Пётр Владимирович ДАВЫДОВ,
Дэри ёросысь Юськи шоръёзо школаысь
удмурт кылъя но литературая дышетӥсь
Михаил Петров. «Зангари сяськаос» верос
Удмурт литературая урок. 6-тӥ класс
Эпиграф:
Аслад кужымедлы ӧд ке оскы – бырод. (Визькыл).
Уроклэн мугъёсыз: авторлэсь творчествозэ дышетыны тунсыкъяськон мылкыд пыӵатоно, вераськон кылэз волятон бордын ужано, текстэн ужаны быгатонлыксэс азинтоно, утчан-эскерон быгатонлыкез муромытоно, лыдӟиськон пыр выльзэ тодыны мылкыдзэс бугыртоно.
Уроклы ужтӥрлык: интерактивной доска, ноутбук, мультимедийной проектор, презентация, карточкаос, учебник-хрестоматия.
Личностной результатъёс: ортчоно темая мылкыдзэс шараяло, дунъяны дышетско.
Метапредметной результатъёс:
Регулятивной УУД: дышетӥсен ӵош азьмугъёс пукто, тодэмзэс возьмато, ужамзылы дунъет сёто.
Познавательной УУД: юанъёс бордын ужало, текстысь кулэ ивортодэт утчало, тодэмзэс радъяло, йылпумъянъёс лэсьто.
Коммуникативной УУД: дышетӥсен кусып тупатыны быгатон, малпанъёссэс шара верало, туркымъёсын но кузъёсын ог-огзэс валаса, кенешыса ужало, ог-огзэсты сак кылзо.
Предметной результатъёс: произведениез сэртто-пертчо, аспӧртэмлыксэ шараяло, сюжетсэ эскеро.
Уроклэн мынэмез.
1-тӥ урок
Д.: Ӟечбуресь, пиналъёс! Гань-гань пуксьыса, синъёстэс кыне но, мон сьӧры сипыртыса, вералэ: «Мон урокын. Со понна шумпотӥсько. Саклыке мынам будэ. Йыры ужа сэзь. Выльзэ тодэме потэ. Мон дась ужаны!»
Азинсконъёс тӥледлы! Ваньмыз мед пӧрмоз! Нош туннэ урокамы мар бордын ужаломы, кинлэсь творчествозэ эскеромы шуыса тодон вылысь, «шонер-шонертэм» таблицаез быдэстом (карточкаосъя кузэн ужало, собере шонер валэктонэз экран вылэ потэ).
| Шонер но шонертэм малпанъёс | Шонер | Шонертэм |
| Вордӥськиз 1905-тӥ арын Татариысь Вандэмо (Монашево) гуртын куанер крестьян семьяын | + |
|
| Гужемъёсы ветлӥз ляльчиын, узыръёслэсь пудозэс возьмаз. Будӥз Марфа апаез вӧзын | + |
|
| Литератураын рос-прос ужаны кутске 1928-тӥ арысен. Та аре «Удмурт коммуна» газетын потэ «Петыр Стёпан» веросэз но «Горд часовой» кылбурез | + |
|
| Гожтӥз яратон сярысь «Италмас» балет |
| + |
| Удмурт кылэ берыктӥз «Слово о полку Игореве» эпосэз, М.Горькийлэсь веросъёссэ, пьесаоссэ, «Детство» повестьсэ, Л.Толстойлэсь но А.Островскийлэсь пьесаоссэс, М.Шолоховлэсь «Поднятая целина» романзэ, А.Твардовскийлэсь «Василий Тёркин» поэмазэ, ӟуч классикъёслэсь трос кылбуръёссэс | + |
|
| Война бере аръёсы ужаз книжной издательствоын директор, писательёслэн Союззылэн председателез, «Крестьянка» журналлэн редакторез луыса |
| + |
| Пусъемын Горд Кизили, «Знак Почёта», Трудовой Горд Знамя орденъёсын | + |
|
Озьыен, кинлэсь творчествозэ туннэ эскером? (Михаил Петрович Петровлэсь, выль произведениеныз тодматском).
Д.: Удмурт литературалэн будон сюрес вылаз шӧдскымон куаразэ но пытьызэ кельтӥз пӧртэм пумо жанръёсын гожъяськись Михаил Петрович Петров (туспуктэмез но книгаосыз экран вылын возьматӥсько). Солэн творчествояз нимысьтыз инты басьтэ военной тема. Мугез валамон: 1941-тӥ арын Москва дорысен кутскыса, 1945-тӥ арын тушмонлэсь пузкарзэ – Берлинэз пазьгытозь со ожмаськиз немецко-фашистской захватчикъёслы пумит 208-тӥ стрелковой дивизиысь 49-тӥ бригадаын, кудӥз кылдытэмын вал Быдӟым тылож кутскон аре Глазкар дорын. Писатель ас синмыныз адӟиз но ас вылаз чидаз фронтлэсь секыт дыръёссэ, азьлань мынон но тушмонэз вормон нуналъёсты. Война дыръя гожъям произведениосаз яркыт суреда лек ожъёсты, калыклэсь вожпотонзэ, советской солдатъёслэсь но командиръёслэсь боевой подвигъёссэс, калыкъёслэсь кужмо нюръяськемзэс но бадӟым вормон басьтэмзэс.
