Яңа ел әкияте
Максат: Кышкы табигатьнең матурлыгына соклана белү сыйфаты тәрбияләү; кыш турындагы белемнәрен тирәнәйтү; балаларда бәйрәмгә карата уңай мөнәсәбәт, үз фикереңне бер юнәлештә туплый һәм аны башкаларга җиткерә белү сыйфаты тәрбияләү; балаларда яңа ел бәйрәме уңаеннан яхшы кәеф, шатлык хисләре булдыру.
Катнашалар: төлке Алиса, песи Базилио, Буратино, Мальвина, Кыш бабай, Кар кызы.
“Яңа ел вальсы” музыкасы астында балалар залга керәләр һәм ярымтүгәрәк ясап басалар. Зал уртасында чыршы бизәлгән.
А.б. Нинди матур безнең чыршы!
Җем – җем килеп яна ул.
Башлыйбыз чыршы бәйрәмен,
Котлы булсын Яңа ел!
Урманнан безгә бәйрәмгә
Ямь – яшел чыршы килгән.
Яңа елны каршыларга
Матур күлмәген кигән.
Җыр “Чыршы”
1 бала. Исәнме, чыршы, исәнме.
Яңа ел килеп җитте.
Күңелле чыршы бәйрәмен
Балалар күптән көтте.
2 бала. Саумы, саумы, чыршыкай,
Саумы, саумы, Яңа ел!
Яшел чыршы тирәли
Әйләнәбез елмаеп.
Җыр “Чыршыкай, купшыкай”
3 бала. Күрегез бу чыршыны
Чыршының да чып – чыны.
Нинди төз, матур, биек.
Тора түшәмгә тиеп.
4 бала.Кунак булып яшел чыршы
Урманнан безгә килгән.
Ел да безне шаккаттыра,
Ничек матур киенгән.
5 бала.Төрле – төрле утлар яна
Без уйныйбыз әйләнеп.
Бигрәк матур, бигрәк ямьле
Безнең чыршы бәйрәме.
Җыр “Чыршы янында”
Күңелле көй агышында залга Буратино керә. Кулында – алтын ачкыч. Буратино.Исәнмесез! Яңа ел белән! Сез мине таныдыгызмы? Әйе, мин Буратино – әкият герое. Тортилла исемле ташбака миңа шушы ачкычны бүләк итте. Бу ачкыч гади түгел. Аның тылсымы бар. Мин үземнең дустымны Мальвинаны эзлим. Ул монда юк икән. Аны эзләп килгәнче ачкыч чыршыда эленеп торсын әле. (Чыршыга ачкычны элеп, көй агышында чыгып китә)
Залга Алиса белән песи Базилио керәләр. Песи таякка таянган, төлкенең пычкысы бар
Төлке белән песи биюе
Төлке.Без мескеннәрне бәйрәмгә кертегезче.
Песи.Безнең дураклар илендә шундый суык, өшеп беттек.
Төлке. Безгә учак ясар өчен зур агач кирәк. Учак җылысында җылыныр идек.
Песи.О! Кара әле, Алиса. Нинди зур, күркәм агач (чыршыны күрсәтә). Бу агачтан утын күп чыгар.
Төлке. Менә шәп бу. Әле аның бизәкләре, уенчыклары да бар.
Песи. Ә без агачны кисик, уенчыкларын җыеп алыйк һәм үзебезнең дураклар илендә аларны сатарбыз. Күп итеп акча эшләрбез.
Төлке. Шәп фикер бу! Мин инде уенчыкларны ничек итеп бүләсен дә исәпләдем: сиңа – икесе, миңа – өчесе. Тигез итеп бүлү була.
Песи.Тигез булмый бит алай!
