Жанр письма в удмуртской литературе "Письма помогают"

Пётр Владимирович ДАВЫДОВ,

Дэри ёросысь Юськи шоръёзо школаысь

удмурт кылъя но литературая дышетӥсь

СЮЛЭМЕЗ БУГЫРТӤСЬ, МЫЛКЫДЭЗ БУРДЪЯСЬ, ӞЕГ НЯНЬ КАДЬ ГОЖТЭТ

Эпиграф: «Пероен гожтэмез тӥрен кораса уд быдты».

Визькыл

Уроклэн мугъёсыз: гожтэтлэсь улонын интызэ шараяно, чеберлыко произведениосын кутӥськемзэ эскероно, гожтэт гожтон быгатонлыкез азинтоно-радъяно, вордскем анай кыллы гажан но данъяськон мылкыд пыӵатоно, вераськон кылэз волятон бордын ужано, эскероно гожтэтлэсь туала улонын интызэ.

Уроклы ужтӥрлык: интерактивной доска, ноутбук, мультимедийной проектор, карточкаос, конвертъёс, почтовой ящик.

Личностной результатъёс: ортчоно темая мылкыдзэс шараяло, гожтэтлэсь кулэлыксэ валало.

Метапредметной результатъёс:

Регулятивной УУД: темаез пукто, тодэмзылы, ог-огзылэн текстъёссылы дунъет сёто, янгышъёссэ палэнто.

Познавательной УУД: юанъёс сёто, кулэ ивортодэт утчало, тодэмзэс радъяло, йылпумъянъёс лэсьто.

Коммуникативной УУД: малпанъёссэс шара но гожтыса верало, туркымъёсын но кузъёсын ог-огзэс валаса, кенешыса ужало,ог-огзэсты сак кылзо.

Предметной результатъёс: гожтэтлэсь аспӧртэмлыксэ шараяло, стилез ласянь эскеро, вазиськонъёссэ чаклало, памятка кылдытыны, гожтэт гожтыны тыршо.

Уроклэн мынэмез.

Ӧтён люкет.

Дышетӥсь. Ма сярысь туннэ урокын вераськомы, тододы, визьмес сынаса – кроссвордэз быдэстыса. Сое усьтоз юанъёслэн валэктонъёсысьтызы нырысетӥ букваоссэ бӧрсьысь радъяса.

• Литератураын чеберлыко амалъёсын суредам адями, кудӥз огазея трос муртъёслэсь аспӧртэмлыкъёссэс. Куд-ог дыръя сое персонаж шуо. (Герой).

• Улонысь зэмос учыръёс но адямиос сярысь пичи эпической произведение, кытын верамын адямилэн кытын улэмез но ужамез сярысь, возьматэмын реальной учыръёслэн ортчемзы. (Очерк).

• Вашкала литератураысь святой адямилэн улэм-вылэмез сярысь пыр-поч мадён. (Житие).

• Кык яке тросгес предложениосты куспазы герӟаса веран. (Текст).

• Произведенилэн яке нимысьтыз главаослэн азьпалазы интыям, гожтэмлэсь валтӥсь малпанзэ но пуштроссэ мургес усьтыны юрттэ. (Эпиграф).

• Оборот, кудаз кылъёс яке быдэс предложениос юри мукет, переносной значениен кутэмын луо яке одӥг предмет, действие сярысь верамын луэ мукет предметлэн, действилэн тодметэз пыр. (Троп).

Озьыен, кыӵе кыл пӧрмиз? (ГОЖТЭТ).

Туннэ урокмы сӥземын гожтэт жанрлы, солэн кыл устолыкеныз тодматсконлы, гожтэтлэсь кулэлыксэ шӧдыны тыршоме. Туала улонамы туж шер пумиталод ни гожтэт пыр ог-огеныд кусып возисьёсты. Сое мобильной телефон но SMS-каос воштӥзы. Озьыен, гожтэт гожъян быгатонлык но ышемын, шуыны луоз. Ӟечкылан открыткаос сярысь веранэз ик ӧвӧл ни.

