Акылдуу чечим

Кудай деп жашаган такыбаа адам тогуз жолдун тоомунда зикир чалып отурган экен. Ошентип отурса бирөө анын жанынан болгон күчү менен энтеңдеп жүгүрүп өтүп баратып:

- Ой тууган менин аркаман бейбаштар кууп келе жатышат. Бул жерден мени көрдүм дей көрбө. Мени сата көрбө, - деп кыйкырган бойдон андан ары чуркап жөнөйт.

- Өзүм Кудай десем, көргөндү көрбөдүм деп эми буларга кантип калп айтам. Кантип муну айтпай коё алам, - ойлонуп калат. Тентектер жүгүрүп келишип:

-Эй сен бул жерде далайдан бери отурганыңды билебиз. Жаныңдан баятан бир киши чуркап өткөн жокпу?, - деп сурашат. Тигил акыркын ордунан козголуп, тик турат.

- Мен бул жерде какайып тургандан бери эч ким жүгүрүп өтө элек,- жооп узаткан экен.