Төлке. Ярар, мырылдама! Әйдә, башта агачны кисик әле. (чыршының утлары сүнә)
Песи.О! Кара әле, чыршының утлары сүнде! Үпкәләде бугай ул безгә. (Песи белән төлке чыршыны кисмәкче булалар һәм анда ачкычны күрәләр)
Төлке. Базилио, кара әле: ачкыч бит бу! Алтын бит бу. (ачкычны алып тешләп карый). Буратиноның ачкычы түгелме соң бу?
Песи.Шуныкы, шуныкы. Димәк, ул үзе дә шушы тирәдә йөридер.
Күңелле көй агышында залга Буратино белән Мальвина керәләр.
Буратино. Менә, Мальвина, син чыршы бәйрәменә килеп тә җиттең.
Мальвина.Мин бик шатмын. Исәнмесез, балалар,
Исәнмесез, кунаклар!
Яңа ел котлы булсын,
Бәхетләр алып килсен! (баш ия, реверанс ясый)
Буратино.Мальвина, кара әле, миңа Тортилла нинди матур ачкыч бүләк итте. Мин аны чыршыга элеп торган идем. (чыршыны әйләнеп чыга, ачкычны тапмый).
Төлке.Хә – хә – хә. Ачкычны эзлисеңме? Менә бу ачкыч кирәкме сиңа? Без аны сиңа бирмибез. Алтын үзебезгә кирәк.
Песи.Әйе, үзебезгә кирәк! Сиңа да кирәкме?
Мальвина.Әйе, бу ачкыч Буратинога кирәк. Аныкы бит ул.
Төлке. Кирәк булса соң.
Песи. Без аны бушка гына бирмибез.
А.б. Сез ачкычны кире Буратинога бирсен өчен без нишлик соң?
Төлке. Безнең күңелне күтәрергә кирәк.
Песи. Әйе, күтәрегез күңелне.
А.б. Ярар. Әйдәгез, безнең белән “Чыршы” уеныуйнарга басыгыз, бергәләп уйнап алыйк.
Уен “Чыршы”
А.б. Хәзер мин сезгә чыршыга эленә һәм эленми торган әйберләрне атыйм., ә сез барыгыз бергә “әйе” яисә “юк” дип җавап бирерсез. Шулай итеп башладык.
Төрле төстәге шарлар?
Мендәрләр, одеяллар?
Мармелад, шоколадлар?
Күпсанлы урындыклар?
Ә йомшак уенчыклар?
Дәфтәрләр һәм китаплар?
Кызыл – сары утлар?
Әкияттәге җеннәр?
Матур – матур чылбырлар?
Серпантин, мишуралар?
Сумкадагы папкалар?
Туфли һәм кроссовкилар?
Чәнечке, пычак, калак?
Көзге һәм агач тарак?
Тәмле – тәмле конфетлар?
Кыздырылган котлетлар?
Ә малайлар һәм кызлар?
Һавадагы йолдызлар?
Булдырдыгыз, афәрин!
Төлке. Уеннары күңелле булды. Ләкин әле безнең яңа ел турында шигырьләр дә тыңлыйсыбыз килә..
Песи. Алар шигырьләр сөйли белмиләрдер әле.
А.б. Нишләп белмәсеннәр?! Безнең балалар бик матур итеп шигырьләр сөйли белә. Менә тыңлап карагыз әле.
6 бала. Бүген бездә зур бәйрәм-
Бүген Яңа ел килә.
Бүген күңелләр җырга
Һәм биергә җилкенә.
7 бала. Без бүген чыршы янында
Әйлән – бәйлән уйнарбыз.
Кыш бабайны каршыларбыз,
Яңа җырлар җырларбыз.
8 бала. Яңа ел ул Яңа шул
Иске ел булмас әле.
Шатлыгын да, бәхетен дә
Кызганып тормас әле.
Төлке. Ярар, ярар... шигырьләр беләсез икән. Менә алыгыз ачкычны!
Песи. Әйе алыгыз.
(Буратино белән Мальвина ачкычны алып, көй агышына чыгып китәләр).
