Встреча с работниками газеты "Замана"

«Замана»

газетала

агьлуличил гьунибаъни.

ГIяймаумахьи – МяхIячкъала – ГIяймаумахьи.

Нуша лебтанилра балуливан, бархIичиб бархIи газета-журналти, жузи дучIути адамтала лугIи камбикIули саби, хаслира гIергъиси манзил, дигарцад имкантачилси телевидениера телефонтира дакIудиубла. Хаслира жагьилти библиотекализи камли башули бирар, башалра, дарсличиб классла дурабси сягIятлис литературала учительли сегъуна-биалра жуз белчIахъес хъарбаралли. Ил багьандан, нушаб, нешла мезла ва литературала мугIялимтас, чевкъули саби бучIантас тамашадизести декIар-декIарти далдуцуни дурадуркIес. Илди сари бархIехъла гьибандиби, жура-журала абзла хIязани, поэтуни, писательтачил, издательствола хIянчизартачил гьунибаъниби, тамашала экскурсияби… ХIера, гьаларван нуша республикала «Замана» газетала редакциялизи гIяхIладли дякьунра. Илар рузуси нушала шан, газетала редакторла кумекчи ГIялиева Салимат БяхIямадовначил ва илала бархкьябачил къаршидикира. Ила нуша аркьниличила Салиматличил вягIдалра барибси ахIенри. Биалра, илди нушаб разили гьунибаиб, дархькадатурли чула дирути хIянчира, цалабикиб. Даргантала миллатличила, мезла кьадриличила, газетала ва художественная литературала кьадриличила бурули, ХIяжимурад Рабаданов, Патимат Кьурбанова ва Салимат ГIялиева гъайбухъун. ДурхIни гьанна бучIуси школализир сарира ручIули калниличила, З. БяхIямадовнани дарган мезличи сунезир гIелалаагар диги адикьниличила ва олимпиадабачи сари гIяхIил хIядурриахъес учительницани бируси къайгъиличила С. ГIялиевани бурухIели, дурхIни чула учительницачи тамашали хIербикIи. ГIяхIси ихтилат бетаур, сепайда, нушала вахъхIила тяниш МяхIяммад Рабаданов илди-ургав агни - халаси пашмандеш сабри. Редакцияла жаняхIлизи бухIнаахъибмад, дурхIнани илала суратличи пикри бяхIчиаиб, иш баягъи ит нушачи вакIибси поэт сайгу или, вагьур. ХIянчизарти дебали разибиуб илар черяхIкахъибти поэтуни-писательтала, журналтала ва газетала редактортала суратунира дурхIнани дагьурхIели. ГIур дурхIнас багьес дигули ахъиб чини ва сен-сен газета хIядурбирусил, печатьлизиб дурабулхъусил. Нуша газета балкьарахъуси кабинетлизи дукира ва илаб бузути хIянчизартала бузериличил тянишдарра.

ГIур нушаб халаси баркаллара багьахъур, гьанбиклис суратунира кадяхъира.