн тӧдсӧтӧм, чужанiн да мам кыв дынӧ, отирлӧн вужжез да культура дынӧ пыдын интерес и радейтӧм
Планируемӧй результаттэз:
Познавательнӧй УУД:
-паськӧтны ассиныс кывкуд;
-кужны адззыны ответтэз юасьӧммез вылӧ;
-паськӧтны ассиныс тӧдӧммез коми отирлӧн кужӧммез йылiсь;
-керны простӧй выводдэз;
-кужны бӧрйыны велӧтӧм материал, вежӧртӧтны, обобщайтны;
Коммуникативнӧй УУД:
-кужны кывзыны и вежӧртны велӧтiсьӧс и ёрттэзӧс;
-кужны баитны оча да ӧтласа уджын;
-кужны уджавны группаын;
-кужны висьтавны ассиныс дума;
Личностнӧй УДД:
-радейтны да донтны вӧрва;
-донтны сэтшӧм понятиез, кыдз «Чужанiн», «вӧрва», «удж»;
-вежӧртны асланыс этническӧй да национальнӧй принадлежность йылiсь;
-вынсьӧтны желаннё шедтыны виль тӧдӧммез;
Регулятивнӧй УУД:
-кужны сетны ассит мненнё;
-кужны лӧсьӧтны уджалан места;
-сетны дон аслат уджлӧ;
- кужны пуктыны велӧтчан моггез;
Мӧдiк предметтэзкӧт йитсьӧм:
коми-пермяцкӧй литература, окружающӧй мир
Оборудованнё: проектор, ноутбук, экран, презентация, банись керӧм предметтэз, бан, пуовӧй бедёккез быд челядьлӧ, кыдзок, атласнӧй лентаэз гӧрд, веж да зеленӧй рӧммезӧн, нянь, сов, чышкӧт, кыдзок, паськӧм, половик, пызандӧра, пирӧггез
Занятиелӧн
Опонь дед:
-Бур лун, дона гӧссез!
Матрона баб :
-Бур лун, дона челядь!
(дед Опонь панталӧ аслас инькӧт да внучаткаӧн нянь солӧн гӧссесӧ)
Опонь дед:
-Висьталiс внучаткаӧ, что тiйӧ локтат ме ордӧ. Пырӧ да пуксьӧ, важын ни тiянӧс видзчисям.
-Тӧдсасям, кин менӧ оз тӧд. Менӧ шуӧны дед Опонь, ме кужись морт эта деревняын, эта менам инь Матрона, а эта менам внучаткаӧ. (мыччалӧ)
-Кин ме сэтшӧмыс, мый ме кужа керны вот ӧні висьтася. А тiйӧ тӧдӧ кытшӧм удж ме радейта керны медъёна?
Внучатка: (висьтасьӧ кывбур)
Козьналiс меным дедӧ туисок.
Муна вӧрӧ, ӧкта ягӧдок.
Озъягӧд- чӧскыт тусёк,
И ӧмидз гӧрдӧтӧм бок.
Быдса доз ӧкта бӧра
Опонь дедлӧ нӧбӧта.
Опонь дед:
-Тӧдiт мый ме медъёна радейта керны?
Опонь дед:
- Сiдз и эм, ме кера туисоккез. Бурӧсь да бытшӧмӧсь. Ме туис керись морт. Вот видзӧтӧ кытшӧмӧсь нiя менам эмӧсь. Эшӧ радейта банiсь керны быдкодь козиннэз и кин мый тшӧктас (мыччалӧ).
- Кытшӧм велӧтчан моггез пуктам ас одзын?
- Кыдз туиссӧ колӧ керны ме и мӧда висьтасьны тiянлӧ талун. А мӧдпыр и мыччала мӧдкодь ассим кужӧммез.
- Висьтася тiянлӧ сказка.
- Радейтат, челядь сказкаэсӧ?
-Кывзӧ бура да бытшӧма, а то од вежӧртӧ кыдз туисыс шогмӧ.
- Сказкаын пондасӧ пантасьны геройез, киннэз нiя, адззылат.
