Кашни çыннăнах пурнăçри малтанхи утăмĕсем учитель ячĕпе çыхăннă. Вăл ăс пани, тимлесе ăнлантарни яланлăхах пирĕн асăмра. Унăн сывлăм пек таса, чĕререн каланă сăмахĕсем кирлĕ вăхăтра хавхалантараççĕ, синкерлĕхре чĕрĕ вăй кĕртеççĕ, çунат хушаççĕ. Вĕрентекен кирек хăçан та хисеплĕ, ыттисенчен çÿллĕрех картлашкара тăракан çын пулнă. Тен, çавăнпах та пулĕ, эпĕ вĕрентекен профессине суйласа илтĕм те пулĕ. Шкул пĕтерсенех И.Я.Яковлев ячĕллĕ педагогика институтне çул тытрăм , кĕçĕн классен учителĕ пулса тăмăм. Тепĕр 16 çултан  вара шăпа И.Н.Ульянов ячĕпе хисепленекен Чăваш патшалăх университетне илсе çитерчĕ. Унтан  вĕренсе тухнăранпа та  нумай шыв-шур юхрĕ. Иккĕмĕш хут алла диплом илнĕ чухне эпĕ хам чăваш чĕлхипе литератури, тăван халăх, анне чĕлхине вĕрентекен пулни мĕн тери яваплине, тен, ăнкарсах та çитереймен пулĕ. Çулсерен, ĕç опычĕ ӳссе пынă май, çĕнĕ ĕç мелĕсем шыранă май тăван чĕлхене вĕрентни мана савǎнăç кӳни, манăн суйлав тĕрĕс пулни çирĕпленсе те çирĕпленсе пычĕ. Çавăнпа эпĕ педагог профессине чун туртăмĕпе суйласа илнĕ тесе калас килет.