6 классын коми литератураысь «Литература гижöдын портрет» восьса урок.

Старцева Эльвира Александровна,

коми кыв да литература велöдысь

Ыджыдвидзса шöр школа

Кöрткерöс район Республика Коми

6 классын коми литератураысь восьса урок «Литература гижöдын портрет».

6 класс. Ю. Васютовлысь «Шондіа вой» повесьт велöдöм.

«Литература гижöдын портрет» восьса урок нуöдігöн мыджсьöма литература технология, ТРКМЧП да ворсан технология вылö. Найö «отсалöны восьтны» текст лыддигöн шöр геройяслысь пертассö.

Уроклöн мог:

1. Сетны тöдöмлун, мый литература портрет тöдмöдö геройкöд, ловзьöдö сійöс миян син водзын.

2. Велöдны пыдіджыка гижöд портрет пыр тöдмасьны литература геройкöд, портрет отсöгöн тырвыйö гöгöрвоны геройлысь оласног.

Дöска:

Ю.Васютовлöн портрет, Саша Чекалинлöн портрет, «Шондіа вой» повесьт серти серпасъяс, «Шонді» серпас.

1. Урок заводитчöм

1. Бур лун, дона челядь, пыдди пуктана уджъёртъяс! Талунъя луныс зэв нин аслыспöлöс шань да мича. Ми радöсь, мый миян урок вылын та мыйта ёрт, гырысь и посни. Сідзкö, шоныда нюммунам öта-мöдлы, сиам быд бурсö да заводитам уджавны.

2. Урок дорö челядьöс дасьтöм

Дона челядь, а збыльысь-кö, радейтанныд-ö ті лыддьысьны? (Вочакывъяс)

Кыдз ті чайтанныд, кутшöмöн должен лоны радейтана нига? (мича серпаса, интереснöй, велöдана…)

А эм абу кодлöнкö гижöд герой, кодкöд ті кöсйинныд ёртасьны, мыйкö сылысь, гашкö, бурсö босьтны аслыныд пример вылö? (вочакывъяс)

Велöдысьлöн кыв

Збыльысь кö, важöн нин ме казялі, мый кор челядь либö весиг верстьö йöз лыддьöны сійö либö мöд небöг, лыддьысигмозыс радпырысь любуйтчöны книгаö вайöдöм серпасъясöн, видзöдалöны художникöн серпасалöм герой портретъяс, и тшöкыда оз лыддьыны, кольöны лыддьытöмöн!!! дзонь абзацъяс, кор казялöны книгаысь авторöн вöр-ва серпасалöм, керка пытш серпасалöм либö жö весиг гижöдса геройöс кывйöн серпасалöм (портрет). Зэв жаль сэтшöм йöзыс.

Ті юаланныд, мыйла?

Да сы вöсна, мый найö гижöд лыддигöн тайö колялöмнас оз аддзыны кутшöмкö зэв колана юöр, оз казявны тыр-бура геройсö, геройлысь пытшкöсса сьöлöмкылöмсö, авторлысь герой вылö видзöдлассö.

- Тіян лыддьысигöн сэтшöмыс овлö оз, челядь? (Вочакывъяс)

Молодечьяс найö, кодъяс лыддьысянныд тöлкöн-ладöн. Öд кывъя портрет вöчö геройöс вынаджыкöн, ми сійöс пыр жö казялам да аддзам, кутшöм сійö: и ортсы серпас серти, и пытшкöсса оласног серти.

Ми тіянкöд тöдам, мый быд герой аслыспöлöс, быд геройлöн аслас сёрни да оласног. Мый серти ми нöшта тайöс ставсö вермам казявны? ( Геройлöн портрет пыр).

Сідзкö, уроклöн темаыс кыдзи кутас юргыны? (Литература портрет)

3. Урок тема

Восьтам тетрадьяс, гижам талунъя лун. Талун миян ода-кора тöлысь дас коймöд лун. Помнитам, литература вылын ми сійöс пасъям лыдпасöн.

