Мордовия. Тяса родиназень ушетксоц

Веле, веле, мокша веле,

Шачем-касом юрхтоняй…

В.Волков.

Кода лемоц тя ляйнять, и коза сон тяфта эряскоды? А тя Мокшесь.Сон эряскоды кандомс эсь ведензон Волга ляйти. Тя ляйнять эзда и ушеды монь велезе Рыбкинась, Родиназень ушетксоц. Калень шяйть эзда, коса мзярда-бди ульсть пяк лама каркта. Но валом-валом шяйсь сяда коськсь, каркне кадозь эсь шачема крайснон, а Мокшесь стаки шуди , азонды эсь веленц эряфонц колга лия ляйхненди. Аф стак содаф мокшэрзянь поэтсь С.Кинякин тяштсь эсь стихотворениясонза:

А кие инь мазысь и найсь

монь эряфонь виде кибрясон?

Тя мокшэрзянь шачема крайсь,

ся крайсь, конань лангса мон касонь. Монь шачема-касома велезе пяк мазы. Фкя пяльде велеть крайгя таргавсь стенакс ащи пиче вирь, конац кеняртьфнесыне велеряйхнень кизонек-тялонек. Кизонда ломаттне тяста кочксихть кстыхть, панкт, разнай тишенят-панчфкат, кулхцонкшнихть нармонень морот и Мокшеть горняманц, якайхть вири эсь пичефксснон-кеняртьксснон азондома, лихтибрянь танцти, ару ведьта симома. Омбоце пяльде велеть крайгя таргавсть морякс кели и пефтома паксятне, коса касфневи лама серода. Мзярда серось касы, ванат паксять лангс и сон няеви афкуксонь морякс, коса ляпе варманясь тии сянгяряза-сенем волнат. А мзярда серось кенери, велеть келес срады кшинь танцти шиненя, кона эрь ломанть петьсы мяленц, касфтсы надияманц. Велеть кучкава таргавсь кели ки, эзганза ардомста, кода корхнихть, прястот марьське аф прай. А нинге аф кунара велеть эзга аньцек тракторса ётаволеть.
А куттне? Аф кутт, а дворецт. Мзярда мон ванондонь сире пингонь фотографият, то верондамазевок ашезь сашенда. Куднятне, бта ламоксть пизем алу повонтф тише копанат: синць алнянят, вельхтяфт шужярьса, вальмянятне сюнерат, бта мезенкса-бди пичедихть. Тяни ся ниле юрхта васттнень занясы фкя куд. Куттне тяни кирпицень и шуфтонь. Фкясь мазы, омбоцесь нинге сяда мазы и цебярь. Оцю валда вальмятне корхтайхть цебярь эряфть колга. А мзяра аф няемада няйсть велеряйхне. Вачаши. Ярхцсесть лопаста шоряф кшида, паксяста кочксезь наксада модамархнень, тиендсть крахмал. Тунда сембе тишенятнень варчсезь:умбрафнень, уроньбулоть и лиятнень. И тя сембось макссесь ломанти вий. Тазатольхть ломаттне. Работасть шинек-венек. Иднек-оцюнек старандасть цебярьгофтомс эсь работаснон мархта эряфть. Лама шудесь ведьта. Эряфсь полафтсь, сон цебярьгодсь, тёждялгодсь. Тяни пцтай эрь кудса газ, ведь, телефон. Кда аф кунара нинге эшихнень эзга машнесь ведсь, афоль сатне ,то тяни кудста пильгценге тяк аськолда:пувордак кранть и шудефтть мзяра эряви ведь. А пенгянь анокламась, ускомась, керомась? Тяни жа пувордак омбоце кранть и кундсонга лямбе , и пидек-пантть мезе мяльце. Васенда аньцек ёфсса сембось ульсь, а тяни-эряфса. А ломаттне кода полафтсть? Сембе грамотнайхть, культурнайхть. Сёрматфнихть эсь кяльсонк газетат, журналхт. Ванфтовихть койхне-обуцятне. Сембода пяк тя няеви мокшень свадьбать эзда: морсевихть мокшень морот, кштикшнемат, азонкшневихть паряфтомат, рахсемат. Сембось-тя народть козяшиц, кона эряви ванфтомс. Мордовиязти-кафсогемонь сисем киза! Пяк полафтсь монь велезе, ломаттне, куттне, культурась, покодемась и стак тов. Мзярда аделаса школать, мон тонафнемада меле мрдан эсь кельгома мокшень велезти, шачема-касома юрхтонязти, штоба эсь тевсон няфтемс, што монга мезе-бди тиень эсь кельгома уженязти. Минь, велеряйхне, путсаськ сембе виеньконь, штоба офоль коле-калада велесь, монь емла Родиназе, ванфтоволь атянь-авань юрхтонясь. Мон надиян, што мазыдонга мазы мастороньке, кда ванфтсаськ сонь, кармай улема павазу куд юрхтокс эсонза эряйхненди.

Панчфокс панчт, Мордовиязе монь!

Мон седи ваксстон азсайне валнень, Катк лиихть синь мянь масторбес. Эсь кельгома крайти ладяфт мяльне, И еран азондомс тейнть, мес!

Тон мокшень крайса шачеть-касоть, Стять кемоста тон пильге лангс. И ков тят шарфта кели ванфцень, Тонь седистот прай стака канкс.

Перьфпяле няйсайть туста вирьхнень- Куваня якать емла идькс. И ару сенем менельсь вельхкссот. И теждя яннясь таргась пикс.

Тейть валда морот морсесть цефксне, И казендсь вирсь эсь козяшинц, Сон эсот учи цебярь инжикс, И терди пялонза тя пингс.

А мяляфтк ару сия ляйнять- Пси шида ванфтыцень аф весть, Сон виде ронгстот салай сизефть, И максы вий тейть Мокша ведсь.

Аф азови монь кайги валсон Мокшэрзянь масторть мазышиц. Аньцек седисон толкс палы, Юрнай тя кяльти кельгомшись.

Мон келькте, келькте, мокшень крайняй! Мон келькте, кода тядять идсь. Катк лемце масторть келес гайняй, И афи сетьмофтьсы сонь пингсь.

Аньцек тейть, мокшень край, эрь тунданя Кази келусь урядаф кудрят. Виензак тон, мокшэрзянь мастор, И эняльдян тейть, ульхть шумбра!

МБОУ «Рыбкинскяй СОШ»

Сочинения « Мордовия. Тяса Родиназень ушетксоц»

Сермадозе 7-це классонь тонафнись: Савкина Инна Николаевна Учительсь: Учкина Валентина Васильевна

2017 к.