Василий Эктел

Нарăс уйăхĕнче прозăпа поэзи тата ÿнер ăсти, публицист, литература тĕпчевçи, Чăваш Республикин культурăн тава тивĕçлĕ ĕçченĕ, «Тăван Атăл» журналăн тата Чăваш тавра пĕлÿçисен Алексей Миллин ячĕллĕ премийĕсен лауреачĕ Василий Петрович Эктел (Сидоров) пурăннă пулсан 68 çул тултармаллаччĕ. Хамăр ентешĕмĕре халалласа Лаш Таяпари В.В.Андреев ячĕллĕ пĕтĕмĕшле пĕлÿ паракан вăтам шкулта

чăваш чĕлхипе литературине вĕрентекен Теренина Альбина Николаевна 7-мĕш класс ачисемпе «Василий Эктел – асра юлнă сăнар» темăпа уçă урок ирттерчĕ. Урокра вĕрентекен пултаруллă çыравçăн пурнăçĕпе, пултарулăхĕпе презентаци тăрăх паллаштарчĕ. Ачасем унăн сăввисене пăхмасăр каларĕç.

Этем – тинĕсри çивĕч кулçă кĕсменçĕ,

Тытать киммине саманамăрпа тан.

Кун-çул çаврăмне çухрăмпа çеç виçмеççĕ –

Ĕçне кура çын чыс илет авалтан.

Çак йĕркесене хăй çинчен тенĕ пекех çырнă поэтăмăр, «Ĕçне кура …чыс»…Унăн пултарулăхĕ нумай енлĕ тата тухăçлă. Вăл хăй евĕрлĕхĕпе тата кăмăл ăшшипе уйрăлса тăрать. Унăн хайлавĕсене вуласан тахçан çывăх паллашса хуйха-суйха пайлама хатĕр çынпа калаçнăпекех туйма пулать. Чăвашлăх тата уçă чун хавалĕ сисĕнет Василий Эктел хайлавĕсенче. Эпир хамăр ентешпе мухтанатпăр, унăн ячĕ яланах пирĕн асра юлĕ!

13.02.2019 10:59


Рекомендуемые курсы ПК и ППК для Вас