Китептин пайдалуулугу

Адам баласы жашоодо өзү үчүн зарыл эсептелген көп нерселерди өздөштүрөт. Менин жеке пикиримде өздөштүрүүнүн, дүйнө таануунун эң бир ишенимдүү жолу катары китеп окуу эсептелет. Тилекке каршы учурда өзгөчө жаш муундар китеп окууга азыр анча деле кызыгышпайт. Алар менен болгон баарлашууда көпчүлүгү өдөрү үчүн керектүү болгон маалыматтарды соцтармактардан эле алып алышаарын билдиришкен. Ойлоп көрсөңүз, дүйнөгө кыргызды тааныткан улуу, жазуучу Чыңгыз Айтматовдун керемет, кайталангыс чыгармалары, адамдарга чыныгы жашоонун маңызын, жүзүн берейин деген ойлору ошол соцтармактарда берилеби? Улуу жазуучу Төлөгөн Касымбековдун "Сынган кылыч" романындагы Алымбек, Курманжан даткалардын образдарын жете билип түшүнүүгө болобу? Сыналгыдагы көңүл ачуучу каналдардын көбөйүшү, мобилдик телефондор, соц тармактардагы туура да, туура эмес да түрдүү маалыматтардын көбөйүшү жаштарыбыздын китеп окуусуна болгон муктаждыгын азайткандай. Бирок жан дүйнө азыгыбыз китеп окубагандыктын айынан жардыланып кеткенибизди алар байкабай жатышат. Биз, улуу муундардын жаштардын китеп окууга болгон кызыгуусун арттыруубуз керектиги күндөн-күнгө ачык көрүнүүдө. Андыктан аларга үлгү болуп китепти адегенде өзүбүз көп окуп, алар менен талкуулап, китепке болгон кызыгуусун жандантууга чакырам.