"Баяртай, түрэл һургуулимнай"

Булта магган нэрлэмээр,
Буряад манай Һургуули,
Шинии үндэр сонхонууд
Сэлмэг, сэбэр, наруули.

Эрдэм номоо үзүүлжэ,
Эдиршүүлээ жаргуулнал.
Дабшан ерэhэн бидэндэ
Далинуудые ургуулнал.

Н.Г. Дамдинов

Баяртай, минии һургуули.

Арбан нэгэн жэлэй саана Буряад Уласай үндэһэтэнэй 1-дэхи лицей интернадай богоһо алхажа ороһон хөөрхэн жаахан хүүгэд - мүнөө бэрхэ, ухаатай хүбүүд басагад түрэл һургуулитаяа хахаса сагнай ерэбэ.

Буряад араднай хэр угһаа хойшо өөрын һайхан ёһо заншалтай, түүхэ соёлтой, үнэр баян үндэһэн хэлэтэй гээшэ. Манай һургуули өөрынгөө үндэһэн хэлэеэ мартангүй дээшэнь үргэжэ ябадаг юм. 11 жэлэй хугасаа соо би   түрэл һургуулидаа буряад хэлэ би литератураар олимпиада, буряад хэлэнэй электрон номоор, шүлэгэй ба дуунай мүрысөөнүүдтэ эдэбхитэйгээр хабаадаһан байнаб. Мүнөө сагта хадаа олон хари хэлэнүүдые үзэдэг болоошье һаа, өөрынгөө түрэл буряад хэлэеэ мартангүй, хаанашье байгаа һаа сэдьхэл соогоо һанажа ябаха хэрэгтэй.

Һургуулиин хаһа ехэл хүхюутэй саг. Һурагшадай ажа­байдал ехэ һонирхолтой. Элдэб янзын кружогууд бай­ха, мүрысөөнүүд, урилда­анууд эмхидхэгдэхэ. Манай багшанар булта һайн һанаатай, эрмэлзэл ехэ­тэй, эбтэй эетэй.

Иигээд лэ һургуулитаяа, суг һураһан нүхэдтэеэ хахасахаб гэжэ һанахада гунигтай. Гэбэшье урдамни шэнэ арга боломжонууд нээгдэнэ, ажабайдалай шэнэ шата эхилхэ гэжэ ойлгоходоо баяртайб.

Багшанартаа баярые хүргэнэб, суг һураһан нүхэдтөө бүхы зорилгонуудаа бэелүүлхыень хүсэнэб. Дүүргэжэ байһан нүхэдни булта дээдэ һургуулинуудта орожо һураха гэжэ бата найданаб. Зүгөөр шухалань гэхэдэ, һайн лэ хүнүүд болог лэ даа.

Сагай үнгэрхэдэ, Һүүлшын хонхын һайндэрые уяран дурсадаг байхаб гэжэ һанагдана. Түрэл һургуулияа, багшанараа, суг һураһан нүхэдөө хэзээдэшье мартахагүйб.  Ямаршье газарта хүдэлөө һаа, түрэл һургуулиингаа нэрэ үргэжэ ябахаяа оролдохобди.