Төлке. Ә син беләсеңме, Базилио, монда тиздән Кыш бабай белән Кар кызы киләчәк. Ул Кар кызының чибәрлеген күрсәң син...
Песи. Карап та тормыйм.
Төлке. Әйдә, Базилио, без ул чибәр Кар кызын урлап китәбез дә, аны бүләкләргә алыштырып алабыз. Рәхәтләнеп шоколад, конфет ашарбыз.
Песи. Дөрес фикер йөртәсең син, Алиса. Рәхәтләнеп ашыйбыз тәм – томнарны. Ләкин Кар кызын ничек урларбыз соң?
Төлке. Ә без Кыш бабайны йоклатырбыз.
Песи. Ничек йоклатырбыз соң аны?
Төлке. Без Кыш бабайга компот эчерербез. Ә компотка йокы даруы салырбыз!!!
Песи. Ә – ә – ә. Менә шәп хәйлә. Бабакай йоклагач, без Кар кызын урлыйбыз. Әйдә качыйк та, Кыш бабай килгәнен көтеп торыйк (чыгып китәләр).
А.б. Кемнең кигән киемнәре
Энҗе кар бөртекләре?
Кемнең көмештәй сакалы
Чәчләре, керфекләре.
Кем соң безгә шундый ямьле
Яңа ел алып килә?
Матур кәгазь капчыкларга
Күчтәнәч салып килә.
Балалар. Кыш бабай.
Җыр “Чыршы әйләнәсндә”
А.б.Кыш бабай килгәнче бер уен да уйнап алыйк әле.
Әгәр мин дөрес әйтсәм, сез кул чабарсыз. Әгәр мин дөрес әйтмәсәм, аяклар белән тыпырдарсыз.
Кыш бабай барыбызга да таныш бабаймы?
Ул җәй көне киләме?
Кар кызы белән Кыш бабай дуслармы?
Кыш бабай салкыннан куркамы?
Кыш бабай шугалаклар бүләк итәме?
Кыш бабай яңгырлар яудырамы?
Кыш бабай карлар яудырып, таулар өяме?
Кыш бабай галошлар кияме?
Кыш бабабыз тиздән киләме?
Бүләкләр алып киләме?
Игътибарлы икәнсез. Будырдыгыз балалар.
Ә хәзер Кыш бабайны чакырыйк.
Бергә. Кыш бабай, кил безгә,
Ямь бир бәйрәмебезгә.
Килче тизрәк, Кыш бабай,
Безнең белән дус бабай!
(Тылсымлы көй агышында Кыш бабай килеп керә)
Кыш бабай. Саумы, көтеп алган бәйрәм!
Саумы, чыршыкай!
Исәнмесез, бар кунаклар,
Сезне күреп шатландым.
Бу хәерле сәгатьтә,
Бәйрәм теләге сезгә,
Шат яшәгез гомергә.
Кар бураннар туздырып,
Барыгызны туңдырып,
Ерак юллар үттем мин,
Сезгә килеп җиттем мин.
А.б. Хуш киләсең, Кыш бабай,
Әйдә, тизрәк уз, бабай.
Балалр сине көтте,
Тагын бер яшькә үсте.
9 бала. Рәхмәтсиңа, Кыш бабай,
Чыршы китергән өчен.
Яңа елга һәммәбезне
Матур бизәгән өчен.
Кыш бабай. Исәнмесез, дусларым! Яңа ел белән сезне!
А.б. Исәнме, Кыш бабай! Безнең чыршыныңутлары янмый бит әле.
Кыш бабай. Хәзер, хәзер без моны төзәтәбез. (чыршы янына килә, тылсымлы таягы белән селки). Чыршы, чыршы кабын син, утларыңны балкыт син!
(Чыршыда утлар яна)
Кыш бабай. Чыршы янына чакырам,
Матур итеп басыгыз.
