Сыфат.Насыл? суалине джевап берген сёзлер.

Мевзу :  Сыфат.Насыл? суалине джевап берген сёзлер.

Макъсат:

- Сыфат акъкъында талебелерге бильги бермек;

 - Талебелернинъ бильгилерини юксек севиеге котерюв, сыфатларны башкъа сез чешитинден фаркъламагъа огретюв;

-Талебелернинъ лугъат зенгинликлерини арттырмакъ, фикир юрютюв къабилиетлерини инкишаф эттирмек ;

-Талебелерге ахлякъ тербиесини ашламакъ;

-Тилимизге меракъ ве севги ашламакъ.

Бекленильген нетиджелер: талебелер сыфат акъкъында бильгилерни менимсейлер,сыфатларны бельгилемек теджрибесини къазаналар,озь нутукъларыны,коммуникатив къабилиетлерини инкишаф эттирелер,сёз байлыкъларыны арттыралар.

Дерс терминаты: дерслик, джедвель, даркъатма васталар (карточкалар), мультимедия васталары.

Дерснинъ чешити. Янъы мевзу алув дерси.

Дерснинъ кетишаты

1.Тешкилий дакъкъа

Селям олсун сизге , достлар! Бизге бугунь мусафырлер кельди.Келинъиз селямлашайыкъ.

2. Дерс вазифесини бельгилев. Бильгилерни актуаллештирюв .

2.1 Бильгилерни актуаллештирюв
Келинъиз къатырлайыкъ кечкен дерсте биз фиильнен таныш олдукъ. Фииль бу недир?(предметлерининъ иш арекетини бильдирген сёзлер, не япа?не япты?не япаджакъ?суаллерге джевап берелер).Мисаль.

Дерс мевзусыны бельгилев.

2.2Ассоциатив фикир этюв.

-Аналарнынъ фотоларыны тахтагъа асам.Мен сизге сюрприз азырладым.Бу ким?

- Баллар,бакъынъыз:
тахтада « АНА» сёзю языла.Ана сёзюни эшиткенде сизде насыл ассоциация пейда ола.Сизинъ ананъыз насыл?(дюльбер,акъыллы,назик,мераметли,ишкир,инсафлы…)

Бу сёзлер насыл суаллерге джевап бере?(Насыл? Суальге джевап берелер)

- Дерсимизнинъ макъсады недир?( Насыл? суалине джевап берген сёзлер акъкъында бильги алмакъ)
- Демек, дерсимизнинъ мевзусы ( Насыл?суальге джевап берген сёзлер.)

Бу мевзуны яхшы анъламакъ ичюн биз бугунь нелер япмакъ керекмиз?

Оджаны дикъкъатнен динълемек. Насыл суалине джевап берген сёзлернен джумлелер язмакъ керекмиз ве иляхре.(вариантлар)
3.Янъы мевзу алув.
Шимди исе китапларынъызы 57 саифеде ачынъыз.
Меш.103 вазифени окъунъыз.Ресимлерге бакъып,нокъталар ерине келишкен сёзлерни тапынъыз.

Ярдымджы сёзлер:экши,къырмызы,татлы,узун,тёгерек,сары,ешиль.
Предметнинъ аляметини бильдирген сёз насыл сёз чешити ола?

-Машаллах,яхшы.
- с.57 ачынъыз. Баштан мен айтайым сонъ исе сиз окъурсынъыз. Биз неге сыфат айтамыз?

-Аферин.
Шимди исе дефтерлерини ачып бугуньки санынъы язынъыз.Апрельнинъ 23.Сыныф иши.
3.1 Темиз язув дакъкъасы
ТЁГЕРЕК сёзю.

-Насыл арифни язаджамыз о я да ё? Эшитемиз о,амма язамыз ё . Дефтерлеринъизде темиз ве дюльбер язынъыз. Ёё арифлерини язамыз,сонъ исе тёгерек сёзюни.
Тахтада берильген сёзлерге келишкен исмлерни тапып язынъыз

Келинъиз тапып язайыкъ.