А сэсся гижам урок тема

«Литература гижöдын портрет».

Сідзкö, ми урокнымöс заводитам: «Мый сэтшöмыс портрет?» юалöмöн.

Уроклöн могъяс. Уроклöн мотивация.

Кыдз ті чайтанныд, кутшöм кывкöртöдöдз ми воам тіянкöд урок помын?

Талунъя урок вылын ми воöдчам кывкöртöдöдз «Мый сэтшöмыс гижöд портрет? Мыйö велöдö миянöс гижöда портрет гöгöрвоöм ».

4. Уроклöн шöр юкöн.

А. Видзöдламöй коми-роч кывчукöрö, коді тіян пиысь тэрыбджык, 515 л.б.

-Ми аддзам, мый

Портрет – тайö

-портрет

-бура артмöм портрет

-коми гижысьяслöн портретъяс

-портрет серпасалысь – портретист

Да, этша тöдчöдöма. Абу тырмидз.

Б. Кыдз тi помнитанныд, тiян гортса уджнад вöлi лыддьыны «Коми литература» учебникысь, мый сэтшöмыс портрет и пасйыштны тетрадьö . Кодi миянлы лыддяс дженьыдика.

«Коми литература учебник» миянлы висьталö, мый -

Сiдзкö, «Портрет – тайö гижöдлöн юкöн, кöні серпасалöма геройлöн ортсыыс: тушаыс, чужöмыс, паськöмыс, ветланногыс».

Тшöкыда портрет отсöгöн автор тöдмöдö лыддьысьысьöс геройкöд, ловзьöдö сійöс миян син водзын.

Но колö тöдны, мый портрет вывті шоча пасйö геройлысь сöмын ортсы мыгöрсö. Дерт жö, сійö восьтö геройлысь пытшкöсса олöмсö, отсалö гöгöрвоны сылысь морттуйсö.

Юрий Константинович Васютовлöн «Шондіа вой» повесьтын паныдасьлысь портретъяс ясыда висьталöны геройяслöн этш да сям йылысь.

Вайö медводз петкöдлам тіянкöд повесьтысь дзöляник юкöн.

Петкöдчöм бöрын! Практическöй удж.

Аттьö, донаяс, геройяскöд тöдмöдöмысь.

Ті, навернö, казялінныд нин, мый дöска вылын кык фото-портрет кындзи öшалöны и кывйöн гижöм кабалаяс-гижöд юкöнъяс-портретъяс. Сэтшöм жö листыс и тіян пызан вылын. Тöдчöда, гижöдыс быдöнлöн дзик öткодь. Ті петкöдлінныд 10 геройöс, тіян лист вылын дас геройлöн жö кывйöн серпасалöм портрет. Корсьöй ассьыныд геройнытö лист вывсьыс (кодöс петкöдлінныд миянлы). Аддзöм бöрын зіля петам дöска дорö да босьтам ассьыным кабаланымöс. Гöгöрвоинныд?

Сідзкö, уджалам. Видзöдлам, коді тэрыбджык?

Мыйöн босьтім ассьыным юкöн, пока мукöдыс корсьöны-мöвпалöны, кöні сылöн кывъя портретыс, прöста ог пукалöй, а асланым лист вылö, воддза столбикас, пасъялам геройяслысь нимнысö.

Велöдысь: (Мыйöн ставöн аддзисны да босьтісны).

Сiдзкö, ми нин тöдам, мый портрет

-медводз, вермö серпасавны сöмын геройлысь ортсысö: туша, чужöм, паськöм.

Зіля видзöдлам, кутшöм геройясöс тадзи серпасалöма?

-Лыддям гораа (лыддьöны Унтер Гень, Аннуш, Борис Политов)

Сёрни сöвмöдан юкöд

Бур. Дона челядь, вайö öтвылысь уджыштам:

-Медым миянлы гöгöрвоанаджыкöсь лоöны тайö геройясыс, кыдзи, кутшöм кывъясöн автор серпасалöма тайö куим портретсö? Кутшöм серпаса кывъяс сэтчö вайöдöма?