Яңа елда әйлән – бәйлән
Җырлап – биеп алыгыз.
Җыр “Исәнме, Кыш бабай”
Кыш бабай. Сезнең белән бигрәк күңелле булды. Бераз эсселәп тә киттем.
Су эчәсем килә. (Чокыр тотып Төлке белән Песи йөгереп керәләр).
Төлке. Ай, Кыш бабай,эчәсең киләме? Менә безнең тәмле суыбыз бар. Авыз итеп кара.
Песи. Сусауны бик тиз баса.
Кыш бабай. Нинди эчемлек соң ул?
Песи. “Йокыкола”
Кыш бабай. Бер дә ишеткәнем юк мондый эчемлек турында.
Төлке. Менә дигән эчемлек ул. Син эчеп кара.
Кыш бабай. Ярый алайса, бирегез. Бик сусадым мин.(эчә) Ай, нәрсә булды миңа?.. күзләрем йомыла... йоклыйсы килә... йоклап китәм бугай... (йоклый).
Төлке. (шатланып). Менә булды!
Песи. Йоклаттык бит бабайны. (Чыршы артына качалар. Кар кызы керә)
Кар кызы. Исәнмесез, кадерле дусларым. Менә мин дә килеп җиттем. Кыш бабайны күрмәдегезме сез?.. Ай, бабакайга ни булган? Йоклый түгелме ул?
Төлке. Әйе, йоклый шул, арыгандыр.
Песи. Ә син безнең белән барырсың. Без сине бүләкләргә алыштырып алабыз.
Кар кызы. Болай булмый бит. Явызланмагыз!
Төлке. Әйдә ,тизрәк. Әнә Кыш бабай уяна инде. (Кар кызын алып чыгып китәләр).
Кыш бабай (уянып). Ой, нәрсә булды бу?.. Балалар бәйрәм хөрмәтенә шигырьләр әзерләгән, ә мин йоклаганмын. Ягез, нәни дусларым, миңа шигырьләрегезне сөйләгез инде.
10 бала. Әй, Кыш бабай, Кыш бабай
Безгә якын дус бабай!
Көтеп алдык без сине,
Күңелләргә хуш бабай.
11 бала. Ак туныңны кигәнсең,
Безне котлап килгәнсең,
Сине көтеп торганны,
Әллә каян белгәнсең.
12 бала. Кыш бабай, син дә,
Нәни булдыңмы?
Безнең шикелле
Чана шудыңмы?
Кар тәгәрәтеп
Шар ясадыңмы?
Сиздерми генә
Кар ашадыңмы?
13 бала. Кыш бабайның куллары
Салкын диеп уйладым.
Башымнан сөйгән иде,
Чак –чак “эреп” куймадым.
Җылы икән , бик җылы
Кыш бабайның куллары.
Шуңа күрә гел актыр,
Аның йөргән юллары.
14 бала. Кыш бабай, Кыш бабай
Безгә бик таныш бабай.
Сакал, мыек ап – актан,
Килгән безгә ерактан.
Үзең шаян, үзең юмарт,
Үзең һаман шулай карт.
Безнең белән бие, җырла
Бүлмәбезгә ямь тарат.
Кыш бабай. Мин әле һаман уянып бетә алмыйм. Әллә берәр һөнәрегезне күрсәтәсезме?
А. Алишның “Ил гизүчеләр белән хәйлә сөючеләр” әкияте.
1 нче күренеш
Диск №48 2 – 3 яшь.
Алинә: Ишетәсезме, әтәч кычкыра!
Камилә: Таң ата бугай,
Әтәч кычкыра:
Алинә: Дустым, ә сезнең әтәч белән тавык маҗаралары турында әкият ишеткәнегез бармы?
Камилә: Юк! Сөйләп күрсәт әле, зинһар өчен!
Алинә: Ярый, тыңлагыз. ( Чирәмгә утыралар ) Әтәч белән Тавык күптәннән бергә гомер кичерделәр, бик тату яшәделәр.
