Фазу Г1алиевалъул «Кини» абураб хабаралда т1асан Пьеса.

Фазу Г1алиевалъул «Кини» абураб хабаралда т1асан

Пьеса.

«Кини»

Рагъул заман, Хунзахъ базар.

Иш лъугьуна Ват1ан унго-унгояб ц1адулъ бугеб к1икъоялда лъабабилеб соналъул их.Доб къоялъ къададаса бахъун арбабашги босун,бекьизе ролъухъ гьеб хисизеян базаралде унел рук1ана эбелги ясги.

Гъорлъ г1ахьаллъи гьабулел чаг1и.

1.Халун – ункъачо.

2.Фазу (гьит1инаб мех)-Яс.

3.Фазул эбел.

4.Меседо.

5.Базаралда г1адамал.

Эбел.

Балагье 7 метра бугеб арбабашин дир гьаб ,ролъухъ кьолеб буго, учузго хисила.

Яс.

Эбел , нилъер гьалде аск1ове чиго къалев гьеч1ин рилълъа рокъоре.

Эбел.

Вуй, гьадай Халун гурейищ? (ан абула эбелалъ ясалдаги тункун)

Яс .

Халун ункъачо йиго валлагь. (ан абула ясалъ, бет1ерги борхун).

Базаралда гъункун рук1арал руччабаз, к1ийиде рикьунги ун, нух кьолеб бук1ана Халуние.

Эбел.

Щиб бах1арчилъиха бук1ине кколеб, гьезда цеесан баччун кинигун ине ккани.. Кинал лъимал гьари ,гьел киниялда рущин бук1унеб, къо бахъанаг1ан росулъе рагъдаса рач1унел ч1ег1ер барал кагъталги рук1аго.

Яс.

Г1адамазухъги балагье, эбел, цо х1икмат бихьараб г1адин, кинабго рахъалъан гьелъухъ ралагьун ч1ч1ун ругин..

Эбел .

Мундай , гуродаян ялагьун хут1ун йик1ана,Халун, дун саг1ат лъик1аб батаги, нилъер росулъ лъимаде вугев чиг1аги щив?

Халун.

Унго, балагье гьайбатлъи.К1ахъа кинал гьарулев Асадулагь лъалагури дуда?.Довги ц1акъ херлъун вихьун,бадиса канлъи ун квердаса махщел бахъун хут1аниян, досде ругьел бан бук1ана.Чурич1ел квераца гьабураб г1адаб киниялда Закарил лъимер бущине бокьилищха!Гьале ругьел добе щванаян ккелалде кини бач1ана.Х1абсат йигоан абулей,гьаб к1иябго лъабабго соналъ кини гьабеян абулев чиги вахъинч1ого,урхъун холев вук1ун вугин вуц1аризеян.Байбихьаралдаса нахъе лъуг1изег1ан цо лах1заталъ ч1оларин гьевилан.

Эбел.

Лъик1аб кини буго (цосинай г1адаллъунцин гуродай Халун йиго –ян пикру гьабуна гьалъ, х1инкъарай г1адин Халунихъги балагьун.)

Халун.

Т1адагьлъи бихьизе, балагье, гьит1инкилщица кодобе босила(ян килщидаги бан хьваг1езабула Халуница кини)

Яс.

Бет1ерисаги х1ат1алисаги киниялъул к1амурабазул берцинлъи, бит1ахъе т1еренал куназул гуржаби хьухьарал г1адин руго.

Эбел.

Т1ад кварт1а к1ут1изе бак1 гьеч1о.Гьай ющараб киниги гъосха гьабун бук1араб.(ан ясалдехун квер бит1ула)

Халун.

Вуй, лак бахараб гуреб,лажбаралъ белъинч1еб, бакъинеган добе –анибехун квер лъулъаниги, цо лъехъел къаларо!Кинг1агидай гьадинаб т1аг1ел гьабула?

Эбел.

Маг1ги кьбуларебха цониги, цоцалъе ц1улги биччан щула гьабун гурони, (ян абула эбелалъ руккелал гьарун бак1-бак1азда ч1ун,щурщудулел руччабазда берги реч1ч1изабулаго.)

Аха,Халун, Закаригиги рагъдаса т1ад вуссун, гьессие васги гьавун,гьев киниялда вущунеб къоги лъик1 бихьаги (ургънго г1адин, ах1ун абула)

Цо къоялъги жаниб гьуриги бахъун, маг1ида хут1угеги гьеб.

Халун.

Свенек щвелародаяй босизеянха дун базаралдаса йилълъун йик1арай,Гьац1алухъа Хирачил ч1ужу йик1унаан кидаго чит1ир гьабун росун гьел ричуле1, бокьани васасул, бокьани ясалъул,чанц1ул свераниги ятич1о.

Эбел.

Халун,Хирачгчги рагъде ана, свенек щвеч1ого, Закарил лъимерги бущинч1ого хут1улеб бугони, дун сордо бахъун Лъаг1илухъе ина, гъова нижер гьоболас г1адал свенкал лъицаниги гьаруларо(кодобеги босун, кини Халунихъе кьола эбелалъ)

(Жеги т1убан Халуница мугъ бан бук1инч1о, лъабго_ункъо ч1ужу эбелалда аск1оре рач1уна)

1 сей ч1ужу.

Вуй ,Халунил вас рагъде инч1огонищ?Гьаб бак1алда цониги къварилъи къулч1ич1ей ч1ужуг1адан гьеч1о,кини учу-чу гьабизе ,базаралде гьай яхъине ккани.

2 лей ч1ужу.

Вабабай, хирияб сордоялъ панкъида бахине нах гьеч1еб къаг1ида гъолъул бот1рода жаниб, лъимер гьабуниги цогиязда бицинч1ого, балъго- г1ат1го гьабун теларищ ц1одорав чияс.

3-лей ч1ужу.

Базаралде г1ак1а ах1изе яхъарай г1адин, баччун кинигун сверулей йиго.

Эбел.

Гьагъалъулги цох1о жо, гагудал хоно,эменги гьеч1ого цох1о жиндицаго г1езавурав, т1оцебесеб къоялъго рагъде арав,хабарги гьеч1еб(эбелалъул бадиса маг1у бач1уна) Хьулалъул къвач1а халатабин абуларищха.

1сей ч1ужу.

Вабабай, пакъир!

2лей ч1ужу.

Т1убагиха гьелъул мурад,гьевги нижералги киналго т1ад руссун, кинабазул ургъалида хут1аги киналго!