Презентация на тему: "Асан Сабри Айвазов"

АСАН САБРИ АЙВАЗОВ

(1878— 1938)

Несирджи ве драматург Асан Сабри Айвазов 1878 сенеси Алупка шеэринде дюньягъа кельди. Башлангъыч тасилини ерли мектеп ве медреседе алып, Алупка ве онынъ этрафында ерлешкен мектеплерде оджалыкъ этти.

1892 сенеси Истанбулдаки педагогика институтына окъумагъа кире ве 1898 сенесининъ бааринде оны битире. 1902— 1903 сенелери о, Истанбулда яшагъан Неджатизаде Абкеримбек киби белли эдип ве тарихчилерден дерс ала. 1905 сенеси — Бакуда нешир олунгъан «Хаят» серлевалы газетанынъ муаррири олып чалыша.

1906— 1908 сенелери Къарасувбазарда басылгъан «Ватан хадими» газетинде муаррирлик япа.

Макъалелери ве эсерлерини инкъилябий рухта язгъаны ичюн, Асан Сабри Айвазов чар укюмети тарафындан къабаатлана ве 1909 сенеси Къырымдан къувула. Къырымдан къувулгъан сонъ биле, Москвагъа кетип, андаки Лазарев адына шаркъ тиллери институтында лекциялар окъуй, миллий азатлыкъ сиясетине багъышлагъан омюри ве арекетлерини эп девам эте. 1913 сенеси Асан Сабри Айвазов Багъчасарайгъа, Исмаил Гаспринскийнинъ янына къайтып, «Терджиман» газетасынынъ неширинде фааль иштирак эте.

1914 сенеси Гаспринский вефат эткен сонъ, о, « Терджиман »нынъ баш муаррири ола. 1914 сенеден 1917 сенеге къадар о, мында муаррирлик хызметинде булуна.

1917 сенеден сонъ, Асан Сабри Айвазов Акъмесджит шеэрине коче ве мында «Миллет» серлевалы янъы газета чыкъармагъа башлай, халкъымызнынъ омюринде иштирак эте.

1922 сенесинден башлап, Асан Сабри Айвазов Къырым университетининъ шаркъшынаслыкъ болюгинде дере бере.

1928 сенесинден, Вели Ибраимовнынъ индамындан сонъ, медениет эрбапларына къаршы куреш эп кескинлеше. Шу йылы халкъымызнынъ энъ истидатлы алим ве эдиплери бири-бири артындан мушкуль репрессияларгъа огъратылалар.

1930 сененинъ башында ишсизлик белясына огъратылгъан эдип, 1932 сенеси буржуа миллетчилигининъ тешвикъатчысы оларакъ, такъип этиле. 1932 сенеси Айвазов пединституттан иштен чыкъарыла . Бу девирде укюм сюрген сталин зорбалыкълары А.С. Айвазовны да четте къалдырмай.

1937 сенесининъ апрель айынынъ бешинде Асан Сабри Айвазов контрреволюцион Миллий Фиркъанынъ пропагандасында къабаатланып, апске алына.

1938 сенеси апрель айынынъ он едисинде аджайип языджы, пак юрекли, инсанпервер оджа, Асан Сабри Айвазов, къуршун джезасына огъратыла.