( Әтәч чыга, ул тибенә, җим табып тавыкны чакыра. )
Әтәч: Тавыккаем, матуркаем,
Әнә бер бөртек таптым,
Ялгыш авызыма каптым,
Каптым да ялгыш йоттым.
Хәзер тагын эзләрмен,
Тапсам, сиңа бирермен.
Тамагыңны туйдырырмын,
Күңелеңне күрермен.
Тавык: Кыт – кыт кытыйк, кыт – кыт кытыйк.
Көндә бөртек, көндә бөртек.
Туйдым шул бөртегеңнән.
Телим дөнья күрергә,
Сахраларда йөрергә.
Кыт – кыт кытыйк, кыт – кыт кытыйк.
Дөньялар гизеп кайтыйк.
Әтәч: Булсын, әйдә синеңчә,
Кузгалыйк иртән – иртүк.
Кикрикүк – кикрикүк.
( Күңелле көйгә кагына – кагына чыгып китәләр.)
2 нче күренеш
Диск №52 2 -3 яшь.
( Урман күренеше. Кошлар сайраган тавыш. №19 2 – 3 яшь. Күбәләкләр вальс бии. Сәхнәне уратып Әтәч белән Тавык килеп керәләр.)
Тавык: Әтәчкәем, бәгыръкәем, бер ботак сындыр, мине куандыр, яшел яфрак та булсын, кызыл җимешләре дә...
Әтәч: Тавыккаем, булдырам, хәзер, хәзер сындырам.
( Әтәч ботакны сындырырга маташа, шулвакыт каршысына Куян килеп чыга.)
Куян: Кем ул минем урманыма баш булмакчы, сорамый – нитми агачларымны сындырмакчы? Бик кирәк икән, рөхсәт сора.
Әтәч: Сызыйк тизрәк без моннан, сындырырбыз соңыннан. Монда дөньяда тиңе булмаган ерткычлар яши икән, киемнәре соры, колаклары ярты метр икән, бик усал ерткычлардыр, безнең өчен куркынычлардыр, кош ите ашаучылардыр.
( музыка. Әтәч белән Тавык урман эченнән алга таба китәләр. Чикләвек агачы янына тукталалар.)
Тавык: Әтәчкәем, бәгыръкәем, кыт - кытак, кыт – кытак, сындырып бирче бер ботак, яшел яфраклысын, чикләвеклесен.
Әтәч: Тавыккаем, сындырам, хәзер, хәзер булдырам. ( Әтәч каршына Тиен килеп чыга.)
Тиен: Әй, кем ул, кем урманда йөри, кем ул минем чикләвек агачымны сындырырга тели?
Әтәч: Сызыйк тизрәк без моннан, сындырырбыз соңыннан, күрәсеңме,нинди усал ерткычлар бар, безгә, ахры, бу зур урман булыр тар. Колагын күрәсеңме, утыртып тора, йонлач койрыгын селеккәләп куя.
( музыка. Әтәч белән Тавык урман эченнән алга таба китәләр. Кыргый аламгач янына тукталалар.)
Тавык: Әтәчкәем, бәгыръкәем, ничек тә булса кара, ике – өч кенә алмалы нәни ботак булса да ярар.
Әтәч: Тавыккаем, булдырам, хәзер, хәзер сындырам. ( Әтәч ботакны селкетә. Алмагач артыннан Төлке килеп чыга.)
Төлке: Хуш килдегез, рәхим итегез, өемә керегез, түремә узыгыз, кунагым булырсыз. Аякларыгыз арыгандыр, сусагансыздыр, талчыккансыздыр. Мин сезне күптәннән көттем, сезгә дип күчтәнәчләр дә хәзерләгәндәй иттем. Урманнан иң кызыл алмалар сайладым, сезнең өчен генә саргаеп өлгергән чикләвекләр җыя алдым, бәхетегез шул икән, ризыгыгыз мул икән.
