Камчы тууралуу

Алыс сапарда жигиттин кан жолдошу-камчы эсептелген.

Камчы аркылуу кыргыздар көп нерсени түшүндүрүшкөн.

Камчыны ээрдин кашына калтырып кетсе-курсагым ачты, шашылышмын, атым эс алсын деген ишарат, үйдүн ээси шам-шум эткенге батыраак тамак даярдай салыш керек.

Камчыны кончуна салып кирсе-үйдүн ээсине конок каадасын көр, бүгүн силерде түнөйм деген белги.

Колтугуна кыстарып кирсе-жок издеп жүрөм, силерге жаман ниетим жок дегенди билдирип, бул белги бала чакага баарына түшүнүктүү болгон.

Камчыны бүктөй кармап кирсе, өкүм же кабар угузган; камчынын өрүмү ылдый карап илингени, үйдүн ээсинин каза болгондугун туюндурган;

Камчынын өрүмү бүктөлүп бүлдүргөсүнө оролуп анан, алаканынан илинген; камчыны бооруна алышы-уруксат сурашы;

Камчыны сүйрөп киргени, уруша тургандыгы билдирген;

Аттанып жатып камчы колуңдан тушуп кетсе- жамандыктан кабар бергени. Аны аттан түшүп, өзү алып, атына кайра минет.

Камчы саптын сынышы да жамандыктын белгиси катары кабылданган.

Камчы керегеде турса өзү алып чыкканы туура.

Камчыны бүктөй кармап кирүүсү- ичинде ачуусу же олуттуу иш менен келгенин кабар берет. Камчыны таянып отуруусу- ички кектин куч алышы.

Керегенин башында дайыма илинип туруусу- кайраттуулуктун белгиси.

Камчыны мойнуна илип келсе - башын ийгени, макулдук бергени, кечирим сураганы.