Сценарий конкурса улигершинов

Рэгзэн Эрдэниин 110 жэлэй мүнхэ дурасхаалай эдир үльгэршэдэй

болон угай бэшэгүүдэй hарбаалжангуудые шэнжэлэгшэдэй мүрысɵɵндэ зорюулагдаhан сценари

Нээлгын ёhолол

1. Үльгэршэн. Хуур дээрэ наадана.

2. «Хун шубуудай хатар»

Урин хабартаа ганганалдаа

Урда зүгhөө зэлэ татан

Хун шубууд эхэ түрэл тоонтоёо

Эрьежэ ерэбэ, харыт, хүн зон!

Хун шубуун гарбалтай

Хуhан модон сэргэтэй

Хори буряад омогтой

Элинсэг эсэгэмнай – Хорёодой

Элинсэг эхэмнай – hүн сагаан хун шубуун

Элинсэг таабаймнай нютаг

Эхэ эсэгымнай отог.

Галаа бадараажа, гарбалаа сахижа

Олон зуугаад жэлнүүд соо үнэр баян,

Жаргалтай hуунабди.

Хориин арбан нэгэн эсэгын алдарта

Тугуудай жагсаал.

Мэргэн Хоридой баабай

Мүнхэ хун шубуун эжы

Арбан нэгэн хүбүүдэй

Арюун нангин гарбални

Галзууд, Хуасай, Хүбдүүд

Гушад, Харгана, Шарайд

Худай, Бодонгууд, Сагаан

Хальбан, Батанай гэгдээ.

Арбан нэгэн эсэгэ

Алтан угаа баталжа,

Үлгэн дэлхэйн энгэртэ

Үнэр баян үдэhэн.

Үлгэн дэлхэйн үргэндэ

Үдэн, таран үнэржɵɵд

Хори буряад алдартай

Холо ойгуур суурхалай.

Түрэл арадай түүхэ гайхамшаг

Түрэ наранайнь тугууд мандана.

Хүндэтэ нүхэд! Хориин арбан нэгэн эсэгын алдарта хүбүүд басагад, айл аймаг нигүүлэсхы сэдьхэлэй дулаан ольhондо бадарhан hайхан хэрэгнай мүнхэ болог, уг удамаа hанажа, дурсажа, сахижа, гамнажа ябагты!

( Зүжэгhөө хэhэг )

1-хи хүтэлбэрилэгшэ

Хүндэтэ холо ойрын айлшад, нютагаархид, Рэгзэн Эрдынеевэй үри хүүгэд, аша зээнэр, түрэлхид, багшанар би hурагшад.

Булган талын дэбисхэр дээрэ

Бабжа Баатарай домогто газарта

Бултанда hайхан Эгэтын-Адаг нютагта

Барандаа суглараад байhан та

Бүгэдэндэ үнэн зурхэнэй халуун амар мэндэ!

2-хи хүтэлбэрилэгшэ

Нютагаймнай омогорхол болоhон,

Хори буряадай үльгэршэн, түүхэшэн,

Шүлэгшэн, дуушан, «Эгэтын дасанай түүхэ»

номой автор, «Буряадай түрүү хүнүүд»

конкурсын «Сагаан Yбгэн-97»

номинациин лауреат, «Буряад Республикын

соёлой габьяата хүдэлмэрилэгшэ Эрдынеев

Рэгзэн Эрдынеевичэй 110 жэлэй ойн гэрэлтэ

дурасхаалда эдир үльгэршэдэй болон угай

бэшэгуудэй hарбаалжангуудые шэнжэлэгшэдэй

мүрысɵɵн – урилдаан зорюулагдана.

3-хи хүтэлбэрилэгшэ

«Гэсэриада-95» гэжэ hайндэрэй үльгэршэдэй конкурсын илагша, мүн 1998 оной папа Тушэмиловэй 120 жэлэй ойдо зорюулагдаhан үльгэршэдэй конкурсын 24 хүниие оройлжо, түрүү hуурида гараhан. Эндэл Рэгзэн Эрдынеевичэй суута үльгэршэн гэhэн нэрэнь онсо тэмдэглэгдэhэн.

