«Кылбуръёслэн жингрес гуръёссыя»
поэтической ӝытлы сценарий
Галина Николаевна но Леонид Сергеевич
Лекомцевъёслэн
творчествозылы сӥзем ужрад
Нуись: Стихи не пишутся – случаются,
Как чувства или как закат.
Душа – слепая соучастница.
Не написал – случилось так.
Андрей Андреевич Вознесенскийлэн кылбурысьтыз та кылъёсыз, мон малпамея, туж тупало асьмелэн туннэ поэтической ӝытмылы, кудӥз нимаське «Кылбуръёслэн жингрес гуръёссыя».
Озьыен. Ӟечбуресь, гажано эшъёс – пиналъёс, дышетӥсьёс, ваньмыз, кинлы сюлмызъя поэзия, кылбур гожтон но лыдӟон, кылзон.
Шумпотыса тӥледыз тодматэме потэ туннэ куноосынымы, кин понна сӥземын туннэ ужрадмы. Пӧсь ки чабонъёсын пумиталэ – Леонид Сергеевич но Галина Николаевна Лекомцевъёс. Галина Николаевна но Леонид Сергеевич – асьмелэн улосчиосмы, ёросысьтымы тодмо гожъяськисьёс но ас ужан удысазы сиё-дано ужасьёс.
- Леонид Сергеевич «Дуно вордскем интыосы» кылбураз шуэ:
«Нокин но уг тоды вераны,
Малы сюлэм весяк кыске
Дуно вордскем интыосы?»
Кытын бен али Играын улӥсь куномылэн вордӥськем интыосыз, кыӵе пичи гуртэ ялан но ялан ӧте сюлэм?
2008 арын потэм «Шонер-а мон вамышъясько» кылбур бичетысьтыз лыдӟиськом таӵе иворетэз: «Леонид Сергеевич Лекомцев вордскемын 1957 арын Удмурт шаерысь Игра ёросысь Пежвай гуртын. 1973 арын йылпумъяз Сепысь 8 аръем школаез. Быдтэмын Глазкарысь совхоз-техникумез но Ижкарысь сельхозинститутэз, специальностез инженер-механик. 1979 арын армиысь бертыса, тырше пӧртэм удысъёсын. 2000 арын шӧдтэк шорысь эшъяськиз кылбуръёсын…»
- Одӥгзэ соос пӧлысь дэмласьком кылзыны.
(«Вордскем гуртэ» кылбурез лыдӟе София Перевощикова, 7 класс)
- Леонид Сергеевич, Тӥледлы кыл сётӥськом. Вералэ, пожалуйста, кызьы пуромиз кылбур гожъян мылкыдды? Ма донгиз, ма валтӥз Тӥледыз гожъяськон удысэ?
- (Леонид Сергеевич валэктон сётэ).
- Тау. Ӟеч кылбуръёс, поэзия – со котьку кыӵе ке но йӧспӧртэм, куд-огезлы гинэ валамон дунне. Со мукет сямен учкытэ дунне шоры. Сётэ мылкыд но луонлык кылбуръёс пыр вераны ас малпанъёстэ, шараяны мылкыдъёстэ, кудъёсыз тросак люкаськемын сюлэмын. Поэзия ӝутэ милемыз огшоры улонлэсь, огшоры малпанъёслэсь но ужюгдуръёслэсь вылӥегес, со узырмытэ асьмелэсь пуш дуннемес но, мон малпамея, паськытомытэ улон шоры учкемез, улонэз шӧдэмез. Со юрттэ милемлы луыны визьмогес но чылкытгес, умойгес но чупыресгес, дӥсьтӥсьгес, ненеггес но кужмогес.
Соингес но, дыр, мон малпамея, поэзия улонмылэн ог люкетэз кадь но шодӥське. Кин ке понна пичигес люкет, кин ке понна воксё адӟонтэм, но котькин понна туж кулэ луись.
- Дуннеын ветлэ таӵе веран: «Кин ке понна поэзия – творчество, нош кин ке понна – улон». Нош Тӥ понна, Леонид Сергеевич, ма луэ поэзия?
- (Леонид Сергеевич валэктон сётэ).
