Творческая работа "Алим-Айдамакъ- къырымтатар халкъынынъ къараманы"

Бинъ яшасын халкъымызнынъ Алим киби эрлери!

Унутылмаз, ерде къалмаз миллетнинъ перверлери,

Баба-деде топрагъында анъылмагъан къалмасын

Батырнынъ абидеси даима парылдасын.

С. Усеинов.

Эр бир халкъынынъ озь миллий къараманлары олгъан:инглиз халкъында-Робин Гуд,русларда- Емельян Пугачев ве дигерлери. Бойле де миллий къараман къырымтатар халкъында да бар - Алим Айдамакъ. Бу адынен онынъ атиклиги,адамлыгъы ве акъикъий образы джанлана. Алим- тарихий инсандыр,омюр тарзы айдутлыкъ эди, амма яшагъан еринде къанунлар кутильмеген. Ким олгъан Дагъ айдутларнынъ башы? Къарасувбазардаки Копюрликойде, Азамат акъайнынъ фукъаре къорантасында дюньягъа кельген Алим, яш чагъындан ишлемеге меджбур олгъан. Асыл, шу девирден башлап Алимнинъ гонълюнде акъсызлыкъкъа ачувы къозгъалап башлай.

Алим акъкъкында эсерлерде онынъ садыкъ досту- намлы аты Тозлу тору анъыла ве макътала. Эр бир къыйынлыкълардан къуртаргъан, байыр, дере, озенлерден йылдырым киби учырып кечирген атындан айырылмай, даима берабер ола. Алим Айдамакъ бир озю шахсен курешкен. Эсас куреши зенгинлернинъ байлыгъыны тартып алмакъ ве адий адамларгъа ярдым этмек.О факъыр-фукъаре койлюлернинъ къорчалайыджысы олгъан. Алим Айдамакънынъ эсас куреши-къоркъузмакъ,тенбиелемек, озь дегенини яптырмакъ.

Джесюр халкъ къараманы,Алим акъыллы, ирадели, бильгили инсан эди. О, озь душманларыны тек силянен дегиль де, сёз усталыгъынен де шашмалата эди. Къырымтатар фольклорында Алим акъкъында йырлар,эфсанелер,риваетлер, хатырлавлар юксек бедиийликке малик эсерлердир. Оларнынъ чокъусы фактик материаллар устюне къурула. Бу эсерлерде Алимнинъ омюринде олып кечкен базы вакъиалар текрарланса да, халкъ оларны даа да толдурып эеджаннен хатырлай.

Миллий фольклор эр бир халкънынъ буюк зенгинлигидир. Къырымтатар халкъ агъыз яратыджылыгъы асырлар девамында инсанларгъа мераметлик, джесюрлик, адалетлик, инсаниетлик, эйилик киби чизгилерни ашлагъан.Менимдже, Алим Айдамакъ акъкъында олгъан эсерлер тамам бу чизгилерни къайд эте. Шимди мектеп талебелерни ойле джесюр халкъ къараманы Алим киби ве келеджекте озь халкъымызнынъ къорчалайыджысы олмагъа тербие бермемиз лязим.