-Мичкывъяс (эпитетъяс).

-Правильнö. Мичкывлöн юалöм? Кутшöм?

Орччöдöмъяс (сравнение).

Заводитам, Лёня Томов серти, медмича нывсяньыс, Аннушсянь.

Кутшöм сійö? (Челядьлöн вочакывъяс)

Сэсся вуджам Унтер Геньö да Борис Политов дінö. Кутшöмöсь найö?

(Челядьлöн вочакывъяс)

Сідзкö, тайö куим геройыслысь портретсö видлалöм бöрын, кутшöм кывкöртöд ми вермам вöчны?

- Мый портрет серпасалігöн миянлы колöны мича серпаса кывъяс, тані мичкывъяс да орччöдöмъяс.

-Водзö вайö вуджам Лёнялöн мам да баб дорö. Мыйла, кöть и тані тожö бура – уна сетöма портретас ортсыса видсö, торйöдам найöс Унтер Гень, Аннуш да Борис Политов дорысь?

-Правильнö. Тані содтöд серпасалöма и налысь оланногсö, олан этшсö.

-Кутшöмöсь нö найö?

-Мам: … лабутнöй сёрниа да сэтшöм жö вöраса, сійö, кажитчö, эз и тöдлы ки-кокыслы мудзöм, миянысь водз эз водлы, миянысь сёрöн эз чеччыв, эз кö нёрпав…

Кыдз ми тайö кывъяссö шуам? Эз тöдлы, эз водлы, эз чеччыв, эз кö нёрпав?

-Правильнö, соссяна кадакывъяс.

-Кыдз ті чайтанныд, мыйла тані сы мыйта соссяна кадакывйыс?

-Медым петкöдлыны , мый Лёнялöн мамыс кöть и вöлі висьлöс, но та вылö видзöдтöг, век пессис-уджаліс мукöдыскöд тшöтш. И гашкö сы вöсна, мый помтöг кужис ассьыс челядьсö велöдны сöмын бурö: эн гу (эн гусясь!)

Некор оз ылав пармаад, некутшöм компас весиг оз ков.

-Менам чайтöм серти, кывкöртöднас мамлöн портретын лоö медбöръя сёрникузяыс «Некор оз ылав пармаад, некутшöм компас весиг оз ков».

Компас йылысь урчитігöн кутшöм кывсикасöн сетöма содтöд вын авторыс мамыслы?

-«Некутшöм» нимвежтас. Сикас серти тайö кутшöм нивежтас? Соссяна.

Сідзкö, мед петкöдлыны мамыслысь бура вöр тöдöмсö, автор вынаджыкöн тайöс тöдчöдö – «некутшöм»- соссяна нимвежтасöн.

-Баб: …небзьысь сьöлöма да крепыд сьöлöма вöлі морт. Аслас внукъяскöд вöлі сэтшöм жö, кутшöм и вöлöма ныла-пиянсö быдтігöн. Эз лыддьысь, кодлöн: сылöн кö керкаын, сідзкö, аслас… Кöть вöлі коми, но радейтіс рочасьны. Том дырйиыс неуна олыштöма манастырын.

Тетрадьын удж

-Ноко, уджыштам тетрадьын. Тіян мог, видлавны баб портретысь нимвежтасъяссö сикас серти. Кутшöмöсь найö?

-сэтшöм (индан)

-кутшöм (юалан да йитöса)

-кодлöн (юалан да йитöса)

-сылöн (морта)

-аслас (вынсьöдан-морта)

Сідзкö, кутшöм кывкöртöд ми вермам вöчны тіянкöд öтвылысь?

-Медым петкöдлыны баблысь этшсö (характерсö), баблысь вынсö, автор вайöдö зэв тöдчана нимвежтасъяс. Тайö нимвежтасъяснас сійö быттьö йитö ассьыс пöрысь геройсö томъясыскöд, вынсьöдö на костын олöм вылö видзöдлассö.