-Кыӵе мугез но кулэлыкез соосты гожъямлэн?

(Ваче вераськон, маке выльзэ ивортон-тодон. Ог-огдэ шумпоттон амал, мӧзмем мылкыдэз зӥбон, малпанъёсын люкиськон, шуг-секытъёсты вормон. Гожтэтын адямилэн пуш дуннеез но улон шоры учконэз туж яркыт усьтӥське. Гожтэтъёс вылэ пыкиськыса, гожтӥсь муртлэсь ӟырдыт сюлэмзэ, котырысь адямиосын кусыпъёссэ, улон-вылонзэ адӟыны луэ. Гожтэт тодэ ваёнъёсы берытскытэ, кылмес узырмытэ, историлэн оглюкетэз луэ. Гожтӥсь муртлэн почеркез трос вераны быгатэ авторез сярысь).

Вакчи юан – вакчи веран:

-Кыӵе пумо гожтэтъёсты тодӥськоды?

(Эшлыко, ӟечкылан, деловой, публицистической).

-Капчи-а со – гожтэт гожтон уж?

-Кызьы малпаськоды, гожтэт гожъянлэн дырыз быриз шат?

-Улонады кинлы ке гожтэт гожъямды вань-а?

-Вань ке, утиськоды-а соосты?

-Конвертэ поныса келям гожтэтъёсты басьямды потэ-а?

- Кыӵе кылъёстэк гожтэт гожтыны уг луы?

(Ӟечбуръяськон, ӟечъяськон кылъёстэк).

-Ма курысалды гожтэтлэсь, со улэп луысал ке.

Туж шуныт мылкыдын пачылмемын фронтысь ыстэм гожтэтъёс – вордӥськем палъёсын, ӵыжы-выжыосын кусып возён амал. Тушмонэз синазькыль карон, буйгатон кылъёс, Родина понна ваньзэ сётыны дась луэмзы шӧдӥське отын. Нош дорысь вуэм гожтэтъёс солдатлы тушмонэн нюръяськыны выль кужым-ӟигар пыртылӥзы. Со чуръёслэн дышетон-воспитательной значенизы адӟем карымон луэ. Туннэ ке но утиськыса возисько на лек тылӝуын, окопъёсын вордӥськем куинь сэрего иворъёс, дыръёсын ӵужектэм но улэп кылем макеос. Тани, кылсярысь, Филипп Кедров 1941-тӥ арын декабре семьяезлы ыстэм гожтэтаз вера (гожтэтъёсты вольыт кылын лыдӟо юри дасяськем муртъёс):

• «Мон окружениын вал. Вераны шуг, мамында секытэз ӝутӥ со каргам фашистъёс улын. Озьы ке но, мон пленэ ӧй шедьылы. Нош кулон ялан ми котыртӥ бергаз. Ялан партизанской отрядын вал… Ми ноку но ӧм малпалэ, сьӧсьёс вормозы шуыса, ми ялан оскыса улӥмы Горд Армилэн вормонэзлы».

• 1942-тӥ арын со гожтэ: «Куатетӥ нуналзэ ини передовойын, тушмонлэн ныр улаз ик. Али ми оборонаын сылӥськом, соин ӵош ик тушмонлэсь кужымзэ быдтыны тыршиськом».

• 11-тӥ ноябре А.С.Бутолинлы гожтэтаз со вера: «Ӝоген кык толэзь тырмоз госпитальын кыллеме».

• 12-тӥ декабре: «Госпитальын кема кыллё на. Ранае нокызьы уг йӧна». Соку ик ивортэ, эшъёсы, пе, веразы: мыным, пе, сёто 2-тӥ степенё Отечественной война орден.

Гожтэтъёсысь чуръёс:

• «Мон асме шудо адямиен лыдъясько – та дырозь со тевтонъёсын нюръяськыны быгатӥсько. Озьы мон та сӥё-дано войнаын йылысеныз пумозяз ик тыршыса ожмасько, дыр. Тани дорам бертӥ ке, мар но со вераны но, гожтыны но быгато».

