Улутпуз биз

УЛУТПУЗ БИЗ!

Түндүк-түштүк, сай-сай деп чектегениң,

Түпкү атаңдын арбагын тепсегениң.

Бийлик үчүн мырзалар, бийлик үчүн,

Биримдигин элиңдин экчебегин.

Бир бүтүнгө айлансак улукпуз биз,

Бирикпесек улутту куруттук биз,

Кыр-кырлардан жыйналган жыйын эмес, Кыргыз деген улутпуз, улутпуз биз.

Өрттөй көрбө быкшытып өзөгүңдү,

Өлтүрбөгүн өзүңдү, өз элиңди.

Ата-энеңден, жарыңдан, балдарыңдан, Артыгырак сүй журтту, Мекениңди!

Өксүбөсүн бир бооруң жатындашы,

Өмүр көксөп эч бир ок атылбасын. Кыргызстандын жеринде сакта Кудай,

Кыргыз каны эми эч чачылбасын!

Зобололуу уул-кызың чыгаан болсун,

Зор биримдик биз үчүн курал болсун.

Кокту -колот, сай-сайга бөлүнбөгүн,

Кыргыз деген бир гана ураан болсун!