Мен кантип мугалим болууну чечтим.

Мен кантип мугалим болууну чечтим

Бала кезимде мектептин дубалынан “из калтыр бул дүйнөдө” деген сөздү окуп алып абдан ойлондум. “Кантип из калтырам?” деп көпкө толгондум. Ал күнү эле эмес ар күнү ойлоно баштадым. Бир күнү “эгер жакшы мугалим болуп балдарга жакшы тарбия, билим берсем, алар эл керегине жараган улуу инсан болуп чыкса менден калган из ошолор болот го” деген ой келди. Ошол күндөн баштап мен мугалим болууну чечтим.

Мен миллиондорду таап өлкөмө салым кошо албасам да өлкө үчүн кызмат кыла турган инсандарды тарбиялап салым кошо алам. Окуучуга билим берүү менен ата – энеге да окуучуга да бактылуулук тартуулайм. Бактылуу адамды көргөндө кучагым бакытка балкыйт. Билимдүү адамдар гана өлкөнүн ажарын ачат.

Ал эми өлкөнүн тагдырын чечкен, тарыхка өзгөртүү киргизе ала турган адамдар булар – мугалимдер. Себеби тарыхты өзгөрткөн адамдарды да мугалим окуткан, тарбиялаган.

Бир акылман айтыптыр: «Жаштарыңды, балдарыңды көрсөт, мен эртеңки күнүңдү айтып берейин» деп. Балдар – эртеңки мамлекетибиздин келечеги. Келечекте бул балдар кыргыздын келечегин ойлогон инсан катары калыптанышына мугалимдин ролу өтө чоң.