-Кывзӧ.
-Иньдӧтчам сказкаӧ бана туй кузя.
Вот ӧтiк коми вӧрын олӧм-вӧлӧм ТУИСОК аслас мамкӧт. Ӧтпыр петӧм сiя гуляйтны, любуйтчӧм басӧк Парма вӧрваӧн, кывзӧм кайезлiсь басӧк шыэз и…ӧшӧм. Повзьӧм да пондӧм горзыны. Сэк кылӧм горзӧмсӧ
Вӧрпӧтка.Тӧдӧ кин сiя, сета тiянлӧ загадка:
Кин тӧлӧн узьӧ да лапасӧ нималӧ? (ош)
(слайд)
- Ош и петӧм туисокыс дын. Юалӧм, мыля сiя горзӧ. Туисок думайтӧма, что адззӧм ассис мамсӧ. Ош висьталас туисоклӧ, что сы мамлӧн чочком пукач, что сiя ӧтiк пу миян светас, кӧдылӧн чочком пукач.
-Кыдз шусьӧ эта пуыс?
(кыдз)
- Кинкӧ тӧдӧ кыдз шусьӧ эта пулӧн пукачыс (кораыс) кӧдӧ кульӧны?
-Сiдз. Бан шусьӧ.
(слайд )
-Вот тiян одзын куйлӧ пукач , бан. Босьтӧ киӧ да вевдӧрӧт чуньӧн новйӧтӧ. Мый кольччис чунь вылын? (чочком кодь мавтас)
- Кыдз думайтат, мыйлӧ пулӧ кач?
Вывод: пукачыс (баныс) берегитӧ пусӧ, медбы сiя эз шонав. Вевдӧрсянь эм эшӧ чочком кодь мавтас (налет), сiя кыдз мел, порошок - кӧда берегитӧ шондiсянь.
Внучатка:
-А эшӧ, деду ме висьтася туисокыс мам йылiсь, баитӧны:
«Чочком кучика нывка
Шондiлiсь оз пов, гожум чулалiс, а сiя абу и загоритӧм»
-Мый челядь тӧдiт бурсӧ эта сказка торись, кӧдӧ ош тiянлӧ висьтасис?
(вывод: эм кач эта пулӧн, кӧда берегитӧ, медбы сiя эз шонав и шуӧны этӧ качсӧ-бан)
Дед Опонь:
Кывзӧ одзлань сказкасӧ.
Бӧра иньдӧтчам бана туй кузя ӧтлаын туисоккӧт. Мунӧм мунӧм туисокыс и казялӧм пу увтiсь мӧдiк вӧрпиӧс.
Кинӧс, тӧдмалӧ загадка:
Тӧлӧн чочком - гожумӧн руд.
(кӧч)
- Кӧчӧс панталӧм туисок. Пондӧм радуйтчыны, думайтӧм, что сiя сылӧн мамыс. Кӧч шуӧм, что ме пӧ не мам тэнат, мамыт олӧ пӧ сэтчин, кытӧт югыт, уна шондi би- Кыдззаын, кыдззаинын
-А миян местаэзын эм кыдззаэс?
(Слудина деревняын кыдзза, Рӧдинчи деревняын кыдзза)
Вывод: эшӧ сiйӧ пусӧ шуӧны миян коми да роч отирлiсь национальнӧй пуӧн, миян страна Россиялись символӧн. Этӧ пусӧ композиторрез, поэттэз, народ донтӧ асланыс творчествоын.
Кывзыштӧ песня («Читкыля кыдзок» кывбур гижис коми-пермяцкӧй поэт
С. И.Караваев, а композитор А.Клещин гижис музыка эта кывбур сьӧртi)
(кывзӧны сьыланкыв)
-Мый баитсьӧ сьыланкылын?
-Что кыдз статя, чочком бока, эта йылiсь мийӧ висьталiм ни.