5. Физминутка

Шойччыштан здук

Баля-Валя

- Валя, лок вай мачöн ворсам.

- Колö баляясöс корсьны.

- Лэччам купайтчыны, Валя.

- Баксö турун сеттöг баля.

- Баля-Валя, Баля-Валя,

Ёмаыд тай уджнас тальö.

Тшыгйöн видзö лун и вой,

Ачыс, дерт жö, нем оз сёй.

Кор нин воас Вермöм лун,

Медым ставлöн – рушку дун!?

(Серамбана кывбурлöн авторыс- Э.А. Старцева)

Баля-Валя, лыддьы ассьыд лист вылö вайöдöм портрет серпастö.

«Сирöта, быдмис ичинь дорын. Мамыс кулöма, кор сылы вöлöма вит арöс».

Кöть Баля-Валя и збыль ёнасö эз слöймыв челядькöд ворсыны-котравны, ми тіянкöд тайö визув нывкаыскöд öтвылысь шойччыштам.

Зіля сувталам партаяс дорö. Ме кута висьтавны Баля-Валя портретысь кывъяс. Тіян мог: мукöдысь водзджык тöдмавны, кутшöм сійö кывсикас, да лэптыны ки. И сідз, заводитам.

Сирöта – эмакыв

Быдмис – кадакыв

ичинь дорын – кывбöра эмакыв

Мамыс – эмакыв

кулöма – кадакыв

кор – кывйитöд

сылы – нимвежтас

вöлöма – кадакыв

вит – лыдакыв

арöс – эмакыв

-Молодечьяс. Дона челядь, а кыдз ті чайтанныд, мыйла резина мач местаö ме босьті дöра мач?

-Сы вöсна, мый война кадö, важöн, резина мачьяс эз вöвны, челядь ворсісны либö ас вöчöм сюмöд мачöн либö жö дöра мачöн. Бур.

И сідз, тані нин Баля-Валя портрет серти ми тöдмалам, кутшöм сьöкыд вöлі сылöн челядьдырыс. Мыйла? (Вочкывъяс)

Кутшöм кывкöртöд ми вермам шуны?

-Портрет восьтö Баля-Валялысь пытшкöсса олöмсö.

6. Котырын удж

Медым казявны тайöс и мукöд геройяс портрет пыр, зіля юксям куим котыр вылö да

1 котыр видлалö Веня Малыгинöс

2 котыр видлалö Глафираннаöс

3 котыр видлалö Томов Лёняöс

Уджалам кык минут. Сы бöрын висьталам ассьыным кывкöртöд: кыдзи портрет тöдчöдö тайö геройяссö. Помнитам, мый портретын геройлысь ортсысö ставнас серпасалöм пыдди автор вермас пасйыштны сöмын öти, но зэв тöдчанатор.

7. Котырын удж прöверитöм

Челядь сёрни:

1-

2-

3-

Аттьö, бöр пуксям асланым местаясö.

Кодöс медся этша кывйöн вöлі пасйöма тані? (Лёна Томовöс).

Кыдз чайтанныд, мыйла? (шöр герой, петö вöчöмъясысь, автор отношениеысь, герой сёрниысь, лыддьысьысь ачыс мöвпалö – юрас ловзьöдö, кутшöм сiйö – Лёняыс).

Нöшта öтчыд видзöдлам дöска вылö. Кутшöм портрет тіянöс тані шензьöдіс, быттьö абу скодитана миян уроклы?

-Правильнö, зонка портрет чуймöдö.

-Кыдз чайтанныд, кодлöн тайö портретыс?

-Правильнö, тайö Саша Чекалин. Мый ми тöдам Саша Чекалин йылысь «Шонді вой» повесьт серти?

-Бур. Колокö, кодкö мыйкö вермас нöшта содтыштны? (Арсений)

-Молодеч, Арсений. Мый аддзöмыд кад содтöд лыддьысьыштны.

