Уһуйааҥҥа аналлаах хоһооннор

Дорообо, уһуйаан!

Сарсыарда эрдэ туран,

Суунан-соттон, симэнэн,

Үөрэ-көтө үктэнэн

Уһуйааммар кэлэбин.

Дорообо, детсадым!

Дорообо, иитээччим!

Дорообо, доҕорум!

Олуһун аҕынным!

Кып-кырачаан уолаттар

Чоҕулуһа көрөннөр

Уһуйааҥҥа киирдилэр

Иитиллээччи буоллулар.

Оонньуур - күлэр оҕолоох

Чэчир оҕо саадыгар

Үүнэ-сайда, эбиллэ

Кэлэ туруҥ күннэтэ!

Ырыа-тойук дьиэрэйдин,

Үҥкүү-битии ньиргийдин,

Билии-көрүү кэҥээтин,

Үөрүү-көтүү үксээтин!

Иитээччигэ

Кини наһаа кыраһыабай,

Бары-барытын билэр,

Күнү быһа биһигинниин

Тэҥҥэ сылдьан үөрэтэр.

Кини курдук буолуом этэ,

Ыллаан-туойан дьиэрэтэ,

Үҥкүүнү да үөрэтэн

Имигэстик хамсанан.

Сырдык, сэмэй мичээринэн

Эйэҕэстик сыдьаайа

Куруук үөрэ-көтө көрсөр

Оҕолору күн аайы.

Ытаабыты уоскутар,

Кыралары аһынар,

Аһатар, таҥыннарар,

Ийэлэрин солбуйар.

Ойуулары көрдөрөр,

Ыллаһар, үҥкүүлэһэр,

Хоһоон ааҕар, олоҥхолуур,

Остуоруйаны кэпсиир.

Билбэтэххэ быһаарар,

Сатаабаты үөрэтэр,

Туһалаахтык оонньотор,

Күнү быһа такайар.

Уһуйааҥҥа үчүгэй

Ийэлээх аҕаккам

Үлэлии бардылар,

Киэһэлик кэлиэхпит

Кэтэһээр — дэстилэр

Ону баара, ону баара

Тэһийэбин манна мин,

Уһуйааҥҥа хааларбыттан

Хомойбоппун эбээт мин

Киэһэ хойут кэлэҥҥит

Кэтэһиэххит — билэбин,

Оонньоон бүтүүй дэһэҥҥит

Ыксатыаххыт бэйэбин

Уһуйааҥҥа

Бу манна, бу манна

Уһуйааҥҥа элбэхпит

Бу манна, бу манна

Уһуйааҥҥа иллээхпит

Доҕоттору кытары

Үөрэ-көтө оонньуубут

Остуол тула олорон

Минньигэстик аһыыбыт

Сырдык, сылаас уһуйааны

Олус, олус таптыыбыт

Остуоруйа курдук дьиэҕэ

Күнүн аайы ыксыыбыт

ДЕТСАД ОҔОЛОРО

Эриэккэс детсадка

Күннэтэ мустабыт,

Эҥини оонньооммут,

Көрүлээн тахсабыт.

Үнкүүнү, ырыаны

Үгүһү билэбит.

Эйэҕэс майгыга

Иитиллэн иһэбит.

Биһиги барыбыт

Үөрэҕи батыһан,

Биллиилээх дьон буолан

Үүнүөхпүт, сайдыахпыт.

Биһиги буолуохпут

Кэнэҕэс лётчиктар,

Учёнай бэртэрэ,

Геройдар, поэттар.

Биһиги кыайыахпыт

Бу хоту сир киэнин

Кыыдааннаах-чысхааннаах

Кыһыҥҥы тымныытын.

Биһиги айыахпыт

Өлүөнэ биэрэгэр

Өрүүтүн киэргэйэр

Үйэлээх сайыны.

ДЕТСАДКА

Күнү быһа оонньооммут

Сылайары билбэппит.

Оонньуурдары ыламмыт

Ыаллаах оонньоон биэрэбит.

Субуруһан тураммыт

Поезд буолан барабыт.

Төгүрүччү сиэттиһэн

Хороводтаан хаамсабыт.

Кэпсээн истэн чуумпуран

Сэҥээрэбит олорон.

Ырыа, хоһоон үөрэтэн

Чоргуйабыт биһиги.

Детсадка

Бу хоспут биһиэнэ

Киэҥ, сырдык, ичигэс.

Манна баар барыта —

Барыта үчүгэй.

Иирээннээх да кыыллар

Эйэлээх буолбуттар:

Кэҕэлиин, чыычаахтыын

Кэпсэтэн барбыттар.

Урукку өстөрүн

Умнубут доҕоттор —

Куоскалаах кутуйах

Куустуһан олооттор.

Ол эһэ оҕонньор

Ороҥҥо олорон

Куттаҕас куобахха

Куукалка oҥopop.

Таба кыыл уоскуйан

Таас хайаҕа турда.

Оннооҕор сур бөрө

Улуйан уурайда.

Бу хоспут биһиэнэ

Киэҥ, сырдык, ичигэс.

Манна баар барыта —

Барыта үчүгэй.