Поурочный план по крымскотатарскому языку 10 класс

Джумлелернинъ чешитлери

Суаль джумлелеринде суаль макъсады ифаде олуныр. Сёйлейиджи белли бир меселе акъкъында динълейиджиден соравны ифаделеген хаберге тасдикъ я да инкяр джевап талап этер. Meселя: Сиз бугунь къайда бараджакъсынъыз? Сора, олар бугунь юбилей тантанасына бараджакълармы? Байрамгъа азырлыкъ ишлери яхшы алып барылдымы?

Суаль джумлесининъ интонациясы котеринкли сеснен айтылыр. Эгер джумледе насыл?, къачан?, ким?, не? киби суаль сёзлери иштирак этсе, джумледе, ерине коре, интонация тюрлюдже олмакъ мумкюн. Эгер бу сёзлер джумле башында кельсе, интонация эвель котеринкли сеснен, джумленинъ сонъунда исе алчакъ сеснен айтылыр: Ким келе? Не вакъыт япаджакъсынъыз? Эгер суаль сёзлери джумленинъ ортасында кельсе, интонация да джумленинъ ортасында, яни шу сёзде котерилип, сонъ алчалыр. Ме селя: Санъа берильген вазифени къачан япаджакъсынъ? Ризаны къаерде кординъ?

Эмир джумлелеринде сёйлейиджи башкъа шахысларны бир де бир ишни беджермеге риджа, эмир эте. Бундан башкъа, эмир джумлелеринде теклиф, ялварув, насиат, мураджаат киби маналар да бильдирилир. М е с е л я: Сание апте, къапуны ачынъыз. Рефат кельди. Рефат, мында кельчи. (Гъ. М.)

Эмир джумлелерининъ хабери эмир фиилининъ шеклинен ифаделенир, лякин, эксериет, эмир экинджи шахыскъа, яни къаршыда тургъан динълейиджиге аит олур. Meселя: Мына бу — сизге. Къардашынъа да бер, берабер ашанъыз, —деп, тенбиледи о, мени. (А.М.)

Хабери учюнджи шахыста кельген эмир джумлелеринде исе, эмир объекта субъектчи киби тайин этильмейип, учюнджи шахыс тек назарда тутулыр. Меселя: Барсын озю чезсин, озюнинъ истегени киби, арекет этсин.

Эмир джумлелерининъ теркибинде -чы, -чи дереджеликлери де иштирак этмелери мумкюн. Меселя: Эльмаз, мында кельчи. (Ю.Б.) Къана, кельчи, бир кучъ сынашайыкъ. Корейимчи, сени не ичюн макътай экенлер. (М.А.)