• «Мон выльысь строе берытско но Ленинградской фронтын со каргам немчураез жуго. Татын милям профессимылы уж тырмыт на. Мон гожтӥ вал ини, тушмон яратоно Ленинградмес ыбылэ на шуыса, бадӟым изъян вае, калыкез виылэ. Со понна ми пунэмзэ берыктом. Соин ик мон та самой секыт фронтэ кылёно кариськи. Татын нюръёс, сыӵе нюръёс – син азе пуктыны ик шуг. Татын ожмаськыны секыт. Ну, татын ик дышетскеме потэ тушмонэз быдтыны. Улэм ке кыли, мынам боевой улонам выль опыт луоз. Быри ке – герой сямен. Ленинград дорысь со сьӧдкылез таркан – бадӟым дан. Дано родной Ленинград асьмелы шуд но эрик ваиз. Ми сое татын утёмы».

• «Трос адӟиськиз война аръёсы. Пырак вераны кулэ – мон пересьми ини. Родинаез яратонэ нош мынэсьтым сюлэмме ӧте отчы, кытын секыт. Гужем монэ дивизилэн газетаз кельтыны медо вал, мон ӧй кыльы. Со уж мыным тырмоз на война бере но».

Дышетӥсь: Кыӵе литературной произведениосын пумисько гожтэтъёс но вакчи чуръем гожтэм запискаос?

Вералэ кинлы гожтэмын, произведенилэсь нимзэ, авторзэ. Та личной яке деловой гожтэтъёс? (Класс ужа туркымъёсын).

1. «…юн жуго татын, чиданы уг луы. Эн сётскы пие кырныжлы… быдты… Чомо».

( Дангырлэн атаез семьяезлы. Личной. Кедра Митрей « Секыт зӥбет»).

1. «Ызрастутье… ниски поклон… и Сыну дангыру белва Лича до срои земли… собвено ручо… Прол Битов».

( Дангырлэн атаез семьяезлы. Личной. Кедра Митрей « Секыт зӥбет»).

1. «Гажано Буров эш! ОДВКА-лэн командованиез, тӥлесьтыд армие лыктыны мылкыд сётыса гожтэмдэс басьтыса, тӥ вылэ лэзем вань документъёсын тодматскиз но тӥлесьтыд армие лыктон мылкыддэс ӟечкыла. ОДВКА-лэн штабез тӥледыз аслаз армияз зачислить карыны соглаш луэ. Та ласянь интыысь военкомлы валэктон ыстэмын. Со ик тӥледыз лэзёз ОДВКА-лэн штабаз».

(Дальневосточной Горд Армилэн командованиез Демилы. Деловой. Пётр Блинов «Улэм потэ»).

1. «Умоесь-а, мусо семьяе?

Кызьы вераны но уг тодӥськы, со быдӟа мынам шумпотонэ. Бурдтэк инме лобӟи кадь, тани гожтӥсько гожтэт. Кудзэ вералом, мар бордысен кутском, сомында люкаськизы верано кылъёсы. Быдэс куать ар мон тӥлесьтыд палэнын, со дырысь нырысьсэ гожтӥсько.

Кыӵе улӥськоды меда, мусоосы, вань на меда, ӧвӧл ни меда – уг тодӥськы. Трос малпай, гожтоно-а, ӧвӧл-а шуыса. Всё-таки гожтоно кариськи, всё равно Бектыш калык быдэскын быремын уз луы, кин ке но лыдӟоз, кыӵе ке но ивор вуоз.