Внучатка:
-Эшӧ эта пу йылiсь эмӧсь уна пословицаэз да поговоркаэз. Ноко кин нiйӧ тӧдӧ? (ӧктӧны пословицаэз да поговоркаэз)
Поговоркаэз:
*ежели эта пуыс пондас цветитны одзжжык ловпуся, то гожум лоас кӧс да шоныт, а ежели мӧдкодя, то гожум лоас зэра, кӧдзыт.
*кыдз петаласӧ листоккез пу вылӧ - колӧ ни садитны картов.
Пословицаэз:
*Эта пуыс шум лӧньсьӧтӧ, шогалiссезӧс лечитӧ, югытсӧ сетӧ.
*Пуыс не зэра погоддя: кытӧн сулалӧ, сэтчин и шумитӧ.
Опонь дед:
-Ноко, челядь, ме тiянлӧ мыччала серпас, мый тiйӧ висьталат эта йылiсь?
Важынся –важын 1000 (сюрс) год бӧртi, кӧр эз вӧв бумага, отир гижисӧ и рисуйтiсӧ бан вылын, велӧтчисӧ грамотаӧ. Важ отир гижлiсӧ коскаовӧй бедеккезӧн-этӧ специальнӧй йывсьӧтӧм бедёк. Гижлiсӧ письмоэз, лыддисьлісӧ, гижисӧ сы йылiсь, мыйӧн занимайтчисӧ, олан йылiсь. Сыбӧрын, энӧ бана грамотаэсӧ чапкавлiсӧ.
-Ноко, челядь, и мийӧ тiянкӧт пондылам гижны бан вылӧ. Адззӧ бан тор и бедёк. Пондылӧ гижны кыв-БАН.
(гижӧны кыв-бан)
-Мый бурсӧ тӧдiт эта сказка торись, мый йылiсь миянлӧ висьтасис кӧч?
(вывод: 1000 (сюрс) год сьӧрна ни бансӧ используйтӧ отир.
Кӧр эз вӧв бумага, отир гижисӧ и рисуйтiсӧ бан вылын коскаовӧй бедекӧн, велӧтчисӧ грамотаӧ.)
Опонь дед:
-Ноко, челядь, невна шоччисьыштам, а то нельки мыдзитӧ ни.
-Ноко, внучаткаӧ орс гӧссеткӧт.
(орсӧ внучатка Дарья)
ФИЗКУЛЬТУРНӦЙ ПАУЗА
Тӧлыс пӧльтӧ паныт, паныт
И некралӧ быд пуок.
Тӧлыс гусьӧн, гусьӧн, гусьӧн
И лэбтiсьӧ ни пуок.
Опонь дед:
-Бӧра иньдӧтчам бана туй кузя. Одзлань сказкасӧ висьтася. Мунӧ туисок се мунӧ, а мам се оз пантась. И вот сiя казялӧм, тӧдӧ кинӧс?
Загадка:
Мича мыгӧра, кузь чикися, гӧрд ленточкаа?
-Сiдз. Этӧ нылочка. Вот и туисокыс думайтас бӧра, что панталiс ни ассис мамсӧ. Но нылочка малыштас туисоксӧ юрӧт и висьталас, что не сiя сылӧн мам. Нылочка кӧсйисяс отсавны сiйӧ адззыны. И пондас висьтасьны: туисоклiсь мамсӧ важынся –важын радейтӧны и донтӧны коми и быд отир, сiдз кыдз сiя важын ни отсалӧ отирлӧ. Миян крайыс медбана.
Бансӧ заптывлiсӧ уна.
-Кыдз тiйӧ, думайтат, кытшӧм пораӧ бансӧ заптывлiсӧ?
(май конецын, июнь пондӧтчикӧ, сiдз кыдз пу качыс (баныс) бура шедiс сэк.
Дед Опонь:
-Видзӧтӧ, челядь эшӧ бан вылӧ кытшӧм рӧмӧн сiя?
-Веж, золотистӧй. Веж сiя конец майсянь-июньӧдз. Кульӧны бансӧ только пӧрӧм пуэз вылiсь и важ мыррез вылiсь. Кульны бансӧ пу вылiсь, кӧда быдмӧ, оз позь. Пу вермас кувны.
