Сабырдын түбү сары алтын! Тарбиялык саат.

Эки адам достошуп, жыл сайын кезигип турууну убадалашат. Бир күнү досун зыярат кылуу үчүн үйүнө келип, эшигин такылдатат. Аялы: «Ким?» деп сурайт. Ал: «Жолдошунун жакын досу экенин айтканча, күйөөсү отунга кеткенин билдирип, күйөөсүн каргап, ар нерсени айта баштайт.Аңгыча тоо тараптан досу арстанга отун артып келип калат. Отунду ичкери киргизип, арстанга: «Бара бер эми», деп жөнөтөт. Досун үйгө киргизет. Аялы кайрадан заар тили менен сүйлөнүп атып, дасторкон жаят. Күйөөсү болсо, бир сөз кайтарбай, сүкүт сактайт. Досу бираз тамактанып, чер жаза маектешкенден кийин жолго чыгат. Ал жолдо досунун мындай аялга сабыр кылып жашаганына таңыркап баратты. Арадан бир жыл өтүп, адаттагыдай, досунун үйүнө келип эшикти такылдатат. Аялы: «Ким?» экенин сурайт. Ал: «Күйөөсүнүн досу экенин билдирет. Аял отура туруусун айтып, буюрса жолдошу жакын арада аман-эсен келип каларын билдирет. Киши аялдын мындай адебин көрүп дендароо боло түшөт. Ушул учурда досу отун артынып келип калганын көрөт. Киши бул абалга да таңыркайт. Аялы аларга даамдуу тамагын даярдап, досун жакшы коноктошот.

Досу кетээринде: «Сенден бир нерсе сурайын дегем», дейт. Досу эмнени деп сыпайы сурайт. « Өткөн жылы келгенимде жубайыңыз адепсиз, көп карганаар эле, сиз болсо отунду арстанга артып келгенсиз. Мындай жырткыч жаныбар буйругуңузга кантип баш ийди эле. Бул жылы болсо, жубайыңыз жумшак болуп карганбай калыптыр. Бирок отунду өзүңүз артып келдиңиз. Мунун сыры эмнеде?» деп сурайт. Ошондо досу: «Эй досум, ошол убакта жубайым оорулуу болуп, анын адепсиздигине жана кылыктарына сабыр кылаар элем. Аны менен жашоого чыдаганым үчүн Жараткан мага ошол арстанды моюн сундуруп койгон эле. Бул жылы болсо жубайымдын ден-соолугу абдан жакшы. А бирок баягы арстан көрүнбөй калды. Ошондуктан отунду өзүм артып келип жатам», деп жооп берет. Көрсө аялдын кылыктарына сабыр кылуу арстанды моюн сундурууга барабар тура.