Эне тилим- кутман тил.

Ар бир улуттун өзүнүн тили, каада салты болот эмеспи.

Сенин жакын кишиң-энең. Анткени ал сага ак сүтүн берип, алдейлеп чоңойткон. Адегенде, "апа" деп тилиң чыгып, эң алгачкы сөздү энеңден үйрөнгөнсүң.Эне тили эне сүтү менен кошо каныңа сиңген.

Эне тилсиз эл болбойт. Тил элди эл кылып, аны өзүнчө улут катары таанытып турат. Ошондуктан, сен сүйлөгөн тил "эне тил" деп аталат. Элдин тарыхы да, маданияты да, салт-санаа, үрп-адаты да, келечеги да эне тили менен байланыштуу.

Сенин эне тилиң-кыргыз тили. Сен, адегенде, өзүңдүн эне тилиңди жакшылап үйрөн. Ошондо гана сен өз элиңди кадырлай билесиң, эне тилиң аркылуу башка элдерди,башка жерлерди тааныйсың.