Одӥгез соос пӧлысь – «Зангари сяськаос» верос (экран вылын – зангарисяськаос (словарь: василёк). Кызьы малпаськоды, ма сярысь меда та гожтос? (Нылпиос ас малпанъёссэс шара верало, дышетӥсь пумен доска вылэ гожъяса потэ).
Кыӵе азьмуг пуктомы? (Веросэз эскерыса, ӵектэм малпанъёслэсь зэмлыксэ шараяно, пуштроссэ чаклано).
Веросэн дышетӥсь тодматэ. Быдӟалаезъя бадӟым ӧвӧл, соин сое дугдылыса, комментировать карылыса лыдӟыны ӵапак интыяз луэ. Нылпиослы та амал кельше, малы ке шуоно лыдӟемъя пӧртэм пумо юанъёс курисько, кудӥз пиналэз малпаськыны, котыр улонын сак луыны, азьпала учкыны, огъянъёс лэсьтыны дышетэ.
«…Макаровлэн бамъёсыз пӧсяк луо…» Ма муген?
«…Макаров со сярысь тодэ, нош малпаськыса мынонъяз, минаез пыд азьысьтыз шуак адӟеменыз, вылтырыз юзыр луиз…» Малы?
«…гранатадэ мон интыяз куштыны тыршо. – Лейтенант Макаров Ф-1 гранатаез е бордаз ошиз…» Ку уже кутоз старшиналэсь «саламзэ» веросысь герой?
«Али ик пуксьыса гожто, орден басьтэме сярысь но иворто. Тоня но монэн валче мед шумпотоз». Ма кароз герой?
«…Макаров брюки ӟепысьтыз маке секытэз шӧдӥз. «Граната!» Ма кароз?
«Ӟеч лу, Тоня, ӟеч луэ, эшъёс…» Быриз-а?
«Соку ик солэн ымныраз сюй но тыл пазьгиськизы, пельёсаз кин ке туж кужмо чабкиз кадь…» Мар луиз?
«Только, смотри, сак мынэ». Мар луоз?
«Тон дасяськы ответ сётыны». Кыӵе ответ сётоз Макаров?
«…нош мон тыныд та сяська сярысь, уйвӧтын адӟем кадь, верос мадё…» Кыӵе верос мадьыны дасяське лейтенант Макаров?
Д.: Адӟисько но шӧдӥсько, верос кельшиз, синъёсты ӝуатскизы, ваньмыз умоен йылпумъяськиз, соин капчияк куд-огез шокчизы но. Доска вылэ гожтэм малпанъёсты быдэсмизы-а? (Доска вылэ гожтэм юанъёс борды берытско).
Берытскомы урокмы азе пуктэм эпиграфмы вылэ. Кызьы герӟасалды та визькылэз лейтенантлэн Андрей Макарович Макаровлэн, улосчиосмылэн нимъёсынызы? (Туркымъёс, ог-огенызы кенешыса, малпанъёссэс верало).
Нош али дэмласько 3 туркымъёсын ужъёсты быдэстыны:
1-тӥ группа лыдӟем текстысь фактъёс бордын ужа: ожтэм дыръя кыӵе учыръёс ортчо фронтын).
2-тӥ группа текстын буёлъёс бордын ужа: кыӵе пуштросэн кутэмын.
3-тӥ группа верослэн авторезлэсь интервью басьтэ.
Котькуд группа малпанзэ, творчествозэ шарая.
Уроклы йылпумъян.
Доре уж: М.Петровлэсь «Зангари сяськаос» вероссэ лыдӟоно, план гожтоно, пуштроссэ эскерыны, анализ сётыны дасяськоно.
2-тӥ урок
Уроклэн мынэмез
Д.: М.Петровлэн «Зангари сяськаос» веросэз бордын ужмес азинтом. Огъя верослэсь пуштроссэ эскеромы, сэрттом-пертчом, тодэммес юнматом. Ужмес радъяломы тазьы: котькуд дышетскись туннэ урокын мед быгатоз ассэ пуктыны «лыдӟись», «теоретик», «автор» интыосы.
Йылпумъялэ предложениен: «Туннэ урокын мон тыршо…» (верало мылкыдзэс). Урок ӵоже тырше сое быдэстыны!
