Тил тарыхы

Текстке чейинки тапшырмалар

1. Берилген макалдардын маанисин түшүндүрүп бер.

«Тарыхы болбой эл болбойт,

Тамыры болбой жер болбойт».

«Түбү түптүүдѳн түңүлбѳ».

2. Тексттен созулма үндүүлөр катышкан сөздөрдү таап, дептериңерге жазгыла. М: Изилдөө, маалымат,.

3. Берилген сѳз айкаштарын катыштырып сүйлѳм түзгүлѳ.

Кылым карыткан, тарых тамыры, жазма булактар, чыгыш изилдөөчүлөрү, талашсыз чындык, бүгүнкү урпактар, басып өткөн жол.

Кылым карыткан кыргыз тарыхынын тамыры өтө тереңде жаткандыгы бүгүнкү күндөгү Кытай жазма булактары аркылуу белгилүү боло баштады. Тарыхый булактарга таянган чыгыш изилдөөчүлөрдүн бир академик – В.В.Бартольд: «Орто Азиядагы эң байыркы калк – бул кыргыздар, тарыхта эрте угулган башка элдер жок», - деп бекеринен жазбаган чыгар. Кытайдын ата тарыхчы болгон Сыма Цяндын «Тарыхый жылнаамаларында» алгачкы жолу кыргыз этнониминин эскерилиши тарыхыбыз үчүн алтынга бергис маалымат болду. Бул маалыматта «биздин заманга чейинки (б.з.ч.) 201-жылы хунндардын падышасы Маодун Шануй түндүк, түндүк-батышка согуштук жортуулга чыгып, Гэгунь падышылыгын өздөрүнө каратып алды», – деп кабарлайт. Бул билдирүүдөгү Гэгунь деген терминдин транскрипциясы «кыргыз» дегенди түшүндүрөөрү бүгүнкү күндө талашсыз чындык болуп калды. Демек, биздин доорго чейинки 201-жылдагы окуялар жөнүндөгү маалыматтар мезгили боюнча кыргыздар жөнүндө биринчи маалымат жана анын негизинде кыргыздардын түпкү тарыхы б.з.ч. III кылымга тиешелүү болуп чыга келди.