Бәйрәмең белән, башкалам!

Бәйрәмең белән , башкалам !

( Казанның 1000 – еллыгына багышлана )

Бисмилләхи диеп , тәвәккәлләп

Менеп утырдым иләмсез зур

Коточкыч җайланма – әйләнгечкә –

Туктамый торган тәгәрмәчкә

Мәшһүр Казанны күзәтергә.

Әкрен - әкрен өскә күтәреләм ,

Ә башымда – уйлар шаукымы

“ Шүрәле”дә ,атракционда без ;

Аста кайный халык ташкыны –

Мин кул изим пыяла аркылы.

“ Ләхәүлә”не укып ,күршем белән

Күтәрелдек соңгы ноктага

Беравыкка өнсез калып тордык :

Куркыта бит һич тә тикмәгә ,

Тиктомалга баш та әйләнә.

Шөкер , кризис үтеп китте бугай ,

Күз йөртәбез дөнья буйлатып

Кычкырасы килә бар Казанга

Муен тамырларын уйнатып :

“ Саумы ,Казан ! Син таң калырлык ! “

Меңьеллыкка зур хәзерлек бара :

Яңарталар һәрбер почмакны

Оста куллы тырыш халкым минем

“ Батыр йөрәк “ булган һәр чакны

Яулар күргән үзе ничаклы...

Гүзәл Сөембикәң , Кол Шәрифең ,

Мәрҗаниең исең китәрлек !

Тарихларда калды Мусаларың

Килер буыннарга җитәрлек

Каһарманнар булып яшәрлек !

Тарих тәгәрмәче әйләнгәндәй ,

Әйләнә күчәрле җайланма ...

Уйланырлык тарихың ,таш калам ,

Син Казаным - бөек башкалам !

Бәйрәмең белән котлап баш кагам .