Üürenicilerin bilgi uurlarını kantarlamasında tradiţional hem eni metodları.

ÜÜRENİCİLERİN BİLGİ UURLARINI KANTARLAMASINDA TRADİŢİONAL HEM
ENİ METODLARI.

İvançoglo Stefanida İvanovna

KDU magistrantı,

S. İ. Baranovskiyin adına

Kıpçak teoretik liţeyindä gagauz dili hem

literatura üüredicisi, II didaktika uuru.

Email: [email protected]

Anotaţiya: Statya kısadan verer kantarlamak için hem onun geliştirilän davaları için informaţiya. Statyada gösteriler tradiţional hem eni kantarlamak sistemaların temellenmekleri, yaraştırılȇr onnarın özellikleri, açıklanȇr tradiţional sistemanın kusurluklarını, yufka uurları hem eni sistemanın zamandaş istediklerinä uygunnuu hem onun çeşitlii. Kısadan tanıştırılȇr birkaç servislän, angıları verer kolaylık kantarlamakta kullanmaa oyunnarı da bununnan yapȇr onu üürenicilerä deyni taa meraklı hem motivleer eni bilgi kabletmeyä.

Anatar laflar:: kantarlamak sisteması, notalamak, kantarlamak metodları, bilgi uurları, başarılar, oyun resursları, servis.

Abstract: The article gives a brief definition of evaluation and the tasks of its implementation. The article shows what traditional and innovative types of assessment are based on, compares their features, reveals the shortcomings and weaknesses of traditional assessment, and also reflects the diversity and compliance with the innovative assessment requirements. A brief introduction is given to some applications that allow you to create games for assessment which makes the process more attractive for students and motivates their pursuit of knowledge.

Key words: assessment system, assessment, assessment methods, level of knowledge, progress, game resources, applications.

Üüretmäk proţesin hem üüredicilerin çalışmaların önemni uurların birisi sayılȇr üürenicilerin bilgi başarılarını kantarlamak hem notalamak. Bu komponent, nicä dä üüretmäk proţesin başka komponentleri (içindelii, metodlar, kolaylıklar, işi kurmak formaları), lääzım uysun cümnenin zamandaş istediklerinä, pedagogika hem metodika bilimnerinä, üüretmenin genel istediklerinä hem neetlerinä.

Kantarlamak geliştirer birkaç türlü davaları:

• Üüretmäk proţesin korekţiya işin üürenicilerin bilgilerin uurları hem kalitesi için obyektiv informaţiya kabletmää;

• Bulmaa kolaylık üüretmeyi individual uurunda kurmaa;

• Göstermää üürenicilerin becermeklerini, ama diil yannışlıkları.

• İzlemää üürenicilerin individual ilerlemesini.

• Üüretmää üürenicileri kendi-kendilerini kantarlamaa.

• Motivlemää üürenicileri görmää kendi yannışlıklarını hem çözülmäk yolunu üüretmäk proțesindä.

• Kurmaa baalantı üüredicinin, üürenicinin hem anaların-bobaların arasında.

En önemni üürenicilerä deyni şkolada o – başarılar. Bunun için uşaklar lääzım becersinnär kantarlamaa kendi bilgilerini hem yaraştırabilsinnär onnarı üüredicinin notasınnan. Zamandaş kantarlamak lääzım olsun annaşılı nicä üürediciyä, ölä dä üüreniciyä hem anaya-bobaya. Kantarlamak yardım eder:

• Çekmää üürenicilerin dikatlıını üürenmenin neetlerinä hem başarılı olmak kriteriyalarına;

• Doorutmaa üüredicinin çalışmasını herbir üürenicinin individual ilerlemesi tehnologiyalarını iileştirmäk uurunda;

• Üürenmenin ilerledilmesi için vermää informaţiya (doorutmaa yannışlıkları, başarmaa işi, iileştirmää),

• Kendi – kendini kantarlamak becermeklerini oluşturmaa,

• Dayma kurmaa hesaba almaklarınnan feedbek.

• Haberlemää:

• Üürenicileri yapılmış işin kalitä uurları için,

• Üüredicileri üürenicilerin ilerlemesi için,

• Anaları – bobaları hem dolay yanındakıları üürenicilerin başarı uurları için.

• Şkola hem devlet uurunda oluşturmaa otçot kurmak politikasını.