Әтәч: Кара әле, монда ерткычлар нинди яхшылар икән.
Төлке: ( үз – үзенә ) Менә дигән тәмле ашлар...Менә юләр башлар, үзләре килеп керделәр. ( Тавык белән Әтәчкә ):
Әйдә керик өемә,
Кунак булырсыз менә.
( Әтәч белән Тавык Төлкенең өенә кереп китәләр)
Төлке: Утырыгыз шушында,
Ашый торыгыз, менә.
Мин күршегә кереп чыгам,
Танышырга чакырам.
( Төлке күршесе янына йөгерә. Бүре чыга.)
Бүре: У – у – у – у, у – у – у – у!
Ничә көн инде мин ач,
Куян тотып булмагач,
Хәлем бер дә яхшы түгел
Азык табып булмагач.
Төлке: Күршекәем, кара әле,
Минем арттан бар әле
Анда ике юләр баш-
Пешереп ашарбыз тәмле аш. ( Китәләр )
( Төлке өе яныннан Куян узып бара. Өйдән Тавык белән Әтәч чыгып баралар.)
Куян: Син, Әтәч әфәнде, артыграк батырланасың, берни белмичә кыланасың, Төлкенең кем икәнең соңгарак белерсең, бу өйгә керүеңә бик үкенерсең, ләкин ул чакта инде соң булыр, хәйләкәр төлкенең тамагы туйган булыр.
Тавык: Монда бит шундый яхшы ерткычлар яши, алар беркемгә дә тимиләр.
( Тиен килеп җитә һәм ул да кызып сөйләп китә. )
Тиен: Бу оядан тизрәк сызыгыз, төлке кармагыннан котылыгыз. Төлке ул бик хәйләкәр ерткыч, аның өендә калу бик куркыныч.
Әтәч: Төлке безне шундый шат каршы алды. Аның турында бездә бик яхшы фикер калды.
Тиен: Әй, юләр башлар, хәзер икегезне дә пешереп ашар.
( Әтәч капчыкка күз сала, аның тавык йоны белән тулы икәнең күрә. )
Әтәч: Ай – ай, харап булганбыз, чыннан да бик ялгышканбыз!
Тавык: Кыт – кыт кытыйк, кыт – кытыйк.
Әйдә тизрәк сызыйк. ( Әтәч белән Тавык чыгып качалар, Төлке белән Бүре аларны эзлиләр, ләкин таба алмыйлар.)
Бүре: Нихәл инде буу – у?
Ышандым шушы Төлкегә,
Калдым шулай көлкегә. ( Төлке белән Бүре башларын иеп чыгып китәләр. )
( Музыка тавышы кире ишегалдына алып кайта. )
Алинә: Шулай итеп, Әтәч белән Тавык чак исән калганнар.
Камилә: Нинди кызык әкият!
Алинә: Әйдәгез, дуслар, әтәч – тавыкларны ашатыйк. Ил гизәргә чыгып китмәсеннәр, хәйлә сөючеләргә эләкмәсеннәр.
Җыр:
15 бала. Йомшак кына кар яуды,
Бөтен җирне каплады.
Ап – ак булды болыннар,
Ап –ак булды киң кырлар.
16 бала.Кыш бабай килгән,
Ап – ак тун кигән.
Көтәм: кем генә
Чыгар дип өйдән.
Чыксаң чеметә,
Битне өшетә,
Менә шул аның
Бөтен эше дә.
17 бала.
Кыш бабай. Ай, арып киттем әле мин. Картайдым шул... Ә минем оныгым Кар кызы кая соң?
Балалар җавабы.
Төлке, Песи, Кар кызы керәләр.
Песи. Нәрсә шаулашасыз? Менә ул Кар кызыгыз!
