Адыгэхэм я махуэм теухуауэ

Бзэм хуэсакъыр,зэманым ток1уэ

И бзэм хуэлажьэр,ар лъэпкъ уахътыншэщ.

Щоджэн Леонид.

Налшык къалэ администрацэм егъэджэныгъэмк1э и Департаментым,къалэ еджап1эхэм щек1уэк1ащ Адыгэхэм я махуэм теухуа фестиваль-зэпеуэр.Зэпеуэр фок1адэм и 17-м щыщ1эдзауэ и 28-м нэсыху ек1уэк1ащ.Еджап1э къэс я егъэджак1уэхэм а махуэхэм щагъэлъэгъуащ дерсхэр,ирагъэк1уэк1ащ классщ1ыб лэжьыгъэхэр,еджак1уэ ц1ык1ухэм я 1эдакъэ къыщ1эк1а гъэлъэгъуэныгъэхэр хуагъэпсащ сурэт щ1ыным,сочиненэ тхыным,бзэм усэ хуатхыным,пасэм щыгъуэ адыгэхэм я1а псэук1эр на1уэу щ1ауэ утыку къилъхьэным.Къэпщытак1уэхэр зыхэплъа лэжьыгъэхэм я нэхъыф1ыр фестиваль-зэпеуэм къашащ.Налшык къалэ дэт 32-нэ еджап1эм фок1адэм и 28-м нэхъыф1у къалъыта лэжьыгъэхэр утыку ирашащ,пшыхь дахащэ щек1уэк1ащ.Пшыхьыр къызэзыгъэпэщар департаментым и лэжьак1уэ,адыгэбзэр зи гупсэ Л1ы1эщын Людэщ.Кърихьэл1а дэтхэнэми псалъэ гуапэк1э зазыхуэзыгъэза Люда и псалъэхэм къызэрыхэщамк1э,адыгэбзэ езыгъэдж дэтхэнэми и лэжьыгъэк1эщ пшыхьыр зэпэщ1 щ1эхъуам и щхьэусыгъуэр,еджак1уэ ц1ык1ухэрщ къэк1уэнур зэлъытар.Адыгэбзэр ягъэбзэрабзэу адыгэпсэр зыгъэтыншын ц1ыху хъуну сабийхэм хъуэхъур яхуигъэпсащ Л1ы1эщыным. Адэк1э пшыхьыр къызэ1уахащ Кенжэ къуажэ дэт е 20-нэ еджап1эм щылажьэхэу Унэжокъуэ Тимуррэ Заремэрэ я къэфак1уэ гупу «Шагъдийм».Къафэ дахащэу абыхэм ягъэзэщ1ам псалъэ дахэк1э пежьащ пшыхьыр езыгъэк1уэк1а Махуэл1 Беслъэн.Беслъэн жи1а псалъэхэм пищащ Гъашэ Альберт.Гум къи1ук1 макъ гурыхьык1э Налшык къалэ хуэгъэпса уэрэдыр жи1ащ абы.Кърихьэл1ахэри 1эгуауэк1э пежьащ Альберт.46-нэ сабий садым и гъэсэнхэмрэ егъэджак1уэмрэ «Дадэ и уэрэдри» щагъэ1уащ.Бэракъ Тимур,Ц1элий Данателла сымэ ягъэзэщ1а къафэрэ адэк1э къык1элъык1уащ.Адыгэпсэ зы1ут,адыгэл1 нэс щ1алэ ныбжьыщ1э Бэрбэч Ахьмэд и «Цей» усэм гулъытэ лей хуащ1ащ пшыхьым щ1эсахэм.Къэфак1уэхэу Къудей Аленэрэ Дианэрэ усэбзэм дыкъыхашри,адыгэм и псэм хуихь къафэ дахащэр дагъэлъэгъуащ.Ещанэ еджап1эм и еджак1уэ 1эрыпщ Дамир «Сы-адыгэщ» усэр апхуэдизк1э гум дыхьэу жи1ати,едэ1уахэр щыту 1эгу хуеуащ.Фестивалыр ягъэщ1эрэщ1ащ балъкъэр лъэпкъым къыхэк1а,езанэ гимназием и еджак1уэхэу зэкъуэшыт1 Масукаев Ислъамрэ Залымрэ.Урысыбзэк1и 1уащ Щоджэнц1ык1у Адэм и усэ «Красота».Жызы1ар-Майская Людмилэщ.Адыгэм и гум къыщеуэр,хьэжрэт гъащ1эу псэу адыгэхэм теухуа усэр игъэ1уащ е 20-нэ еджап1эм и еджак1уэ Л1уп Алинэ.Е 12-нэ еджап1эм и гъэсэн Урыс Алан «Си бзэ,си псэ-си дуней» уэрэдымк1э пшыхьым къыпищащ.Чэтыкъуэ Камиллэ Нало Заур и усэм къеджащ.Епщык1узанэ еджап1эм и гъэсэн Сэбан Алихъан бэрэбаным и макъыр хуабжьу игъэ1уащ,лъапэрысэри трищ1эжащ.Пшыхьыр макъ дахэк1э зэхуищ1ыжащ «Си Къэбэрдей» уэрэдым.Ар игъэзэщ1ащ хьэщ1эу пшыхьым къеблэгъа Къущхьэ Ларианэ. Л1ы Маф1э