Узун ------------------ ЁЛ

Дюльбер-----------------ЧЕЧЕК

Къыскъа------------------САЧ

Беяз-----------------------КЪАР

Татлы---------------------БАЛ

Темиз----------------------ДЕФТЕР

-Машаллах!
3.2. Раатлыкъ дакъкъасы
Биз аякънен тап-тап
Биз къолларнен шап-шап
Биз козьлернен мих-мих
Омузларнен шых-шых
Бир анда,эки мында
Айлан озь этрафында
Биз отурдыкъ сонъ турдыкъ
Ерлермизге отурдыкъ.
3.3.Китапнен чалышув
с. 57 меш 104
Нъокъталар ерине насыл? суалине джевап берген сёзлерни язынъыз.

Нумюне: комюр (насыл?)къара,къатты.
Девам этемиз. Шимди с.58 мешгъулиет 105.Вазифени окъунъыз.
Маналары къарама-къаршы олгъан сёзлерни окъунъыз.
Бу сёзлерге не?суалине джевап берген келишкен сёзлер тапынъыз.Дефтеринъизге нумюне боюнджа язынъыз:
Агъыр(не?) иш- енгиль (не?)вазифе.

3.4 Такъымлар вазифеси

Шимди исе сиз группаларгъа болюнип отураджакъсынъыз ве карточкалар узеринде чалышаджакъсынъыз. Карточкаларда аталар сезлери язылгъан . Сиз бу аталар сезлеринден Насыл? сёзюне джевап берген сёзлерини тапынъыз ве «не ичюн ойле айталар?»-анълатынъыз.

1. Татлы сёз балдан татлы. 

2. Догъру сёз ольмез.

3. Энъ яхшы зенгинлик – бильгидир. 

4. Халкъ иши – акъ(беяз) иш.

5. Догъру сёз къылычтан кескин.

6. Яхшы адам селямындан белли.

-Машаллах! Аферин сизге яхшы чалыштынъыз.

3.6 Раатлыкъ дакъкъасы

Бир эки,биз турдыкъ

Учь дёрт тез юрдик

Беш алты секирдик

Едиде айландым

Секизде узандыкъ

Докъузда эгильдик

Он дедик догърулдыкъ
4. Дерсликнен чалышув.
Шимди исе китапларнен чалышмагъа девам этемиз с.58 мешгъулиет 106 .

Вазифени дикъкъатлы окъунъыз.

Джумлелерни дефтеринъизге язып алынъыз.
Не?суалине джевап берген сёзлернинъ астыны бир сызыкънен,насыл? суалине джевап берген сёзлерни далгъалы сызыкънен къайд этинъиз.Экинджи джумледе баш азаларыны къайд этинъиз.

5.Дерснинъ нетиджеси.
-Баллар,келинъиз дерсимизнинъ нетиджесини чыкъарайыкъ.

-Тахтада эки ресим асыла.Бу ресимлерде кимни коресинъиз?(огъланлар).

-Огъланлар насыл кийинген,урбалары насыл?

(адий,фукъаре,паалы,дюльбер,темиз,йыртыкъ…)

-Бу сёзлер насыл суальге джевап бере?Насыл суальге джевап берген сёзлерге не айталар?(Сыфат)

-Сиз къайсы бир баланен дост олурсынъыз?

-Не ичюн?

-Эльбетте достлукъ яхшы шей.Амма билинъиз ки бу дюньяда зенгинлик энъ муим шей дегиль,бу дюньяда энъ муими инсан олмакъ.Бунъы ич бир вакъыт унутманъыз.

6.Рефлексия
Бугунь дерсте биз…
Оджа бизге…
Дерснинъ макъсады не эди? (вариантлар)

Дерсте насыл вазифелер беджердик?(вариантлар)

Дерсте биз… бегендик.

7.Эв вазифеси

Саифе 58 мешгъулиет 107.
Къаидени огренмек с 57.

Къырымтатар тилинден дерс

2 сыныф

Мевзу:

«Сыфат.Насыл? суалине джевап берген сёзлер.»

Акъмесджит шеэри

37-джи мектебининъ оджасы:

Ибраимова Э.Ф.