Төлке. Кыш бабай, Кар кызың кирәкме? Без аны бүләкләргә алыштырабыз.
Кыш бабай. Ай –ай –ай!!! Сез ничек оялмыйсыз? Ярар, сезнеңчә булсын, алыгыз бүләкләрне. Минем кызымны кайтарыгыз (капчыкны бирә)
Песи белән төлке капчыкны алып чыгып китәләр.
Кыш бабай. Исәнме, кызым! Менә, ниһаять, син безнең белән. Ә сез, балалар, борчылмагыз. Мин бит тылсымчы. Песи белән Төлке алып киткән капчыкта чын бүләкләр түгел, ә күркәләр һәм ылыслар гына булыр.
18 бала. Суык бабай, алтыным,
Битләрең кызарган.
Әйдәле, бер биик,
Уздырып кызлардан.
Кыш бабай. Әйе шул. Инде бер матур итеп бер биеп алсаң да була! Бүген бит бәйрәм!
Кыш бабай биюе.
Кыш бабай. Ярый, инде балаларны бүләкләр белән сөендерер чак җитте. Ә бүләкләрем гади генә түгел, аларны чанага салып алып килергә кирәк..
Кыш бабай. Менә чана белән сандык та килеп җитте. Аны ачарга кирәк... Ләкин ул ни өчендер ачылмый әле...
А.б. Буратиноның алтын ачкычы бар бит! Аның белән ачып карыйк.
(Буратино ачкычын Кыш бабайга бирә).
Кыш бабай. О – о –о! Рәхмәт! Бер – ике – өч, ачкыч йозакны ач! ( сандык ачыла, аның эчендә җеп йомгагы). Син, тылсымлы йомгак, капчыкны тизрәк алып кил!
Кыш бабай йомгакны “Тылсымлы бүлмә”гә ыргыта. Беренче тартып чыгарганда йомгакта итек, икенчесендә бер баланың әтисе, өченчесендә бүләкләр белән капчык ияреп чыга. Капчык артыннан Төлке белән Песи дә керәләр.
Песи. Гафу итегез безне.
Төлке. Без бүтән алай явызланмабыз.
Икесе бергә. Бәйрәмегездә калырга рөхсәт итегезче.
Кыш бабай. Балалар, гафу итәбезме бу явызларны?
Балалар. Итәбез.
Кыш бабай. Ярар, елга бер генә килә торган тылсымлы Яңа ел бәйрәме хөрмәтенә гафу итәбез сезне. Калыгыз безнең бәйрәмебездә.
А.б. Төлке , син хәйләкәр дә, җитез дә, Яңа елны табып, алып кил әле безгә.
Кыш бабай. Менә дусларым, сезгә
Яңа ел бүләкләре.
Матур, рәхәт яшәгез,
Шул минем теләкләрем.
(Кыш бабай белән Кар кызы бүләкләр өләшәләр)
Кыш бабай. Көтеп алган очрашулар
Тиз генә үтеп китте
Инде хәзер саубуллашып
Китәр вакытлар җитте.
Күңел тынычлыгы телим,
Яңа елда һәркемгә
Бәхет, шатлык, сәламәтлек
Юлдаш булсын гомергә.
Кар кызы. Бәйрәм үтте, ә Яңа ел
Һәрбер өйгә киләчәк
Яхшы булсын, имин булсын
Матур булсын киләчәк.
Кыш бабай. Рәхмәт әйтик чыршыбызга,
Матур бәйрәме өчен.
Рәхмәт әйтик кунакларга
Килеп караган өчен.
Яңа елга яңа юлдан,
Нык басып бердәм керик.
Иң изге, саф теләкләрне
Бер – беребезгә телик.
А.б. Яңа бәхет, зур уңышлар
Алып килсен Яңа ел.
Шатлык белән үтсен һәр көне.
Котлы булсын, Яңа ел!
Җыр “Бер яшькә үстем”
1 164
47 363 