4-хи хүтэлбэрилэгшэ

Өөрынгөө уг үндэhэн мэдэхэгүй хүн адагуусанда адли байна. Үбгэ эсэгэеэ мэдэхэгүй хүн малгайтай мал болоно. (Хүхэ сударай hургаалнуудhаа)

Рэгзэн Эрдынеевич өөрынгөө уг гарбалые тоолоходоо, 20 үе хүрэтэр мэдэдэг, хөөрэдэг байгаа. Гайхамаар даа. 1989 ондо нютагтаа уг гарбал, гэр бүлэ тухай хɵɵрэлдɵɵ эмхидхэжэ, «түхэреэн дабжад» үнгэргэhэн юм. Эндэhээл эхи абажа, уг гарбалаа шэнжэлхэ, угаа тоолохо, угай hарбаалжангууд зохёохо ажал хэрэг ябаhан байна.

5-хи хүтэлбэрилэгшэ

Буянтай ажалнуудые эрхилэгшэ, найр наадануудые, ёhо заншалнуудые hэргээн бадараажа, нютагайнгаа зоной сүлөө саг, амаралтые зүбɵɵр эмхидхэхы тула Рэгзэн Эрдынеевич тэмсэжэ, оролдожо ударидажа ябаал даа.

6-хи хүтэлбэрилэгшэ

Үльгэршэн, түүхэшэн сэдьхэлэйнгээ бодолоор шүлэгүүдые, дуунуудые найруулдаг, тэдэнээ уянгатуулан hайханаар гүйсэдхэдэг алдартай байhан.

7-хи хүтэлбэрилэгшэ

Үльгэршэн үбгэнэй аман зохеолой абдарhаа

Үндэр наhатай үльгэршэ гэгдэдэг

Улаалзай хүхүүрэй хүбдүүд угай

Рэгзэн Эрдэниин уряалжа байнал

Ухаандаа хадуужа, анхаралдаа абыт!

Үхибүүд шүлэгүүдэй хэhэгүүдые, үреэлнүүдые уншана

1. Алтатай, алмазтай,

Ангаар баян хангай тайгатай

Амгалан зоной, алдар солото

Ярууна нютаг!

Үзэсхэлэнтэй, үргэмжэтэй

Үдэ, Эгэтэ үнгын баялигтай

Үргэн зоной үнэр баян

Яруунын аймаг.

1. Гурбан голой бэлшэртэ

Галаа түлэhэн газарнай

Гушан оной үехэндэ

Гэрээ табиhан нютагнай.

1. Энхэ мүнхын заяатай

Эгэтын-Адаг нютаг лэ

Үритэй хоёр хабсагайдаа

Үндэгэн, хурьган зэндэмэнитэй лэ.

1. Зэнхимэ талатай Эгэтэмнай

Зургаанхан хиидээрээ толотуулна

Зальбарха манай золтойдо

Жагарhаа заларагсан Занданхан Жуу.

1. Үдэ Эгэтэ аршаан булагтай

Үржэл hайтай үлзы нютаг

Үндэhэн соелой гуламта бадаруулhан

Үбгэд хүгшэдынь аша габьяатай.

1. Хун сагаан хониднай

Хотоймо талаараа дүүрэн байг лэ!

Хоймороор hууhан түрүүшүүлнай

Хододоо сарюун hууг лэ!

1. Табан хушуун малнууднай

Тала дайдаяа бүрхөөжэл байг!

Түмэн золтой үри хүүгэднай

Түгэс эрдэмээр ургажал байг.

1. Хотон зоной хүбүүд басагад

Хабаяа туршахаа зэhэжэ байна.

Хотон хоорондо мүрысɵɵн эхилжэ,

Хабаараа илагшад шан абахал.

1. Амгалан нютаг, нугаяа суурхуулжа,,

Арад зоноо, аха дүүнэрээ баярлуулжа,

Атаатай мурысɵɵндэ олоорон жагсан

Амжалтануудые туйлан харуулыт.

1. Бүлгэмэй манай нааданда

Бүгэдөөрөө ерэhэнтнай hайхан гээшэнь!

Бүгэдын танай сонорто

Баясан жарган наада дэлгэхэмнай hайхан.

1. Үбгэн абын ухаанhаа

Үндэhэлэн гараа үльгэрнүүднай

Үндэhэн хэлэндээ найруулhан

Үльгэр туужын hонирхомо гоень.