Kantarlamak proţesindä en önemni olȇr o, ani kantarlanȇr diil üürenici, ama onun çalışması. Zamandaş üüretmäk proţesi lääzım uygun olsun bölä kriteriyalara:

Üürenicilerin bilgi uurlarının kantarlamak hem notalamak soruşları zamandan bakıldı türlü poziţiyalardan. Üüredicinin adetçä kantarlamak çalışması baalı iki funkţiyaylan: üürenicilerin başarılarını hesaba almaa kabledilmiş etalonun kalıbına koyarak hem motivlemää üürenicileri ilerletmää üürenmeyi.

Praktikada üüretmenin tradiţional notalamak sistemsında bulȇrız çok türlü negativ taraflarını. Tradiţional metodların analizi gösterer, ani üüretmenin kalitä uurlarını kantarlamak temellenmeer pedagogika ölcülerin obyektiv metodlarına. Ondan da “kalitä” annamanın maanası açıklanılȇr serbest, herbir üüredici kantarlamak sistemasını kurȇr kendiycä. Cuvapsız kalȇr şüpelär: kaç soruş lääzım koymaa bütun temanın bilgileri kantarlansın deyni hem diagnostika paalılıına görä, nicä yaraştırmaa verilmiş işleri. Kalıplanmış formalarda üürenicilerin bilgilerini kantarlamak hem notalamak üüretmäk proţesindä az faydalıı olȇr diil sade, ani feedbek kolaylıkları azarak geler. Bölä çalışmak sisteması açȇr üüredicilerä kolaylıklar vermää hayli informaţiya nekadar varsa nicä cok üüreniciya birdän. Ama kaybeler kolaylıklar üürenmää, kaç uşak bu informaţiyayi kabletti hem annadı. Bunu üüredici annayacek, geçirdiinän bir kontrol işi. Nicä biliner, kontrol işini hazırlamaa, geçirmää hem kontrol etmää alȇr biraz vakıt. Bu üzerä dä, nicä deniler, sıcaklıına, üürenicilerin yannışlıklarını doorutmaa hem düzeltmää onnarın çalışmak yollarını yakışmȇȇr. [4]

Tradişional kantarlamak sistemanın en büük kusurluu, angısı vermeer kolaylık kaldırmaa üüretmeyi taa üüsek uura – onun annaması nicä subyekt – obyekt davranması, neredä üürenici üzül kalȇr.

Büünkü gündä eni, inovaţiya kolaylıı gibi kullanılȇr testlemäk, modul hem reyting sisteması, kalitä monitoringi, portfolio metodları.

Testlemäk - avtomatika kontrol etmesi, angısı verer kolaylık hemen gözletmää bigileri hem onnarın kalitä uurlarını. Bu taraftan testlemeya hiç bir kantarlamak forması da benzemäz. Testleri yakışȇr kullanmaa üüretmäk proţesin herbir etapında. Onnarın yardımınnan taa efektiv geçiriler hertürlü kantarlamaklar: ilkinki dä, formativ dä, sumativ dä[8].

Modul sistemasının neeti, koymaa üüreniciyi hergünkü çalışmanın lääzımnık uuruna bütün üürenmäk yilın süresindä.

Reyting sisteması verer kolaylık tradiţional sistemanın kusurlukların çoyunu aykırlamaa da taa difirenţir uurda kantarlamaa herbir üürenicinin başarı uurlarını.

Reyting (engliz “rating”) – nota, nesoysa kalitä annamın ţifralı harakteristikası. Adetçä reyting annamında sayılȇr “toplam nota”.

Üürenmäk portfoliosu.

Geniştän annamına görä, portfolio – üürenicilerin bilgilik produktların toplamak forması hem onnarın kurması.

Üürenicinin portfoliosu – bölä bir gözäl hem zamandaş pedagogika kolaylıı, angısı yardım eder kendi - kendini kantarlamaa, kontrol etmää hem notalamaa.

Portfolionun temel neeti – taa ii göstermää uşaklara, nicä dooru kendi üürenmäk proçesini kurmaa, vermää onnara dar hem geniş maanada kaavi motivațiya, açmaa ileri dooru da büük havezlän eni bilgileri, başarılı düzmää refleksiyalı becermekleri hem olmaa obyektiv kendi - kendini notalamakta.

Monitoring.

