Урок спаборніцтваў

Урок – спаборніцтва па прадмету “Чалавек і свет” у

2 класе на тэму “Свет жывёл” (абагульняючы ўрок).

настаўніца Супрановіч Т.В.

Мэта: выпрацаваць умовы для абагульнення і сістэматызацыі ведаў вучняў пра жывёл роднага краю, садзейнічаць актуалізацыі патрэбнасці ў гуманным стаўленні да жывёл, усведамленні вучнямі, што ў прыродзе няма карысных і шкодных жывёл.

Задачы: пашырыць веды другакласнікаў пра жывёл, іх разнастайнасць; садзейнічаць развіццю ўмення распазнаваць і апісваць жывёл, тлумачыць асаблівасці іх будовы ў сувязі з ладам жыцця, тлумачыць і ўстанаўліваць сувязі ў прыродзе; падтрымліваць цікавасць да вывучэння звяроў.

1. Арганізацыйны момант.

- Я хачу пажадаць … ( вучні паварочваюцца адзін да другога тварам і жадаюць паспяховай і цікавай працы на ўроку).

2. Уводзіны ў тэму, мэта ўрока.

- Сёння вас чакае цікавы ўрок-спаборніцтва, на якім вы будзеце гуляць, разам шукаць і знаходзіць адказы на цікавыя пытанні, задаваць іх, практыкавацца ў кемлівасці, спаборнічаць у выкананні розных заданняў.

( Вучні дзеляцца на 2 каманды, даюць ім назвы, напрыклад “Вавёрачка” і “Сінічка”).

3. Праца па сістэматызацыі і замацаванні ведаў.

Першае выпрабаванне “Кемлівасць”.

1) Гульня “Назаві чацвёртае”.

Барсук, зубр, балотная чарапаха…(любую жывёлу,занесеную ў Чырвоную кнігу Рэспублікі Беларусь).

Лімонніца, конік, муравей…(любое насякомае).

2) Гульня “Хто лішні”.

-Назаві лішнюю жывёлу ў кожным радзе і растлумачце свой выбар.

Барсук, мядзведзь, заяц-русак, воўк. (Заяц-русак як

раслінаедная жывёла).

Заяц, лось, ліса, мыш. (Ліса як драпежнік).

Вуж, трытон, гадзюка, яшчарка. (Трытон як земнаводнае, астатнія – паўзуны).

Заяц, вавёрка, рысь, дзяцел. (Дзяцел як птушка).

Качка, лебедзь, гусь, бусел. (Бусел як невадаплаўваючая птушка).

Буры мядзведзь, зубр, бабёр, вярблюд. ( Вярблюд- на тэрыторыі Беларусі яго няма).

3) Галаваломка “Пераўтварэнні”.

(На выкананне даецца 2 хвіліны. Прачытайце словы, замяніце ў іх адну літару так, каб атрымалася назва жывёлы, заданне даецца на картках 2 камандам аднолькавае).

Ліда - … (ліса); палка -… (галка); барана -… (варона);

сон –…(сом); паяц –…(заяц); ліст –…(ліса); бук-…(жук).

Фізкультхвілінка для вачэй.

Другое выпрабаванне ”Хто трапны?”

1). Гульня “Пазнай па прыкметах”.

1. Вялікі, рыжы, любіць мёд, рыбу – гэта…(мядзведзь).

2. Рыжая, прыгожая, хітрая, любіць мышэй, зайцаў- гэта…(ліса).

3. Вынослівы, клапатлівы, зубасты, шэры, драпежнік –гэта…(воўк).

4. Шэры, белы, труслівы, асцярожны, любіць моркву, кару асінкі – гэта… (заяц).

5. Пушыстая, любіць арэшкі, грыбы – гэта…(вавёрка).

6. Чырвоны клюў і ногі, доўгія, чорна-белае апярэнне, жабы – гэта… (бусел).

7. Верх чорны, ніз – белы, доўгі вільчаты хвост, харчуецца насякомымі, якія лятаюць у паветры – гэта…(ластаўка).

8. Доўгі нос, маленькія вочкі, кароткія ножкі, не баіцца гадзюк – гэта…(вожык).

Трэцяе выпрабаванене “Шукай сувязі”.

1). Гульня “ Таму, што… “

(Раздаюцца карткі, на якіх запісаны пачатак аднаго ці двух сказаў, вучні павінны закончыць іх).

1. Вавёрка хутка скача з галінкі на галінку таму, што у яе… .

2. Зайца-беляка не бачна зімою на снезе таму, што…

3. У ваўка доўгія, моцныя ногі, таму ён… .

4. Рапуха робіць скачкі значна далей, чым жаба таму, што у яе… .

5. У сініцы цэпкія доўгія лапкі, таму яна… .

2). Гульнявое заданне” Знайдзі прапушчанае”.

(Заданне выконваецца на дошцы 2 прадстаўнікамі ад кожнай каманды).

1. Асінка - … - воўк; сасна – караед - … .

2. Жолуд – мыш - …; расліна – камар - … .

3. Расліна – гусень – рапуха - …; капуста - … -жаба.

Фізкультхвілінка “Пантаміма звяроў”.

3). Бліцвіктарына.

1. Колькі ног у жужаля? (6).

2. Жывёлы, якія пакрыты луской і сліззю, маюць плаўнікі, дыхаюць пры дапамозе жабраў – гэта…? (Рыбы).

3. Якая птушка выводзіць птушанят зімою? (Крыжадзюб).

4. Якога жука называюць сябрам агарода? (Жужаля).

5. Якая птушка злосны вораг мышэй? (Сава).

6. З якім дрэвам “дружаць” зайцы, ласі, бабры? (Асіна).

7. Якая птушка нашых лясоў мае самы цікавы клюў?

(Крыжадзюб).

8. У якой птушкі цікавае размяшчэнне пальцаў на нагах: два – уперадзе, два – назад? (У дзятла).

4. Падвядзенне вынікаў урока.

(Падводзяцца вынікі спаборніцтва, падлічваецца колькасць набраных кожнай камандай кружкоў).

5. Рэфлексія.

- Што больш за ўсё спадабалася на ўроку?

-Што больш за ўсё здзівіла?

-Што вы хочаце сказаць адзін аднаму?

-Якую б жывёлу вы нарысавалі б на агульным малюнку?

-Які настрой у вашай жывёлы? – Чаму?

6. Дамашняе заданне.

Адказаць на пытанні рубрыкі “Правер сябе” (с 109-110 вучэбнага дапаможніка).