Сценка "Сасинкъа æмæ Дусинкъа".

САСИНКЪА.

Арæби, Дусинка, æвæццæгæн æмæ мæнг нæ фæзæгъæнц: адæймагæн, дам, зæрондырдæм йæ сæры зонд фæцæуы, зæгъгæ. Ау , уый та куыд , цæй тыххæй лидзынвæнд скодтай горæтмæ?

———————————————————————————————————

Цы дын зæгъон, цы, Дусинка? Зонын æй - адджын къона зын ныууадзæн у. Бастъæлой ныры адæм, фыдæлты фарн чи рох кæны, уый йеддæмæ зæронд усы йæ райгуырæн уæзæгæй атон! Иннæмæй та дæм, Дусинка, мæ зæрдæ тынг æхсайдзæн , горæты мидæг дæ сыхаг зæронд устытимæ иумæйаг æвзаг куынæ ссарай. Уыдон, мæ хур, нырыккон ирон æвзагыл дзурынц.

————————————————————————————————————

О, гормон, гормон! Мæнæн дæр мæ тыхст дæуыл куы у. Дæу хуызæттæ æмæ мæн хуызæттæ горæты талынг адæймæгтыл фæнымайынц. Ды, Дусинка, мæ хур, нырыккон ирон æвзаг нæ зоныс. Хуымæтæг кæй нæу, уый дæ бауырнæд, мæ мæрдтыстæн. Ахуыр æй кæнын хъæуы, ахуыр, кæннод ыл нæ фæцалх уыдзынæ. Раст зæгъгæйæ , Дусинка, æз иучысыл базыдтон нырыккон ирон æвзаг мæ лæппуйы чызджы фæрцы.

————————————————————————————————————

Лæмбынæг хъус уæдæ æмæ сæ дæ зæрдыл бадар. Цæвиттон , иу бон дын мæм горæтæй мæ лæппуйæн йе 'нæнтыст чызг æрцыд. Æз дын ын диссаджы дзадджын уæливыхтæ куы акæнин. Зæххыстæн, мард дæр сæм рабадтаид. Чызг дын дзы йæхи хорз куы фенид, стæй дын афтæ куы бакæнид: « Бабуся, æз дæ чъиритæй йеддæмæ никæй чъиритæй тащиться кæнын , фæлæ дын ныр туфта рауадысты, кайф дзы нал райстон». Æз дын чызгмæ мæхи куы бахъулæттæ кæнин æмæ йын куы зæгъин: «Хъус – ма, чызгай! Цы дын зæгъон, уый зоныс : уый та ма цавæр тащиться у? Мæ конд хæринаг хæрынмæ нал бæззы , и?».

Чызг ныккæл – кæл кодта æмæ дын мæм дзуры: « Æз дæуæй , Бабуся , улетать кæнын. Тащиться уый тыххæй загътон , æмæ дын дæ чъиритæй без ума кæй вæййын». Гъе , афтæ. Так что, Дусинка, мандраж ма кæн, æз дæ фæцалх кæндзынæн уыцы æвзагыл.

————————————————————————————————————

Уый , Дусинка,, мæнæ æфсæртæ иу ран куы нал фæлæууынц , зыр - зыр кæнын куы байдайынц, уæд уый мандраж хуыйны. Мæнæн дæр æй мæ фырты чызг бацамыдта.

—————————————————————————————————————

Брось, Дусинка, не дрейфь!

———————————————————————————————————————

Æнхъæлдæн, æмæ, Дусинака , дæ котел æппындæр варить нал кæны . Науæд æй , æнæзонд къоппа , æмбарис, не дрейфь æвзæр ныхас кæй нæу , уый. Уый, зæгъы, цæмæй хъеллау— меллау мА кæнай, фæлæ уай уæндондæр æмæ ныфсджындæр.

