"Gurbaga we içýan" erteki

Gurbaga we içýan

Bir bar eken, bir ýok eken, bir gurbaga bar eken. Gurbaga suwdan çykyp duran wagty, onuň ýanyna bir içýan gelipdir-de:

− Eý, gurbaga, gel, ikimiz dost bolaly − diýipdir.

Gurbaga oňa:

− Bolýar, bolsak bolaly. Men hem suwuň içinde gezip ýadadym. Belki, seniň bilen gury ýerlere gezmäge gideris − diýip aýdypdyr.

Soň bu ikisi tirkeşip barýarkalar, olaryň öňünden içi akar suwly bir ýap çykypdyr.

Şonda içýan:

− Gurbaga dost, indi sen meni şu ýapdan göterip geçirmeseň, men-ä geçip bilmen − diýipdir.

Onda gurbag:

− Bolýar, dost, men seni arkama alar-da, ýabyň aňyrsyna geçiräerin − diýipdir.

Içýan gurbaganyň arkasyna münüpdir. Gurbaga hem suwa girip, ýabyň beýleki gyrasyna tarap ýüzüp ugrapdyr.

Suwuň ortaragyna baranlarynda, içýan gurbaganyň arkasyndan jazyladyp çakypdyr. Awunan gurbaga bolsa, şol ýerde durupdyr-da:

− Ýeri, içýan dost, seniň bu näme etdigiň? − diýip sorapdyr.

Içýan:

− Şeýtmek meniň häsiýetim-dä, gurbaga dost − diýip, jogap beripdir.

Gurbaganyň muňa gahary gelip:

− Seniň häsiýetiň şeýle bolsa, bize hem beýle häsiýetli dost gerek däl − diýip, suwa çümüp gidipdir. Içýan bolsa suwa gark bolup, ölüp galypdyr.