-Мымда жӧ банлӧн слойес?
Банлӧн уна слойес, нiя ӧтамӧддын бура лякасьӧмась, но сё жӧ ны коласӧт руыс ветлӧ . Кыным пӧрисьжык пуыс, сыным унажык слойез. Том пулӧн кач руд рӧмӧн, а вит год бӧртi сiя лоас чочком.
(велӧтiсь мыччалӧ челядьлӧ руд да чочком бан )
-Ноко, челядь пондылам косявны бансӧ поперег.
(оз косяссьы)
-А вдоль?
(косяссьӧ бура и слоитчӧ)
-Кӧстӧ бансӧ.
(бура кӧстiссьӧ)
- Кӧр бансӧ кулясӧ, сiйӧ сюйыштлiсӧ пым ваӧ, сэсся груз увтӧ, медбы сiя эз каттись. Сэк сiя лоо веськыт. Бансӧ тэчлӧмась ӧшын подушкаэз увтӧ, кӧр строитӧны керку, каттьывлӧмась ворота столббез.
Вот сiдз.
Опонь дед:
-Кытшӧм баныс, челядь?
(крепыт, бура кӧстассьӧ)
-Мый нылочка отсалiс миянлӧ тӧдны эта сказка торись?
(Вывод: баныс крепыт, бура кӧстассьӧ, оз сисьмы, сiйӧн и бансӧ тэчлӧмась ӧшын подушкаэз увтӧ, кӧр строитӧны керку, каттьывлӧмась ворота столббез.)
- Сказкаыслӧн абу эшӧ пмыс. Иньдӧтчам бӧра бана туй кузя.
Нылочка эз коль туисоксӧ, иньдӧтчис сыкӧт кошшыны сылiсь мамсӧ.
-Ноко, челядь, висьталӧ мый позьӧ керны банісь?
Керӧны сэтiсь: короббез, корзинаэз, кыйӧны нинкӧммез, туисоккез, музыкальнӧй инструменттэз и быдкодь берсясӧ.
Матрона баб:
-Кӧркӧ туисоккез керлiсӧ уна. Сэтчӧ нельки туйӧ пуктыны берсясӧ. И мый самӧй интереснӧйыс, что сэтчин нем оз шонав, и нем оз сайкав, оз тшык.
-Мый бы тiйӧ пуктiт туисокӧ?
(ма, кольттез, сур, тшак, ягӧд, сов, песӧк, ырӧш…)
Пыр вӧлi сьӧрын туисок гӧрисьлӧн и вундiсьлӧн, черикыйисьлӧн и вӧралiсьлӧн. Кужиссез мӧдӧтлiсӧ туисоксӧ быдкодь серпасӧн. Этӧ вӧвлiсӧ листоккэз, дзоридззэз, быдмассэз, пӧткаэз…
Кужись морттэз мӧдiсӧ мыччавны сiйӧн, медбы быд отирыс думайтiсӧ нельки бурсӧ да бытшӧмсӧ.
А туиссэсӧ керлiсӧ нельки уджалісь да кужись морттэз.
Опонь дед:
Талунся кадӧ пондiсӧ банiсь керны быдкодь берсясӧ. Эмӧсь и ӧння кужись морттэз кӧдна уджалӧны банӧн. (Петухова Валентина Егоровна, велӧтiсь, руководитӧ кружокӧн «Туисок» центр «Радугаын» Кудымкар карын)
Опонь дед:
-Мый нылочка отсалiс миянлӧ тӧдны эта сказка торись?
(Вывод: туисокас нем оз шонав, нем оз сайкав, и нем оз тшык, украшайлiсӧ туисоксӧ быдкодь узорӧн.)
Опонь дед:
-Бура кывзітӧ менчим сказка туисок йылiсь.Ӧнi челядь керам мекӧт ӧтлаын туисоксӧ.
Практическӧй удж.
-Ноко Матрона баб видзӧт да висьтав бытшӧм туисокыс миян петiс?