Доре ужез быдэстэмдыя кин мылкыд кароз кылдытэм планъёсыныды тодматыны? (2-3 мурт шара лыдӟе, доска вылэ дышетӥсь кылдытэ).
Утчаськон-эскерон люкет
(Нылпиос юанъёс но ужъёс бордын ужало, произведениез туркымъёсын эскеро. Тэкшеронъёсы ваньмыз группаос мыло-кыдо пырисько).
Кыӵе темалы сӥземын М.Петровлэн «Зангари сяськаос» веросэз? (Патриотизм темалы, калыклэн шудбурез но эрикез понна ожмаськемез, Родинаез утён, тушмонэз адӟемпотостэм карон).
Кыӵеен син азе пуксе Макаров лейтенант? Соин разведкае мынысалды-а? (Ас малпанъёссэс верало).
Верос ӵоже кӧня пол кутэмын зангарисяськаослэн образзы? Кыӵе луэ та образлэн символэз, пуштросэз? (Син азьтӥмы 3 пол ортчо бусыез шулдыртӥсь сяськаос. Та огшоры гинэ сяськаосты кутыса, верос син азьын улӟиз кадь. Азямы – бадӟым сюлэмо адями, ас музъемзэ гажась но яратӥсь, улонлы пумтэм синмаськем мурт, кудӥз, шуг-секытъёс пыр потыса, малпаське вордӥськем палъёсаз, яратоно но дуно семьяяз берытскыны).
Жанрезъя – верос. Кыӵе люкетъёслэсь пӧрме верос? (Вступление, завязка, кульминация, развязка, заключение). Веросысь кульминация кылдытӥсь интызэ шедьтэ. (Утчало, одӥгез люкетсэ шара лыдӟе).
Быдэстӥз-а подполковниклы сётэм кылзэ лейтенант Макаров? (Ас малпанъёссэс верало-усьто).
Зангарисяськаез ишкалтыкуз, Макаров малпаське гожтэтаз «Горд Знамя» орден басьтэмез сярысь ивортыны. Малы малпанзэ воштӥз? (Улонлэн сӥньыс йылаз вуыса, тушмонэн ваче син луыса, герой валатскиз, улон орденлэсь дуногес луэ шуыса, орденлэн дунлыкез ыше кадь).
Кытысь адӟиськом войналэсь шимес, быронэ вуттӥсь палзэ? (Сутскем гурт, мина, кудзэ адӟыса, геройлэн вылтырыз юзыр луиз, удалтэм ӟег кузётэк кылемын…).
Геройлэсь тушмон ки улэ шедемзэ 1-тӥ лицоын вералэ. (Котькуд группаысь быдэн пияшъёс бӧрсьысь бӧрсе верало).
Малпанды ӧз кылды-а, та пичи верос бадӟым произведенилэн люкетэз луэ шуыса? Кыӵе люкетъёссэ висъясалды? (Ас мылкыдзэс шараяло).
Малы та гожтосэз верос шуиськомы? (Малпанъёссэс верало).
Кызьы мукет сямен нимасалды «Зангари сяськаос» веросэз? (Нылпиос нимызъя малпанъёссэс верало).
Гуртысьтымы кӧня адями Быдӟым Атыкай ожын геройлыко ожмаськиз? Кӧняез соос пӧлысь бырыны шедиз? (Юсь черкогуртысь 146 адями фронтын вал, соос пӧлысь 93-ез войналэн тылӝуаз быризы. Котькуд корка сямен куректон-кайгу йыгаськиз. Гуртоосмылэн нимтулъёссы пыраклы кылемын сюлэмъёсамы, синпелетмы вылэ, «Буре ваён» книгаын. Нош быдэс ёросмыя 7695 лыдэ вуэ, 6720-ез ож бусыосын яке госпитальёсын быризы, войналэн гульымаз чиптэм-чаптэм ышизы. Соос сярысь вунэтыны уг яра).
Рефлексия. «Зангарисяська» кыллы синквейн кылдытоно, кузэн ужаса.
Зангарисяська.
Чебер, ненег.
Будэ, сяськая, шумпоттэ.
Сюлэмез буйгатэ, мылкыдэз бурдъя.
Шудбур.
Йылпумъялэ предложениосты:
- М.Петровлэн «Зангари сяськаос» веросэз дышетӥз монэ…
- М.Петровлэсь «Зангари сяськаос» вероссэ лыдӟыса, юанэ кылдӥз…
- М.Петровлэсь «Зангари сяськаос» вероссэ лыдӟыса, валай…
Доре уж:
«Мынам ӵыжы-выжыосы фронтын» темая утчаськон-эскерон, творческой уж, сочинение яке эссе гожтоно. Устоосыз ужъёс пыртэмын луозы гуртмылэн историезъя дасям книгае.
1 987
31 627 