Bitki vakıtlar “kontrol” terminin erinä, “diagnostikadan” kaarä kullanılȇr “monitoring” termini. Monitoring – “üüredici - üürenici” sistemasında devamnı kontrol edän işlem. O verer kolaylık gözletmää hem, lääzımnıına görä, korekţiya yapmaa üürenicinin bilmemezliktän bilgi kabletmäk yolunda.

Butakım, lääzım urgulamma, ani taradiţional kantarlaması herzaman vermeer kolaylık obyektiv kantarlamaa üürenicilerin bilgilerini. Bu durum var nicä negativ dokunsun üürenmeyä. Eni kantalamanın sa var taa zeedä kriteriyaları, angıları genişleder kantarlamak sistemasını, motovleyeräk diil sade üüernicileri, ama üüredicileri dä.

[4]

Tradiţoinal

kantarlamak

Ne kantarlȇȇrız?

• Bilgilerin olduunu - notaylan

Kim kantarlȇȇr?

üüredici koyȇr,

üürenici - kableder

Kim kantarlȇȇr?

Ne kantarlȇȇrız?

Eni kantarlamak

• Becermekleri kullanmaa bilgilerini – kantarlamak döner notaya

• Üürenici üürediciylän dialogta

Eni kantarlamak metodlarına girer oyun resursları da. Kantarlamak sistemasında onnarın da var çok önemni eri, çünkü üürenicilär büük havezlän katılȇrlar bölä çalışmaya hem pay almakları da türlü meraklılık onnarda uyandırȇr.

Şindiki vakıtlarda var oyun kurmak için çok konstruktorlar, ama bän tanıştıracam benimnän en kullanılanılan birkaçınnan.

Sonunda isteerim urgulamaa, ani tradiţional bilgi kantarlamak kolaylıkları büün bulunȇrlar kritika altında herbir taraftan: bilgiç adamnarın, praktik üüredicilerin, üüretmäk müdürlüün öndercilerin hem uzmannarın hem dä üürenicilerin hem onnarın anaların – bobaların. Yok ne saklamaa, ani kimi sıra bu kantarlamak sisteması konflikt kaynaa gibi olȇr. Zamandaş üüretmäk proţesin temellenmesi üürenicilerin genel komptetenţiyalarının oluşturmasına hem ilerledilmesinä derindän debreştirer bilgileri kantarlamak sisitemasının da diişilmesini. Gittikçä belli olȇr lääzımnık peydalamaa eni kantrlamak sistemasını, angısı hesaba alsın üürenicilerin kendilik özelliklerini da motivlesin onnarı üüseltmää meraklılıını üürenmeyä, bilgi kabletmeyä.

Kullanılmış literatura.

1. Gagauz dili hem literatura: V- IX kl.: Национальный куррикулум / Анна Столетняя, Оксана Константинова, Лидия Юсюмбели [и др.] ; нац. коорд.: Анжела Кутасевич [и др.] ; нац. эксперты-коорд.: Владимир Гуцу [и др.] ; М-во образования, культуры и исследования Респ. Молдова. – Кишинэу: Lyceum, 2019 (F.E.-P. “Tipografia Centrală”). – 53 p.

2. Gagauz dili hem literatura: X - XII kl.: Национальный куррикулум / Анна Столетняя, Оксана Константинова, Лидия Юсюмбели [и др.] ; нац. коорд.: Анжела Кутасевич [и др.] ; нац. эксперты-коорд.: Владимир Гуцу [и др.] ; М-во образования, культуры и исследования Респ. Молдова. – Кишинэу : Lyceum, 2019 (F.E.-P. “Tipografia Centrală”). – 37 p.

3. Гузеев В.В. Оценка, рейтинг, тест // Школьные технологии. 2008. - № 3.

4. Воронцов А.Б. Педагогическая технология контроля и оценки учебной деятельности. -М., 2002.

5. Панюкова С.В. Использование информационных и коммуникационных технологий в образовании: учеб. пособие. – М.: Издательский центр «Академия», 2010.

6. Т.И. Шамова, А.Н. Худин, Г.Н. Подчалимова, И.В. Ильина, С.Н. Белова, С.А. Золотухин, И.Я. Благирева Современные средства оценивания результатов обучении. - М., 2005.

7. Задачи и функции педагогической оценки учебных достижений учащихся с особыми образовательными потребностями в условиях инклюзивного образования (melimde.com)

8. Современные средства оценивания в учебном процессе. Современные модели оценивания учебных достижений учащихся в России и за рубежом (peskiadmin.ru)