Яхсай явлукъ

Яхсай явлукъ.

Вая, гьейлер, вая, дослар, ювукълар,

Къызларына тиймесиндеп сувукълар,

Яхсай явлукъ йибермесе къалымгъа,

Къызын бермей болгъан экен къумукълар.

Гьали мени гьалым гюнюм сорасанг,

Насиплимен, насип магъа ёрасанг,

Яхсай явлукъ гьали моддан тайгъан деп,

Неге мени яв юрегим ярасан.

Йыллар гетип, акъ гирсе де башлагъа,

Мен гьали де сенден умут уьзмеймен,

Эки жанны бир-бирине къошагъан,

Ярайгъан бир яхсай явлукъ излеймен.

Этеклерин ярып, этин гёрсетип,

Къызлар энни бёрклер гийип айлана,

Яхсай явлукъ сюер эдим мен сени

Дюньядагъы бары къызгъа байлама.

Йыллар бою сени сююп оьлмеге

Язылгъандыр талчыкъ булан талайым.

Аривюмню алып магъа гелмеге.

Яхсай явлукъ сени къайдан табайым.