Ներառական կրթություն իրականացնող ուսուցչի մոդել

Ներառական կրթություն իրականացնող ուսուցչի մոդել:

Ուսուցչի գործը մարդկային աշխատանքի ամենադժվար բնագավառներից է, նամանավանդ, երբ աշխատանքը տարվում է խոցելի խմբի երեխաների հետ: Այս դեպքում պարտականությունները կրկնապատվում են: Ներառական կրթություն իրականացնող ուսուցիչը պետք է ունենա հետևյալ մասնագիտական որակներն ու արժեքները`

• Տեսական գիտելիքները գործնականում կիրառելու կարողություն

• Համբերատարություն և երեխայակենտրոն մոտեցումների տիրապետում

• Գերազանց հաղորդակցություն և միջանձնային հարաբերություններ հաշմանդամություն ունեցող կամ կյանքի դժվարին իրավիճակներում հայտնված շահառու երեխաների հետ արդյունավետ աշխատանքի համար

• Թերապևտիկ դիդակտիկ մեթոդներ և օժանդակող միջոցներ կիրառելու հմտություն՝ խթանելու երեխայի՝ առօրյա գործողություններ կատարելու կարողությունները

• Բազմամասնագիտական թիմի և մասնագետների հետ համագործակցության կարողություն

• Ներառական տեսանկյունից խնամքի և կրթական համակարգի մասին պատկերացում

• Պրակտիկայում կիրառվող էթիկական նորմերի պահպանում

• Խնդիրների լուծման և որոշումների կայացման հմտությունների կիրառում

• Խնդրահարույց իրավիճակներում ճիշտ և արդյունավետ լուծումների կայացման, երեխաների վստահությունն ու սերը նվաճելու կարողություն, բարձր հուզակամայնություն:

• Ուսուցչի առաջնային խնդիրը պետք է լինի` նպաստել հաշմանդամություն ունեցող երեխաների կարողությունների, ինքնուրույնության հմտությունների զարգացմանն ու հասարակությունում ներառմանը, աջակցել ծնողներին՝ նպաստելով ընտանիքների ամրապնդմանը, մոբիլիզացնել շահագրգիռ կառույցներին՝ հաշմանդամություն ունեցող երեխաների համար որակյալ ծառայությունների մատուցումը խթանելու նպատակով: Աշխատանքներն ուղղված պետք է լինեն զարգացնելու երեխաների հոգեկան իմացական պրոցեսները, մանր մոտորիկան, կառուցողական հմտություններ, գրելու և կարդալու կարողությունները, ինքնասպասարկման հմտությունները և այլն: Իսկ գլխավոր և վերջնական նպատակը, դա հաշմանդամություն ունեցող անձի մաքսիմալ ինքնուրույնությանը և սոցիալիզացիային հասնելն է: Չմոռանանք ուսուցչի պարտականությունների մասին`

• Համագործակցելով դպրոցի բազմամասնագիտական թիմի հետ՝ յուրաքանչյուր երեխայի համար մշակել անհատական զարգացման պլան, հետևել և փաստաթղթավորել երեխայի զարգացումը

• Յուրաքանչյուր երեխայի համար մշակել վերականգնողական ծրագիր, կատարել անհատական, իսկ անհրաժեշտության դեպքում խմբային աշխատանք՝ կիրառելով դիդակտիկ նյութեր, օժանդակող միջոցներ և այլ մեթոդներ, զարգացնել և/կամ վերականգնել երեխաների ճանաչողական ֆունկցիաները, ինչպես նաև ուշադրության, հիշողության, ժամանակային և տարածքային ընկալման հետ կապված ֆունկցիաները

• Անհրաժեշտության դեպքում դիտարկել յուրաքանչյուր սովորողի հետ ուսուցչի աշխատանքը, իրազեկել երեխայի խնդրի վերաբերյալ մյուս դասավանդողներին

• Կապ հաստատել դպրոցի ուսուցիչների և ծնողների հետ և նախապես կազմած աշխատանքային մեթոդների համաձայն՝ երեխային ներգրավել արդյունավետ կրթական գործընթացներում

• Համագործակցել երեխայի ծնողների հետ, անհրաժեշտության դեպքում խթանել վերջիններիս մասնակցությունը կատարվող աշխատանքին, զարգացնել ծնողների՝ երեխայի հետ տանը ճիշտ աշխատելու ունակությունները

• Անհրաժեշտության և/կամ երեխայի հաճախակի բացակայությունների դեպքում սոցիալական աշխատողի հետ կատարել տնայցեր

• Սերտորեն աշխատել բազմամասնագիտական թիմի հետ, փոխանակել մասնագիտական հմտություններ, միասին քննարկել յուրաքանչյուր երեխային անհրաժեշտ անհատական մոտեցումները, մյուս մասնագետներին տրամադրել մասնագիտական խորհրդատվություն

• Մասնակցել ծրագրային նյութերի մշակման աշխատանքներին` նպաստելով հասարակությունում ներառական մոտեցման ընկալմանը

• Պատրաստակամ լինել զարգացնելու մասնագիտական կարողությունները՝ մասնակցելով մասնագիտական առաջընթացը խթանող հանդիպումներին և/կամ դասընթացներին: