Окурмандык сабаттуулук боюнча ПИЗАга багытталган тест 7-класс

КЫРГЫЗСТАН — МЕНИН МЕКЕНИМ Биздин мекенибиз — Кыргызстан. Ошондуктан биз ата журтубуз менен сыймыктануубуз, аны сүйүүбүз жана анын эгемендүүлүгүн сактообуз керек. Кыргызстан биз сыймыктанууга татыктуу өлкө — Ата мекен. Ага талбай камкордук көрүүгө, көздүн карегиндей сактоого татыктуу мамлекет. Бүткүл Орто Азия сыяктуу эле Кыргызстандын аймагы адамзат цивилизациясынын эң байыркы очокторунан болуп эсептелет. Археологиялык изилдөөлөрдө далилденгендей байыркы таш кылымынан бери жашап келген "кытай тарыхынын атасы" Сыма Цзяндын "Тарыхый каттар" деген эмгегинде, кытайдын жылнаамаларында кыргыздардын байыркы этнос экенине күбө болгон жазма булактары б.з.ч. 99-жылы жазылып бүткөн. Ал эми жазма эстеликтеричи? Кыргыз эли колдонгон жазууларычы? Орхон-Енисей жазуулары, Саймалуу Таш, түрк жазуулары ж.б. кыргыз эли колдонгон жазуулар, сүрөттөр эмне деген рухий байлык — керемет! Цивилизациянын жогорку деңгээлинен кабар берген дагы толуп жаткан маалыматтар бар. Бурана, Өзгөн мунаралары, уникалдуу кербен сарайы Таш-Рабат эң мыкты архитектуралык чеберчилик өнөрдү далилдеп турат. Боз үй — кыргыздын турак жайы, элибиздин улуттук мүлкү. Кыргыздын боз үйү — элдин сергек акылынан чыккан, чебер колунан тамган, теңдешсиз өзүнчө өнөр. Ал эми “Манас” эпосу — эл турмушунан алган орду, мааниси боюнча дүйнөдө теңдеши жок жалпы элдик эстелик-мурас. Ысык-Көл, Сары-Челек, Соң-Көлүбүз, Арстанбап, Сулайман-Тоо, Ала-Тоо, Тулпар-Ташыбыз, тоолорубуз, токойлорубуз, жерибиз ар турдүү кендерге бай. Ар түрдүү ооруларды айыктыруучу Жети-Өгүз, Кой-Сары, Ысык-Көл, Жалал-Абад, Ак-Суу, Жылгалаң деген курортторубуз дартка дабаа, илдетке шыпаа.