Ақмола облысы
Бұланды ауданы
«Балдырған» мектеп-балабақшасы
Тақырыбы: «Татулық – достықтың киелі бесігі»
Өткізген: Узбекова Г.М.
Кусаинова И. Х.
2015 жыл
«Татулық-достықтың киелі бесігі»
Мақсаты: Балаларға татулық, бірлік туралы түсінік беру. 1 мамыр Қазақстан халықтар бірлігі күні екенін балаларға жеткізу, ынтымақтыққа, достыққа өз Отанын сүюге, қорғауға тәрбиелеу.
Жүргізуші: Армысыздар, құрметті ұстаздар мен балалар!
Жүргізуші: «Татулық-достықтың киелі бесігі» атты мерекелік іс- шараға қош келіпсіздер!
Жүргізуші: 1 мамыр- Қазақстан халықтарының бірлігі күні. 1995 жылдың наурызында дүние жүзіне үлгі болып отырған, ұлтаралық татулық пен тұрақтылықтың феномині- Қазақстан халықтары ассамблеясы құрылды. Бұл ешбір елде болмаған ерекше, саяси маңызы зор құрылым..
Жүргізуші: Бүгінде әрбір ұлтқа салт-дәстүрлерін жаңғыртуға, мәдениеті мен әдебиетін дамытуға, тілінің жетілуіне қамқорлық көрсетілуде. Дегенмен бақыт, әділдік, бейбітшілік, жарқын болашақ үшін күрес олардың бәрінің басын біріктірді. «Бірлігі жоқ ел тозады, бірлігі күшті ел озады» дейді қазақ мақалы.
Жүргізуші: Қазақстан мемлекеті көп ұлтты. Біздің елімізде жүз отыздан астам ұлттар тұрады: ұйғыр, кәріс, дүнген, өзбек, қырғыз, түрікмен, тәжік, армян, әзербайжан, украин, белорус, түрік, шешен және тағы басқа шет мемлекеттен келген ұлттар біздің елімізде тіршілік етуде. Біз олармен татумыз, доспыз және бір-бірімізбен қоян- қолтық аралас өмір сүрудеміз.
Дастан:
Ағайын- туған- бар адам.
Адалдық үшін жаралған.
Бар қымбат туыстық,
Баянды болсын тыныштық! – дей келе әр ұлттың өкілдерінен шыққан оқушыларды қарсы алыңыздар!
Жүргізуші: Бұл мереке бұрын бүкіл әлемдік «Еңбекшілер күні» болып тойланды. Қазір ол «Дүнижүзілік ынтымақтастық күні» болып есептеледі.
Тайыр:
Қырғыз, қазақ, өзбектер,
Моңғол, ұйғыр,дүнгендер,
Армян,тәжік, грузин,
Орыс пенен украин
Терезесі тең жатыр
Ән: «Зеңгір көктен!»
Жүргізуші: Халқымыз достық, ынтымақтастыққа ерекше мән берген «Қырғыз, қазақ-бір туған», «Өзбек-өз ағам», «Түбі бірге түрікмен» деп қырғыз, өзбек, түрікмен және т.б. ұлттарды ынтымақтастыққа шақырған. Бірлік-халық салты. Халқымыздың бірлік салты отбасынан басталып, бүкіл елдің, барлық адам баласының бірлігімен ұласады.
Жүргізуші:
Көрініс: «Бірлік»
Автор: Ертеде бір қария балаларын бірлікке былай үйреткен екен. Қарт бір бума шыбықты сындыруды ұсынады. Ұлдары олай әуреленіп, былай бір бума шыбықты сындыра алмайды. Қарт буманы шешіп, шыбықты бір талдап сындырып көруді ұсынады. Шыбықтар оп-оңай сынады.
Қария: бірігіп өмір сүрсеңдер, сендерге ешкімнің де әлі келмейді. Ал жеке-жеке тұрсаңдар, әрқайсыңды біртіндеп құртады.
Жүргізуші: Халқымыздың қанға сіңген осы берлік бірлігі, ұйымшылдығы, басқа халықтармен одақтасып, достаса білу жеңістен жеңіске жеткізеді. Оған халық куә, тарих куә! Балалар, мен сендерге бір сұрақ қойғым келеді. Бұл әлемде адамзат баласына ең қажетті нәрсе не?
Дүниежүзінде бәріміз жақсы көретін нәрсе тыныштық, бірлік.
Әрине, халқымыз ең әуелі тыныштықты қалайды.
Жүргізуші: Ал, енді «тыныштық» деген сөздің мәнін білесіңдер ме?
Дүниежүзінде соғыс болмаса, тыныштық деген сол. Елдегі тыныштықты халық «береке-бейбітшілік» дейді.
Айханым:
Бейбітшілік құсы, ақ көгершін.
Биік ұшып, самғасын.
Тілегімді жерге жайсын,
Қанаттары талмасын. – дей келе «Ақ көгершін» әніне кезек берейік.
Ділнәз:
Сәбилер зәресін бұлт алмасын,
Гүл бәйшешек еш уақытта солмасын.
Ақ көгершін аспанымда қалықтап,
Барлық халық бейбіт күнді қолдансын.
Хор: «Әрқашан күн сөнбесін!»
Жүргізуші:
Достық, ынтымақ туралы даналық сөздер
Ынтымақ-достықтың бірлігі.
Ырыс алды- ынтымақ.
Достық күші- бірлікте.
Достық түбі- Береке,
Береке түбі-мереке.
Ел бірлігі-ел теңдігі.
Ынтымақ жүрген жерде,
Ырыс бірге жүреді.
Жүргізүшінің қорытынды сөзі: 1-мамыр мерекесі дүниежүзіндегі халықтардың достығы мен бірлігін атау күні. Біздің мемлекет бейбітшілікті жақтаушы, дастықты жырлаушы, тыныштықты сақтаушы ел. Елімізде әр ұлттар тату-тәтті өмір сүруде.
«Бірлігі жоқ ел тозады, бірлігі күшті ел озады» деген халық мақалы біздің елге айтылғандай.
Жүргізуші: «Татулық- достықтың киелі бесігі» атты мерекелік іс-шарамыз осымен аяқталды. Көңіл қойып тыңдағандарыңыз үшін рахмет. Қош сау болыңыздар!