-А кыдз ті думайтанныд, кор ті петкöдчигад галстукасинныд, мыйла Никиталöн пызан вылас эз вöв галстукыс? Öд кор ми тренируйтчим кöртавны галстук, сійö öтвылысь тіянкöд кöрталіс, мукöд дорсьыс бурджыка на артмис.

-Сы вöсна, мый Бузук Сень эз вöв пионерöн.

-Правильнö. Бузук Сеньöс эз примитны пионерскöй отрядö. Но портрет серпас сылöн тырвыйö гижöма. Лыддям.

-Кыдзи ті гöгöрвоанныд бöръя сёрникузясö «И киа-пода вöлі мортыс».

-Корсям «киа-пода» кывлысь вежöртассö кывчукöрысь. Коді тэрыбджык? (270 л.б.)

-Правильнö. Сідзкö, Бузук Сень вöлі мастер мортöн, кыдзи повесьтас гижöма «Пыр мыйкö вöчалö-вöлалö, кералö…».

-Кыдз ті чайтанныд, челядь, мед кö Бузук Сень челядьдырйиыс вöлі и тышкасьысьöн, лёка велöдчис, ёнасö некодкöд эз ёртасьлы, но «киа-пода» морт гырысь олöмас вошас оз?

-Кöнешнö жö, оз. И ми, кодъяс бурджыка, сьöлöмсяньыд лыддинныд повесьтсö, аддзинныд тайö кывъясыслы подувсö:

-Öні, уна во мысти, мем кажитчö, мый примитісны кö сэки Сеньöс пионерö, гашкö, сійö и вежсьыштіс неуна. Öд лоис жö сійö верстьöнас мортöн, код йылысь омöль кыв шуны грек.

А мый портретыс сылöн, ортсы серпасыс, абу зэв сьöлöм серти быттьö, да öд война кад, челядь да гырысь йöз олісны тшыг нисьö пöт, лун да вой уджалісны, тылын пессисны-мыркисны сьöкыд помасьлытöм удж не сöмын ас радиыс, но ёнджыкасö, позьö шуны, войнавывса салдатъяс вöсна, медым налы мыйöнкö отсыштны: «Ставсö фронтлы! Ставсö Победалы». (петкöдлыны серпасъяс)

Сідзкö, кутшöм кывкöртöдъяс ті вöчанныд талунъя урокысь?

8. Кывкöртöд

Челядь сёрни:

1-

2-

3-

9. Гортса удж

Восьтам дневник да гижам.

Гортса удж позьö вöчны бöрйöм серти.

1. Öти-кö, тетрадяныд серпасавны кажитчана геройлысь портретсö. И мед ми эськö бытьöн гöгöрвоам тіян серпас серти, кутшöм тайö герой, кодöс ті серпасалінныд.

-Сідзкö, челядь, кодъяс тіян пиысь бöръясны тайö гортса уджсö, кыдзи тіянöс позяс нимтыны?

портретист

2. Мöд-кö, кыдзи и ме, верманныд гижыштны неыджыд кывбур кутшöмкö герой йылысь, мед восьтны кывбур пыр сылысь морттуйсö.

Та дырйи ті кодъясöн лоанныд? Гижысьясöн.

10. Рефлексия

Ті адданныд дöска вылысь югöръястöм Шонді.

А тані со пызан вылын вошöм югöръясыс. Найö разнöйöсь, дженьыдöсь да кузьöсь. Ставыс кö тіянлы талунъя урок вылын вöлі гöгöрвоана – босьтам кузьсö, колины кö юалöмъяс – босьтам дженьыдсö. Мездам мича шондісö асланым югöръясöн

11. Аттьöалана здук

Аттьö урокысь.

Талун быдöнлы позьö пуктыны мича «пять». Сідзкö, ті пуктанныд сійöс асланыд дневникö, а ме тэча журналö. А öні нöшта öтчыд шоныда нюммунам öта-мöдлы да петам классысь шойччыштны.

Вöдитчан литература:

Лимерова В.А. Коми литература: 6-öд класслы велöдчан да лыддьысян небöг.- Сыктывкар: ООО «Анбур», 2016.

Содтöд 1

10