Гожтӥсько, мусоосы, окопысен. Оло нош, лыдӟыны но уд быгатэ, куазь ӝуалтэмын, кин кынме, шунтӥськон инты ӧвӧл, ӵабъяй мырдэм озьы но тазьы. Шунтӥськыны уг лэзё, анай, Катя, мусоосы. Мон куштэмын осконтэмъёс пӧлы, самой секыт уже – войналэн тылаз. Куать толэзь тырме ини фронтэ шедеме. Со дырозь весь тюрьмаын кыстаськи. Мае но ӧй адӟы та аръёс куспын, мусоосы, малпаса гинэ йырсиос пежыр султо… Кызьы-о вералом тӥлед…пересьми. Жугыса ӝыны тазалыкме талазы… Оло, уд но оске, зарниосы, йырам тачак ини пурысьтам йырсиосы… Озьы но уг пот кулэме, улэме потэ, тӥледыз адӟеме потэ, тӥ дӥне куриське сюлэм. Эх, кыӵе меда улӥськоды? Вань на меда пересь анае? Вань ке но, пыд йылаз но султыны уг быгаты ни, луоз. Будэ меда нуные? Оло нош, собере дуннеез адӟытэк но кулӥз со? Мынам ӟырдыт сюлэмы, мусо Катяе, вань секыт тон вылэ йӧзор сямен выдэ ини.

Эн куректы, чагыр дыдыке, одӥг пол мон всё равно берто. Тани пумыз вуоз войналэн, мон улэпкын берытско доре, кезьыт но монэ уз кынты, тыш-чабкы но уз погырты, сьӧсь пуля но уз шедьты. Оске, мусоосы…

Одӥг но ӝегатскытэк гожтэ возьматэм адресъя мыным гожтэт, оло нош, кызьы ке ик киям шедьыны быгатоз. Артэ пуксьыса гожтэ вань иворъёсты…

Ваньдэс ӟыгыртӥсько но чупасько. Тӥледыз уй-нунал малпась…

(Койык семьяезлы. Личной. Филипп Кедров «Катя»).

1. «Тонэ гажаса яратэмме

Ноку но уг вунэты мон.

Тон кадяд визьмозэ, мусозэ

Ӧй шедьты туннэ но толон.

Тынэсьтыд мӧзмыны кутски ке,

Киям портреттэ мон куто,

Дуннелэн пумаз но вуи ке,

Соин мӧзмемме ортчыто.

Ӟеч лу, мусо гыдыке! Эн вунэты! Ӟеч лу!»

(Демьян Буровлэн – Любалы. Личной. Пётр Блинов «Улэм потэ»).

1. «Мусо Анна кенак, пумтэм сюресъёстӥ, тодымтэ-адӟымтэ лудъёстӥ, тэльёстӥ, шокчыны луонтэм ӟырт кезьыт куазьёсын, кезьыт зоро сӥзьыл уйёсын ми тон кадь мемиослэсь синвузэс утчаськом. Берыктом, мусо Анна кенак, мемиослэн синву шапыксылы быдэ берыктом».

(Писатель Михаил Петров геройлыко бырем Филипп Кедровлэн анаезлы. Личной. «Гожтэт» верос).

1. «Ваш сын Константин Аникеевич Камаев…пропал без вести»

(Оникейлы фронтысь. Деловой. Роман Валишин «Тӧл гурезь»).

1. «Гажано Татьяна Гавриловна! Тӥляд пиды, милесьтым гуртмес, милесьтым калыкмес мозмытон понна, улонзэ сётӥз. Ми сое ноку ум вунэтэ. Ми ӧм вунэтэ тӥледыз но, сыӵе адямиез вордыны быгатэм анаез. Тушмонэн куашкатэм но сутэм гуртмес ми табере выльдӥм, азьлолэсь но шулдыр карим но сое тӥляд пидылэн нимыныз нимамы. Ӝоген милям сӥзьыл праздникмы луоз. Со праздник ӝӧк сьӧрамы тӥледды но адӟеммы потэ. Туж матысь ӵыжы-выжыосмес кадь витиськом тӥледыз со праздник нуналамы.

Колхозникъёслэн куремзыя гожтӥз Советской Союзлэн Героезлэн Вахрушевлэн нимыныз нимам сельхозартельлэн председателез…».

(Иван Лобода Такъян кенаклы. Деловой. Михаил Воронцов «Горд кышет»).

1. «Тани Эля шумпотыса басьтэ атаезлэсь ыстэм гожтэтсэ. Атаезлэсь? Нош малы солэн киыз ӧвӧл та? «Дер.Тузьмо» кылъёссэ но Алексеев туж аспӧртэм гожтылэ вал угось – «Тузьмо» гуртэз «Кузьмаен» медам суралэ шуыса (сыӵе нимо гуртсы но вань районазы), «Т» буквае ноку но куинь боды уз пукты, одно ик сое печатноен гожтоз. Гожтэтэз усьтыны кышкаса сылэ Эля, собере конвертэз шуак гинэ кесиз. Букваос тэтчало, кылъёс сурасько. Мар та таӵе, мар та?! «…защищая социалистическую Родину…погиб…смертью храбрых…под деревней…области…»

(Алексеева Элялы. Деловой. Роман Валишин «Тӧл гурезь»).

1. «Монэ туж умой школае басьтӥзы. Ӝоген дышетскыны кутском. Стипендия но сётозы».

(Катя Сергеева гуртаз. Личной. Игнатий Гаврилов «Вордӥськем палъёсын»).

1. «Гажано Платонова эш.

Тӥляд фермаяды ужа районысьтымы маяк Галина Ивановна Лебедева. Туж куриськом, гажано Платонова эш, солэн ужан опытэз сярысь пыр-поч гожтыны. Солэн ужан распорядокез, скалъёссэ кызьы утялтэмез, маин сюдэмез, кызьы сиён дасямез – ваньмыз со районысь дояркаослы туж кулэ. Созэ асьтэос валаськоды, тӥ специалист. Оскиськом, куронмес быдэстоды шуыса».

(Ёрос газетлэн редакторез М.Андреев «Кизили» колхозысь зоотехниклы Тоня Платоновалы. Деловой. Семён Самсонов «Яратӥсько тонэ»).

1. «…Ми тӥледлы обвинительной актэз но защитникен Сенатэ сётэм кассацилэсь копизэ ыстӥськом. Дрягинэн ӵошен ми туж куриськомы тӥледыз кыкетӥ судын защитник луыны. Кыкетӥ суд Елабугаын луоз».

(Писатель Александр Баранов В.Г.Короленколы. Личной. Михаил Петров «Вуж Мултан»).

1. «…асьме калык туж гажа тӧдьы халатэн адямиосыз… Нош Атабай больницаын ужасьёс со сярысь вунэтӥллям, шӧдске. Коллектив татын бадӟым ке но ӧвӧл, со одӥг кылысь уг ужа…Главной врач А.П.Соснов эш, воспитательной уж нуэм интые, лекесь приказъёс гинэ гожъя, критикаез зӥбыса возе…Висисьёс но ӝожтӥсько больницаын пуктэм порядок вылэ…Главной врач А.П.Соснов эш мукет врачъёсын кенешытэк ужа, со ассэ татын кыӵе ке инмар интыын адӟе…Юнме шат берло дыре Атабай больницаын адямиосыз эмъян уж уродмыса кошкиз? Калыклэсь тазалыксэ утён – со приказъёс гожъян но адямиос шоры лек кесяськон ӧвӧл! Оскыны кулэ, больницалэн кивалтӥсьёсыз тае валалозы шуыса…Советской врачлэсь данзэ чылкыт но котьку вылӥын возёно!»

(«Югыт сюрес» газетлэн литсотрудникез Костя Краев – К.Бигринский. Публицистической. Геннадий Красильников «Арлэн кутсконэз»).

1. «…Студентка дыръяз Березина Р. общежитиысь эшезлэсь коньдонзэ но киын нуллон чассэ лушкам. Курсысьтызы комсомольской группа Березинаез комсомолысь поттӥз. Институтлэн дирекциез озьы ик та студенткаез исключить кароно луиз». (Институтлэн дирекциез милицилы. Деловой. Г.Красильников «Тонэн кылисько»).

1. «Война ӝог эшъяськытэ вылэм адямиосты. Эшъёсын ӵош быронлэсь но сокем уд кышкаськы ни, вормонмылы оскон юнгес луэ сюлэмын. Матысь эше луиз Сибирьын будэм пи, Степан Шаповалов. Умой адями. Война дугдӥз ке, куное ӧтё шуэ. Кин тодэ, бертыны кылдоз на-а?..»

(Петров Иван семьяезлы. Личной. Николай Васильев «Кин тон, атай?»).

1. «…Вот так да! Мон – председатель! Кыӵе ке шимес уйвӧт. Дасэтӥ нуналэз ни, нош мон весь уг оскиськы, сюлэм интыяз ӧвӧл. Малпаса-малпаса ик йырсие пежыр! ӝутске. Дорысь потыкум верамед табере, оло, уен-нуналэн пель сьӧрам. «Бер ӧвӧл на, Коля, - шуид вал. – Йырад пӧзе ке, эн мын отчы, сазьтӥськы. Кужмысь нокин уз ысты…» Ӝожомыса кылид. Верантэм жаль потӥд соку. Мӧзмыт синъёсыд мынэсьтым но сюлэмме пӧсьвуазы. Шорад учкыса, вӧсь карымон ӟыгыртэме, пульсатымон чупаме потэ вал, нош со интые лӥятон-буйгатон кылъёс гинэ но ӧй шедьты. Я, пумиським ке…» Зэм, туэзэ пумиськылыны шергес кылдоз, дыр! Тӥ Сашаен – Сьӧртыын, мон татын. Роное шат ветлысалыд на? Оло, лэзьысалзы. Озьы шуисько ке но, дышетскон ар кутскем бере, интыяд дышетӥсь уз шедьтэ, вылды. Тулысозь кызьы ке чидалом ни-а, мар-а. Собере, оло, тулысозь но витёно уз луы ай, кин тодэ.

Тыныд, пие, Сашике, одӥгзэ гинэ верало: ӟеч дышетскы, мамаедлэсь кылзӥськы. Кылем арын урокъёстэ лэсьтыны удгес чидалляськы вал, лякыттэмед но поталля – соин озьы шуисько. Ну, ничего, табере тон кыкетӥ классэ ветлӥськод ни, ваньзэ ачид валаськод, ачид воргорон! Мӧзмид ке, гожтэт гожты. Мон туж шумпото. Ачим но гожъяны тыршо… Я, ӟеч луэ, мусоосы. Кыкнадэс сю пол, сюрс пол чупасько. Чидатэк витисько гожтэттэс… Оля, роноын вераськы ик вал. Оло, лэзёзы…

Толэзьмы азьло кадь ик яркыт пиштэ. Азьлолэсь но яркыт! Валад-а?..

Николай.

3 октябрь. Тылошур».

(Николай Никитин, «Югдон» колхозлэн председателез – семьяезлы. Личной. Генрих Перевощиков «Йыбыртты музъемлы»).

Туркымъёс «гожтэт» кыллы синквейн кылдыто:

Гожтэт.

Индылӥсь, лӧпкытӥсь.

Ивортэ, вера, ӵектэ.

Тодон-валанэз будэтыны юрттэ.

Шумпотон.

Гожтэт.

Мусо, югыт.

Синйылтэ, бурдъя, бӧрӟытэ.

Мылкыдэз бугыртӥсь пӧсь ивортодэт.

Ивор.

Гожтэт гожтонлэн куронъёсыз – памятка кылдытон:

1. Котькуд гожтэт кутске вазиськон бордысен, кудӥз бере одно запятой пуктоно, нош ним бере – кеськон пус.

2. Чур кельтыса – гожтэтлэн пуштросэз. Нырысь ик тау кароно азьвыл басьтэм гожтэт понна (вал ке со). Гожтэтлы ответ беромыса келяське ке, куроно вожзэ медаз потты шуыса. Эн вунэты: котькуд вуэм гожтэтлы одно ответ сётыса вазиськоно!

3. Азьвыл гожтэтысь юанъёслы валэктонъёс сётоно.

4. Улонысьтыд выль иворъёс, тунсыко но пусйымон учыръёс сярысь верано (со эшлы зэмзэ но тунсыко потоз ке). Простой предложениос вӧзын мед луозы сложноподчинённойёсыз но.

5. Эн вунэты абзацъёс сярысь. Гожъяно дыртытэк, чылкыт, малпанъёсты бӧрсьысь бӧрсе радъяса.

6. Аслэсьтыд юанъёстэ сётоно, сӥзёнъёстэ верано.

7. Пумаз ӟечъяськоно, ку гожтэмез ивортӥсь лыдпус, гожтӥсь мурт вӧзаз нимзэ будэтэ на. Умой луоз, нимтул вӧзы гажаса, яратыса, саламен, матысь эшед, тынад выныд, сузэред но со выллем кылъёс будэтыса.

8. Маке сярысь ивортыны вунэтӥд ке, кышкытэз ӧвӧл, постскриптум пуктыса, будэтыны луоз на.

9. Конвертэ понэмлэсь азьвыл эн вунэты выльысь лыдӟыса потыны, янгышъёссэ палэнтыны. Ластикез но корректорез татын кутыны кулэ ӧвӧл.

10. Бумагаед тетрадьысь кесемын ке, дурыз лякыт вандэмын, чылкыт медло.

11. Матысь муртъёслы, ӵыжы-выжыослы киын ик гожтыса умойгес луоз.

Уроклэн практической люкетэз:

Матысь но дуно эштылы гожтэт гожтоно. Ивортэ улонысьтыды берло дыре пусйымонэз сярысь: кызьы ортчытӥды шутэтскон нуналъёстэс, вордӥськем нуналдэс пусйиды, Выль арез пумитады, классын луэм яркыт учыр… (нылпиос ужало кузэн).

Рефлексия:

Нылпиос урок сярысь малпанъёссэс верало:

Гожтэтъёс адямилыко, лякыт луыны дышето-валэкто. Соос кузь иськемъёсты вакчиято, сюлэмез югдыто, ӟег нянь кадь со, кудзэ лыдӟыса, кӧт тыре, мылкыд бугыртӥське. Гожъяськон культурамы, кыл узырлыкмы воля. Толэзьёс но аръёс ортчыса но соос борды выльысь берытскыны луэ на. Гожтэт – со туспуктэм кадь ик.

Дышетӥсь. Эн люкиське киын нюртэм, сюлмысь гожтэм шумпотон вайись гожтэтъёслэсь! Тодӥсько на, 80-тӥ аръёсы, Асановоысь совхоз-техникумын дышетскыкум, мон гожтэт пыр даслэсь ятыр (!) эшъёсыным кусып возисько вал: Башкирия, Якутия, Ижкар, Сарапул, Балезино, Алнаш… Арнялы быдэ выль иворъёсме келялляй! Выль ар шулдыръяськонъёс, огшоры шутэтскон нуналъёс вакыт почта ящике гожтэтэз ӵемысь донгыны уг луы ни вал, общежитие берен гожтэтъёсыным берытскылӥ. Зэм, зэм, выжыкыл ӧвӧл со! Ӟечкылан открыткаос, куд-ог гожтэтъёс мынам туннэ ке но утиськыса возисько на: нокызьы люкиськыны уг быгатӥськы, улэпесь кадь соос. Али, аръёс ортчыса, малпасько ини, оло, гожтэтъёслы луыса ик мон дышетон удысэ кыстӥськи, зэмлыкез, чеберез валаны дыши?!

Электрон гожтэт улонамы пыӵаз ке но, со нокызьы но уз вошты аслэсьтыз анайзэ – бумага гожтэтэз! Котькуд электрон гожтэтлы озьы ик одно вазиськоно, малы ке шуоно сое гожтӥсь мурт юнме шорысь дырзэ быдтыса тыныд уг гожты, отын кыӵе ке но мугез вань. Ӟечкылан ке со – одно тау кароно! Гожтэт гожтон – со сыӵе ик творческой уж, искусство.

Урокмы кельшиз, номыр валантэмез ӧз ке кыльы, горд буёло кеськон пусэн конвертэз коробкалэсь лэсьтэм почтовой ящике куштоно, маиз ке валантэм кылиз ке – юан пусэн ӵуж конвертэз (вуоно урокын дышетӥсь соос борды берытскоз на).

Гуртэ уж:

Литературной геройлы гожтэт гожтоно. Произведениез ӟеч тодыны, героез син азе пуктыны быгатоно, сотэк гожтэт палдурес, осконтэм пуштросо пӧрмоз. Мылкыд карисьёс «Гожтэт» темая эссе гожто.

ВАТСЭТ

Сочинение-гожтэт Г.Красильниковлэн «Вуж юрт» дилогиезъя.

Ӟечбуресь, Александр Макарович!

Мынам потэ вал вераме Тӥляд сямъёсты сярысь малпанъёсме но куд-ог визь-кенеш сётэме.

Нырысь ик сюлмаськыто анай-атаеныды кусыпъёсты. Коть Тӥ малпаськоды, анай-атайды мыдлань улӥллям шуыса, Тӥ соосты гажаны кулэ. Анайды но атайды будэтӥзы Тӥледыз, вордӥзы, адямие поттӥзы. Одно ик малпаське, эн вунэтэ та сярысь!

Эшшо Тӥ туж чурыт кариськиськоды кышноеныды, Глафира Григорьевнаен. Со нош Тӥледыз туж яратэ, коркадэс котьку шуныт но чылкыт возьыны тырше, бакча ужъёсты но ваньзэ ас вылаз кыске. Ку атаез нылзэ дораз нуиз, Тӥ со понна ӧд но сюлмаське, ачиз бертоз шуыса малпады. Нош со вакытэ Тӥ туж кулэ вылэмды кышнодылы, солэн нылпиез кулӥз.

Тӥляд чурыт луэмды адӟиське на отын, кытын Тӥ пудо-животэз гидысь жугыса улляськоды. Пудо янгыш ӧвӧл ук, Гирой соосты тӥ доры вайиз шуыса. Уйлы ке но луысал животэз кельтыны, мукет нуналаз берен дораз келясалды яке фермае.

Но мыным кельше, Тӥ туж ужась шуыса, колхоз понна сюлмаськиськоды, солэн ӵуказе нуналыз понна висиськоды.

Йырдэс кур эн каре, гажано Александр Макарович, мон меӵак тазьы ваньзэ гожтӥсько шуыса. Малпаське котькуд вамышты сярысь, янгышаны эн сётске! Оскисько, азьланяз ваньмыз югыт, чылкыт, шуныт, шулдыр луоз! Ог-огдэс валаса, гажаса улэ, секыт учыръёсын ог-огдэс буйгатыны тырше. Соку гинэ улон тӥледлы пальпотоз, капчи, шудо луоз!

Ӟеч луэ, Александр Макарович!

Гажаса, Ксения Христолюбова.

Литература

1. Блинов П.А. Улэм потэ: Роман. – Устинов: Удмуртия, 1986. – 168 с.

2. Валишин Р.Г. Тӧл гурезь: Повесть. – Ижевск: Удмуртия, 2004. – 352 с. («Школьной библиотека»).

3. Выль дунне. Удмурт верос: Антология. – Ижевск: Удмуртия, 1991. – 352 с. – («Школьной библиотека»).

4. Кедра Митрей. Секыт зӥбет: Роман, повесть, веросъёс, кылбуръёс, поэма, тодэ ваён. – Ижевск: Удмуртия, 1988. – 392 с. – («Школьной библиотека»).

5. Кедров Ф.Г. Катя: Кылбуръёс но повесть. – Ижевск: Удмуртия, 1989. – 112 с. – («Школьной библиотека»).

6. Красильников Г.Д. Тонэн кылисько: Роман, повесть но веросъёс. – Ижевск: Удмуртия, 1991. – 400 с. – («Школьной библиотека»).

7. Перевощиков Г.К. Йыбыртты музъемлы: Роман-тетралогия. – Ижевск: Удмуртия, 1992. – 496 с. («Школьной библиотека»).

8. Петров М.П. Вуж Мултан: Роман. – Устинов: Удмуртия, 1987. – 360 с. – («Школьной библиотека»).

9. Самсонов С.А. Быръем произведениос. – Устинов: Удмуртия, 1987. – 224 с.