Разработка урока "Любовная лирика в творчестве удмуртской поэтессы Ашальчи Оки"

Пётр Владимирович ДАВЫДОВ,

Завьялово ёросысь Юськи шоръёзо школаысь

удмурт кылъя но литературая дышетись.

Тема: АШАЛЬЧИ ОКИЛЭН ЯРАТОН ЛИРИКАЕЗ

(1-ти слайд)

Цель: Ашальчи Окилэн творчествоеныз тодматонэз азьланьтоно, кылбурчиез син азе пуктыны тыршоно, яратонлы сизем кылбур дуннезэ усьтоно-эскероно, адямилэсь пушдуннезэ валаны, улонысь зечсэ но уродзэ висъяны, ас калыкедлы яратон мылкыд пычатыны дышетоно.

Кутэм амалъёс: беседа, кластер лэсьтон, «котырес жок», синквейн гожтон.

Эпиграф: Тонэ котьку малпасько, (2-ти слайд)

Уйлы быдэ вотасько.

Тонэ адзытэк мозмисько,

Мусо нимдэ верасько. (Ашальчи Оки)

Уроклэн мынэмез:

1).Урокмес кутскомы Ашальчи Окилэн «Тон юад мынэсьтым» кылбурез бордысен (лыдзе дышетскись). (3-ти слайд)

- Ма сярысь та кылбур? Кыче малпанъёсы вуоно сое лыдзыса?

Ашальчи Оки лыдзисьлы вера кылбуран уж шоры кызьы учкемзэ, ивортэ аслэсьтыз поэтической программазэ). Кылбур кутске авторлэн лыдзисен вераськеменыз.Зэм но, малы кылбуръёс гожъя поэтесса? Кызьы ке бусыысь чуж кисьмам сезьы уй-нунал чаштыртэ, кызьы ке шур ву дугдылытэк жальыртэ, кызьы ке учыед но жыт-чукен весь чирдэ, озьы ик солэн но – поэзиын ужаны вордиськем адямилэн – кылбур гожъятэк улэмез уг луы. Ас сюлэмызлэсь чебер мылкыдзэ, шумпотонъёссэ но кайгыронъёссэ Ашальчи Оки котырысьтыз вань дуннелы вераны кулэен лыдъя.

2). Ойдолэ нырысь ик тодамы ваёме азьвыл классъёсын ортчем урокъёсын тодэммес: вакчи юан-вакчи веран (вераны луэ шара, кидэс жутытэк).(4-7 слайдъёс)

1. Ашальчи Окилэсь быдэс нимзэ верано. (Лина Григорьевна Векшина).

2. Ма со «ашальчи»? (Возь вылысь шепо турын-сяська).

3. Маин дано луиз Векшина удмурт калык понна? (Нырысети удмурт нылкышно-кылбурчи нимыныз).

4. Ку вордиськиз? (4 оштолэзе 1898-ти арын).

5. Кытын? (Грах ёросысь Кузёбай гуртын).

6. Кытын дышетскиз? (Грахысь двухклассной земской школаын, Карлыган гуртысь Центральной удмурт школаын, Казаньысь рабфакын но университетысь медициная факультетын).

7. Кин вал кузпалыз? (Иван Иванович Карачёв, агроном).

8. Война вылти кин луыса тыршиз А.Оки? (Полевой госпитальын, хирург).

9. Улонэзлэсь троссэ аръёссэ кыче ёросын ортчытиз? (Алнашын)

10. Кыче висёнэн нюръяськиз? (Трахомаен)

11. Тыршемез кыче дано нимен пусъемын? (Удмурт АССР-ысь заслуженной врач).

12. Литературалэн кыче жанръёсыз бордын ужаз? (Лирической (кылбуръёс) но эпической (веросъёс).

13. Коня пол Ашальчи Оки пытсэт улын вал? (Кык пол)

14. Ма понна? (Националист шуизы К.Гердэн кусып воземез понна).

15. Кыче кылбур сборникъёссэ тодиськоды? («Сюрес дурын» - 1925 арын, «О чем поёт вотячка?» - 1928, «Мон тодам вайисько» - 1968, «Тон юад мынэсьтым» - 1978, «Пинал нылмурт туж яратэ» - 1994, «Чыртывесь» - 1998.)

Таблицая ужан (ас понназы ответ сёто. Собере слайд возьматиське. Валэктонъёссэс чошато). (8-ти слайд)

А.Окилэн ваньмыз-оволэз 36 кылбурез лыдъяське. Нырысети кылбур бичетысь текстъёс мукет сборникъёсаз но пыремын.

3).Гожъяськон уж борды кыстиськемез сярысь А.Окилэн тодэ ваёнъёсыз магнит лента вылэ кылемын. Али чузъяськоз солэн улэп куараез. Отисько сак кылзыны но солэсь тусбуйзэ, сямзэ, выросъёссэ син азяды пуктыны.Кычеен ти сое адзысалды? (Кылзо, асьсэлэсь малпанъёссэс верало: капчи мылкыдо, лякыт, вераськись, тонэ туж сак кылзоз но кыче ке визь-кенеш сётоз кадь, лад-лад, со доры матэгес кариськыны сюлэм ачиз куриське…). (9-ти слайд)

4).Ашальчи Окилэн поэзияз бадзым инты басьтэ яратон сярысь лирика. Солы сизем кылбуръёсын героиня вань сюлмыныз яратэ, я шудтэм яратонэн йырин мур куректэ. Юнме уг шуо, дыр, калыкын: «Яратон адямилы кужым сётэ, азьлане оте». Самой сыче бадзым но мур яратон сярысь кылбура нылкышно-кылбурчи Ашальчи Оки.

