Орозо тууралуу

Орозону ачкачылык менен алышып, оор шартта жашап жаткан адамдардын абалын түшүнүү, мүмкүн болсо аларга жардам берүү деген ыйык милдетти аңдаш үчүн тутушат. Мусулман баласы Адам болуу үчүн ибадат кылат. Күнөөлөрдөн арылып адамдарга, чөйрөгө зыян келтирүүдөн оолак болуп, тескерисинче аларга жардамы тийген, адеп-ахлактуу, Кудай ыраазы боло турган жашоо сүрүү үчүн ибадат кылат. Кудайды эстеп, намаз окуйт. Күнөөлөр да эки түргө бөлүнөт. Алар - жекелик жана коомдук мааниге ээ болгон күнөөлөр. Жекелик мааниге ээ болгон күнөөлөр - киши менен Кудайдын гана ортосундагы мамиле. Мисалы, намаз окуй албай калуу, орозо кармай албай же ичинен жаман нерсени ойлоо өңдүү нерселерди кошсок болот. Бул сыяктуу күнөөлөр үчүн чын дилден тобо келтирип, кайра кайталабоо шарты менен Кудайдан кечирим суроо жетиштүү болот. Коомдук маанидеги күнөөлөргө мисал катары уурдоо, жалган сүйлөө, куулук кылуу, бут тосуу сыяктуу адам менен адамдардын ортосунда болуп өткөн жагымсыз нерселерди мисал келтирүүгө болот.