- Тау. Гажано эшъёс, нош тӥ тодӥськоды-а вал, Леонид Сергеевич кылбуръёс сяна, туж усто пӧрмытэ вылэм пичиесь прозаической произведениос но шуыса. Али мон дэмласько тӥледлы учкыны но кылзыны одӥгысьтыз серемес веросысьтыз пичи люкетсэ.
(«Тодматскизы» серемес веросысь ог люкетсэ возьмато
Лекомцева Анастасия но Тепляшина Елена, 9 класс).
- Леонид Сергеевич, кытысь омыръяськоды материал серемес веросъёстэс гожтыны? Малы кылдӥз кулэлык гожтыны таӵе жанръем произведениос?
- (Леонид Сергеевич валэктон сётэ).
- Тау, Леонид Сергеевич тунсыко мадемдылы. Нош али Тӥ понна чузъяськоз кырӟан.
(Н.В.Лекомцева, Сеп культура юртын ужась,
но Е.Н.Лекомцева, А.Лужанин нимо библиотекалэн кивалтӥсез,
быдэсто кырӟан)
- Нош али дыр вуиз тодматскыны Галина Николаевнаен. «Вордӥськем шаере» кылбур бичетэз пыр Галина Николаевна тодматэ милемыз аслаз вань улон даурез ӵожелы дуно но мусо луись вордӥськем Лужан гуртэныз; кылбуръёсысьтыз тодӥськом, макем дуно но вылӥ пуктэ со ас семьязэ – гажано картсэ, дуно пиоссэ, кенъёссэ но муспотон нунокъёссэ, анай-атайёссэ; чебер но сюлэме тэронтэм яратонэн, данъяськонэн тырмемын вордӥськем шаерезлы, инкуазьлы сӥзем кылбуръёсыз.
- Али дэмласько кылзыны «Моя деревенька» кылбурысь пичи люкетсэ.
(«Моя деревенька» кыбурысь отрывоксэ лыдӟе Ускова Инга, 7 класс)
- Гажано Галина Николаевна, Тӥледлы кыл сётӥськом. Вералэ, пожалуйста, кытысь, кыӵе ошмесъёсысь омыръяськоды сокем сюлэме пыӵамон но сюлэмез бугыртымон кылъёс? Ку но кызьы лыктӥз, пуромиз гожъяськыны мылкыдды?
- (Галина Николаевна маде).
- Тау. Галина Николаевна, Тӥ ужаськоды дышетӥсь луыса. Дышетӥськоды покчи классъёсысь пиналъёсты. Юрттэ-а Тӥледлы ужады кылбуръёс гожъямды?
- (Галина Николаевна валэктон сётэ).
- Тау. «Вордӥськем шаере» сборникады пыртэмын дышетэм пиналъёстылэн, Лейсан кендылэн но пиостылэн гожъям ужъёссы. Нош пиосты но нунокъёсты кыстӥсько-а гожъяськон удысэ?
- (Галина Николаевна валэктон сётэ).
- Бадӟым тау. Нош таиз крезьгуро саламмы Тӥледлы, гажано Галина Николаевна.
(Н.В.Лекомцева но Е.Н.Лекомцева быдэсто кырӟан)
- Гажано Леонид Сергеевич но Галина Николаевна, бадӟым тау шуиськом ужрадамы лыктэмды понна, сӥзиськом тӥледлы юн тазалык, капчи мылкыд, семьяды тупаса но ог-огдэс гажаса улон, ужады азинлыкъёс но трос выль кылбуръёс.
(Кузьмаськом пичильтак синпель кузьымъёс)
- Нош поэтической ӝытмес йылпумъяме потэ Леонид Сергеевичлэн «Журавли летят// Туриос лобо» кылбур бичетысьтыз «Сюрес кузя вамышъясько» кылбуреныз.
(Л.С.Лекомцевлэсь «Сюрес кузя вамышъясько» кылбурзэ
лыдӟе Т.П.Селиверстова, Сеп школаысь удмурт кылъя но литературая,
ӟуч кылъя но литературая дышетӥсь)
- Тӥледлы но, эшъёс, ваньдылы сӥзисько кияды кутыны инмысь самой яркытсэ кизилиез! Тау лыктэмдылы! (Пумыз)
137
189 745 