5).Табере ужаськомы группаосын. Чектисько таче кылбуръёсты эскерыны: 1-ти группалы - «Кык гожтэт», 2-ти гр. - «Возьытлык». (10-11-ти слайдъёс)

Одиг кадь юанъёс чектисько на: (12-ти слайд)

1. Ма сярысь та кылбур?

2. Кыче мылкыд кылдэ, сое лыдзыса?

3. Кин луэ лирической героез?

4. Кыче художественной амалъёс, буёлъёс юртто геройлэсь образзэ усьтыны?

Шара эскериськом «Чияпуэд сяськаяське» кылбурез. (13-ти слайд)

- Кыче инкуазь суред возьматэмын кылбурын?

Тулыс инкуазьлэн яркыт суредэз: чияпу сяськаян вакыт.

- Кыче малпан кылдэ кылбурез лыдзыса?

Тулыс лирической героиня доры инкуазен чош лыктэ яратон, пушказ но, оло, маиз ке но сяськаяське.

- Кыче куараос тужгес но чем пумисько кылбурын?

Нырысь ик небыт -сь- куара, собере син шоры йотэ ч.(аллитерация амал).

- Малы А.Оки шудэ таче куараосын? Мае возьматыны тырше со?

Нырысь ик, та куараослэн чем кутиськемзы возьмато чияпу сяськаян вакытлэсь, тулыслэсь крезьгурзэ, мушъёслэсь-дуринчиослэсь гужламзэс. 2-ез - -сь- но –ч- куараослэн куашетэмзы пыр егит нылмуртлэн мылкыдыз возьматэмын: туж яратэ бере, со понна вань дунне кырза, гурла, жингыртэ, палэнэ уг кыльы котырысь инкуазь но, яратись нылмурт сюлэм но. Сяськаяське – ачиз кыл кыче ке крезьгур кылдытэ ни.

-Кыче буёлъёсты кутэм автор?

Тодьы (чияпу сяська, чиль-чилясь ву, тодьы бам);

Сьод (сьод дуринчи);

Горд (чыж-чыжектись бам).

Тодьы буёл инкуазез быдэсак тодьма кадь (тулыс, котыр сяськаяське). Сьодлэн интыез пичигес (сьод дуринчи): оло нош, чебер пи ожытак кышкатэ, бичатэ ныл сюлэмез (кышкан мылкыд).

6).Поэзиын нырысети интыын адямилэн мылкыдыз луэ. Кыче мылкыдъёсты шодыны луэ А.Окилэн кылбуръёсысьтыз? Лэсьтиськом кластер. (14-ти слайд)

Данъяськон

Малпаськон

Паймон

Возьман

Гажан

Мылкыд

Мозмон

Жожомон

Жалян

Шумпотон

Яратон

Возьдаськон

Куректон

7). «Ашальчи Оки но удмурт кырзан» темая котырес жок ортчытон.

Ныл мылкыдэз паймымон умой тодыса но быгатыса возьматэменыз ик, композиторъёс Ашальчи Окилэн яратон сярысь кылбуръёсызъя чыдонтэм чебересь кырзанъёс кылдытизы. Паськыт волмемын солэн «Мон тодам вайисько», «Кык гожтэт», «Оло монэ яратиськод», «Куддыръя» кырзанъёсыз. Соослы крезьгур кылдытизы Герман Корепанов, Геннадий Корепанов-Камский, Анна Плотникова. Али кылзомы одигзэ соос полысь – «Куддыръя» кырзанэз. (15-ти слайд)

- Кинлэн нимыныз гожтэмын кылбур? (Лирической героез луэ егит ныл).

- Кин сярысь со тон шуыса вера? (синмаськем муртэз сярысь)

- Кыче со егит пи? ( Валаны уг луы: зырдыт – кезьыт, кылъёсыз небыт – чурыт, зеч – лек).

- Луэ-а оскыны таче адямилы, кудизлэн ассэ воземез (поведениез) валантэм, вошъяськись? (уг).

- Кыче амалэн гожтэмын кылбур? (Антитеза амалэн: ваче пуктэмын пумит луись мылкыдъёс).

8). Дано удмурт кылбурчимылы кылбур-синквейн гожтиськом (чошен ужало). (16-ти слайд)

Ашальчи

Яратись, дисьтись, визьмо.

Гожъя, валэктэ, яратэ.

Улонэз валаны дышетэ.

Кылбурчи.

9).Ашальчи Окилэсь поэзизэ туннэ азьланьтизы данакез нылкышно-кылбурчиосмы. Соос полын Алла Кузнецова, Галина Романова, Татьяна Чернова, Людмила Кутянова, Юлия Байсарова, Людмила Хрулёва, Любовь Тихонова…

Уроклы йылпумъян.

- Кыче йылпумъян лэсьтысалды туннэ урокмылы?

Туннэ урок чоже тодматскимы нырысети удмурт нылкышно-кылбурчилэн Ашальчи Окилэн творчествоеныз, асэныз пумиськылим кадь. Эскерем кылбуръёс – егит нылмуртлэн зырдыт яратэмез сярысь. Мур малпаськытись, пось мылкыдын, чылкыт сюлмын гожтэмын соос.

Яратон адямилы кужым сётэ, выль ужъёсы бурдъя. Яратон ке вань, улэмъя улэм потэ. Сыче малпанъёсы вуттиз та урок.

Гуртэ уж: туннэ эскерем яратонлы сизем кылбуръёс полысь огзэ ас быръемдыя учкытэк, наизусть вераны дасяськоды.

Урок йылпумъяське «Мон тодам вайисько» кырзанэз быдэстыса.

(17-ти слайд)