————————————————————————————————————— ——

Хъус – ма, Дусинка . Ды кæдмæ гнать кæндзынæ, кæдмæ мын мæ сæр морочить кæндзынæ? Ныр мæнæн цы адджын ныхæстæ ракодтай , уыдон горæты зæронд устытæн куы ракæнай, уæд дæ нæ бамбардзысты, курам дæ на смех сисдзысты. Уыдонимæ мæнæ афтæ дзургæ у: « Мæнæ чувиха куы уыдтæн, мæ уынд , зæгъ, упадешь, не встанешь куы уыди, уæд мæм чувак усгуртæй не было отбоя. Фæлæ сын æз кодтон ОТВОРОТ — ПОВОРОТ.

Хæдæгай! Зæронд устытæ дæ куы фæрсой дæ номæй, уæд сын – иу зæгъ, мæ ном Душенька у, зæгъгæ. Хъуамæ йæ зонай, ирон ном модæйы кæй нал ис, уый. Хуыцау дæ бахизæд Дусинка номæй, кæннод дæ горæтаг зæронд устытæ забодать скæндзысты.

Цæй , бирæ болтать мауал кæнæм. Нæ ляскæтæ мауал точить кæнæм, фæлæ тагъддæр, собирай свои шмотки, монатки и дуй, мотай в город. ЕЙ- Богу , Душинка , не прогадаешь!

——————————————————————————————————————

(ХУДЫ). О, Дусинка, о, гормон, мæн дæр куы хъуыд! Ныр дæр ма – иу горæты кой скæн.

ДУСИНКА.

Тæхудиаг фæуай, Сасинкъа, дæ хъал мыл куынæ калис. Исчи ма йæ фырхъалæй йæ райгуырæн уæзæгæй горæтмæ лидзы! Нæ лæппу мæ иуран нал уадзы, горæтмæ, дам, мемæ цæрынмæ куынæ рацæуай, уæд мæ æгады бынаты æвæрыс, йæ мады хъæуы иунæгæй хъæуы цæргæйæ ныууагъта, зæгъгæ.

————————————————————————————————————

Адæймаг ма , Сасинкъа, дæуæй фехъусы уыцы ныхæстæ. Æвæццæгæн æмæ дæ бон дæ фарсыл нæ бахæцы, мæн истæмæй куынæ фелхыскъ кæнай, уæд.

————————————————————————————————————

Уагæры , Сасинкъа, цавæр нырыккон æвзаг у, цæмæй мæ тæрсын кæныс?! Цæвиттон, тæрсын кæныны бæсты ма бавдæл, æмæ мæ иуцъус ацахуыр кæн уыцы æнæбайрайгæ æвзагыл.

————————————————————————————————————

Сасинкъа, мæ хур, «мандраж» та циу?

———————————————————————————————————

Мæнæ царæфтыд куыд фæдæн! Ныр куыдтæтæ уыдзынæн? Куыд тынг зын у уыцы æнахъинон æвзаг сахуыр кæнын.

———————————————————————————————————

Цæмæн мæ æлгъитыс, Сасинкъа, æви дæхи сæр æлгъитинаг фæци. Уый мын цытæ дзурыс.

———————————————————————————————————

Æмæ куы ницы зæгъын, Сасинкъа. Адæймаг æнамонд куы уа, уæд цы гæнæн ис! Цæмæй хæйрæг уыдтæн, мæ зæронд мæнæ афтæ хынджылæггагмæ æрхаудзæн, уый.

Хъуыды ма кæныс, Сасинкъа, не 'рыгон азтæ? Куыд рæсугъд чызджытæ уыдыстæм! Къахихсыдæй дæр уæдæ нæ къæсæртæй æнамондхуызæй фæстæмæ цас æмæ цас усгуртæ аздæхт! О..!

——————————————————————————————————

Фыд æнæбайрайгæ дзы скæн дæ нырыккон ирон æвзагæй. Ме 'гасæй мæнæн мæ къах никуы уыдзæн горæты. Гъы, «не прогадаешь, Дусинка»… Дæ хуыздæрты арвит, Сасинкъа, горæтмæ!..

ДУСИНКА АЦЫДИ.