Тарыхты унутпа.........................

Ушул күнү бийик трибуналардан, Фейсбуктан "Тарыхты унутпагыла" деген чакырыктар айтылып, бабалардын жеңиши гана макталат эмеспи. Болбосо, менимче бул күндүн бир мааниси "эч бир эл эч кимден жогору эмес" дегенде жатат. Кана эмесе, 2-Дүйнөлүк согуштун келип чыгыш себебин жөнөкөй тил менен карайлы. Бул согуш 1914-1918-жылдары болуп өткөн 1-Дүйнөлүк согуштун жыйынтыгы экенин бул темада изилдөө жүргүзгөн тарыхчылардын баары белгилешкен. Анткени 1-Дүйнөлүк согушта бир катар империялар жеңилип, айрымдары кыйроого учурап ичтеринде кеги, көңүлдөрүндө өксүктөрү калган. Өзгөчө чоң материалдык жана моралдык жоготууларга кабылган Германияда немец улутунун мурунку улуулугун ойготом деген улутчул-социалисттер ызалуу калктын сезими менен ойноп, бийликке келишкен. Жеңилбесе да кыйрап калган дагы бир империя менен жең ичинен сүйлөшүп Европаны бөлүп алып, акырындан аскердик жол менен басып ала баштаган. Натыйжада 72 миллион адамдын өмүрүн алган согуш башталган. Ошондуктан мындай согуштар кайталанбасын үчүн "Бизди башкалар көрө албайт. Басып алгысы келет. Биз дүйнөнүн улуу элибиз" дегендер, "Биздей ойлонбойт, биздин тилде сүйлөбөйт. Биздин кандаштарыбызды кыйнап жатат" деп башкалардын ички иштерине кийлигишкендер тыйылышы зарыл.

Дүйнөдө тынчтык болсун!