Балдарга насаат

Алтымышевдин ырынан:

Ээ балам, бирөөнүкүн албай жүргүн,

Элиңдин назарынан калбай жүргүн,

Азгырык ар нерселер жолдо болот,

Шойкомдуу чакырыкка барбай жүргүн.

Жүрөгүңдү дайыма таза кармап,

Жолдоштун мыктыларын тандай билгин,

Жашоодо оош-кыйыш күндөр болот,

Жарышкан мезгилди кууп, чамдай билгин.

Жалган сөз - чоң ырысты кесээрин бил,

Жаман сөз жүрөктөрдү эзээрин бил,

Абийирди акча мүлктөн бийик коюп,

Чындыкты айт, чындык баарын жеңээрин бил.

Алсызга ылдый карап күлбөй жүргүн,

Акыйкат сөздү гана сүйлөп жүргүн.

Бирөөнүн ак эмгегин жебегиниң,

Бүлүнтүп, соо турганга тийбегиниң.

Карыны, жашты дагы сыйлап жүргүн,

Көр оокатты ашыкча жыйбай жүргүн.

Эл менен эл болосуң, жалгыз эмес,

Жакынды жамандыкка кыйбай жүргүн.

Турмушту жыл мурунтан туя билгин,

Туйганың кулагыңа куя билгин.

Эрте кеч Жаратканга тилек айтып,

Жалбарып жакшылыкты сурап жүргүн.