-А тiйӧ, челядь, кыдз думайтат? Кужим керны мийӧ туисоксӧ, сетам дон асланым уджлӧ?
(сетам дон асланым уджлӧ)
-Сказка эз эшӧ помав, кывзӧ мый лоис дальше. Мунiс мунiс туисок, ӧтлаын нылочкакӧт бана туй кузя и аддззис эд мамсӧ. Радмас бура и пондас горӧтлыны, что адззис мамсӧ. А кыдзок висьталас туисоклӧ, чтобы сiя эз мун некытчӧ юасьтӧг.
Вывод: эз пантасьӧ бы ош, кӧч и нылочка - сiя бы эз аддзы ассис мамсӧ. Колӧ кывзыны ыджытжыккесӧ.
-Сказка и эстӧн эз кончитчы. А туисоклӧн мам висьтасяс, нельки пӧ эм кыдзлӧн вежалун.
-Эта вежалун йылiсь висьтасяс Матрона баб, сiя буржыка, наттьӧ тӧдӧ.
Матрона баб:
Кыдзлӧн вежалун (шусьӧ сiя Стрӧча, Стречалун (рочӧн шусьӧ Троицын день,Троица, или Праздник русской березки.) «Стрӧча быд год панталӧы и кольлалӧны. Ӧбедӧдз вайӧны кыдзок. Ыджытсӧ озӧ, мед судзисӧ мӧдӧтны. Кин чышьян кышалӧ, кин лента, кин йи. Мӧдӧтасӧ- бытьтӧ нывка сулалӧ. Кытчӧдз оз мӧдӧтӧ, дак оз орсӧ, оз сёйӧ, оз сьылӧ. Ойбыт гуляйтӧны. Отир просто гажӧтчӧны, сьӧлӧм бурмӧтӧны, гажтӧмсӧ чужьялӧны.
Опонь дед:
Туисок адззис ассис мамсӧ и радӧн мунiсӧ гортаныс. Вот и сказка нельки совсем ни кончитчис.
А ме бы тiянлiсь юала:
-Мый сэттшӧм туисок?
(туисок-этӧ бановӧй дозок)
-Мыля отир пондӧмась керны, да и ӧнi керӧны бервясӧ банiсь?
(баныс крепыт, бура кӧстассьӧ, оз сісьмы)
-Мыля ӧнӧдз радейтӧны керны туисоккез?
(туисокас нем оз шонав, нем оз сайкав, и нем оз тшык)
-Кыдз басӧксьӧтӧны туисоксӧ кужись морттэз?
(украшайтӧны серпасӧн, краситӧны)
-Вот сэтшӧм сказка ме тiянлӧ висьтаси туис йылiсь.
Эн мыччав туисок вылö чуньöн
Кöр музейö кежан ветлöттöн,
И эн кунь тэ синнэз, эн куньлы,
Тэнат дед сэтшöм дозсӧ
Банiсь керлiс важынся- важын ни.
И музейö шедiс туисыс.
Идъя-зöръя сорлассис ни кылыс…
И важын ли пантавлiс кинкӧ,
Гöрд йӧрнӧса дедсӧ тэнчит,
одз асылӧн банлӧ мунтӧн.
-Ӧнi, челядь, мӧдӧтам и мийӧ кыдзок, нельки миян талун вежалун – Стречалун.
- Кинлӧ ӧддьӧн гленитчис менам висьт, ӧшӧтас кыдзок вылӧ гӧрд ленточка, не ӧддьӧн гленитчис-веж ленточка, эз гленитчы-зеленӧй ленточка.
(быдӧнныс ӧшӧтiсӧ).
- Вот сэтшӧм миян лоис кыдзок.
-А ӧнi менам инь гӧсьтитӧтас тіянӧс пирӧггезӧн, эшӧ нельки тiйӧ эд вунӧтӧ пӧ менчим сказка (занятие) козьнала тiянлӧ-туисоккез.
Опонь дед, Матрона баб, внучатка:
-Адзисьлытӧдз. Аттьӧ занятие понда. Вовлӧ эшӧ миянӧ гӧститны.
253
145 748 
