Il saglygy – ýurt baýlygy

Adamlar tanyş-bilişleri bilen duşuşanlarynda ilki bilen birek-biregiň saglygyny soraşýarlar, hoşlaşanlarynda hem sag-gurgun ýaşamaklaryny arzuw edýärler. Ynsan hemişe Taňrydan dileg edende hem ilki bilen saglygy hem agzybirligi dileýär. «Il saglygy – ýurt baýlygy» diýen şygary öňe süren döwletimiz öz raýatlarynyň saglygyny döwletiň baýlygy hasaplaýar. Halk lukmançylygynda näsagy bejermegiň esasy ugry– gül bilen bejermek, ýagny derman ot-çöplerini ulanmak bilen näsagy bejermek bütin dünýä boýunça giň ýaýran usuldyr. Halk arasynda aýdylýan rowaýatlara görä, Lukman Hekim ýaş oglanka tötänlikde bir kökäni iýipdir. Şondan soň ýöräp barýarka gögerip oturan ösümlikler onuň aýagyna ýapyşyp: «Men pylan derdiň dermany, men pylan derde em» diýip gygyryşýar ekenler. Soňra Lukman olardan geregini alyp, näsaglary bejerip başlaýar.