Санак, чен бирдиктери

Коомдук түзүмдөр өнүккөн сайын кыргыздар ченөө муктаждыгын канаттандыруу үчүн эсеп-кысап ыкмаларын, чен бирдиктерин өркүндөтүп келген. Кошуу, алуу, көбөйтүү, бөлүү амалдары эчак белгилүү болгон.

Адамдардын, малдардын, жаныбардардын, буюмдардын санын аныкташ керек болгондо кыргыздарда өзгөчө оозеки санак жүргүзүү ыкмалары болгон. Мисалы, чүкө санаганда беш чүкө бирдин үчү деп алынган (манжалардын санына байланыштуу). 6 чүкө - бирдин үчү бир, 7 чүкө - бирдин үчү эки, 10 чүкө - экинин үчү, 14 чүкө - экинин үчү төрт, 25 чүкө - бештин үчү, 200 чүкө - кырктын үчү, ж.у.с. болуп кете берген.