"Балаларнынъ иджады"

Гъалебенинъ70-йыллыгъына багъышлангъан,2014/2015 окъув йылы ачыкъ район шаир ве несиджилер конкурсы илян этильди.

Бу конкурста иштирак этмек ичюн, Кунтугъан (Тепловка) кой мектебининъ талебелери шиирлер ве несир эсерлерини азырладылар. Мектепте конкурс кечирдик, Аккиева Мерьемнинъ иши гъалип чыкъты. Онынъ шиирлери, яшына бакъмадан (13 яшында) пек терен маналы, эеджанлы чыкъты.

-Къартбабамнынъ икяелерини динълеген сонъ, шиирлер язмагъа отурдым, къыскъа муддет ичинде яздым, - дей Мерьем.

Керчек, эеджанлы икяе этильген вакъиаларлар Мерьемнинъ юрегинде синди. Шиир язмакъ исе – Мерьемнинъ къабилиети олып тез яратылды.

Шиирлер

Къараманларымыз

«Къарылгъачлар дуасы»ны окъудыкъ,

Яшайыш агъыр олгъаныны бильдик.

Оджаларны динълесе де балалар,

Мектеплерни мырза-байлар къапайлар.

О заман мектеп ачмакъ-къараманлыкъ.

Къараманлыкъ эткен Номан Челебиджихан.

Балаларны, тасильни пек къайгъырып,

Мектеп ача, бала окъута Номан Челебиджихан.

Миллий куреш къараманы Номан Челебиджихандан

Аньанени девам этти Амет-хан Султан.

Юртны кокте къара булутлар къаплады,

Амет дженкте кереклигин анълады .

Душманлар Аметни кокте корьселер,

Джан татлы, тез-тез къачып кетелер.

Ватан ичюн учюджининъ эткенин

Укюмдарлар эки дефа такъдирлерген.

Учакънынъ, «тилини» яхшы анълайып,

Эсаретликтен къуртарды бизлерни.

Ватаны, халкъы огърунда джан берди,

Эфсаневий къараман-

Учуджы Амет-хан Султан.

***

Дженк корьмеген, дженкни бильмез дегенлер.

Эм бильмейик дженкнинъ насыл олгъанын.

Къартларнынъ козьяшыны корьмейик,

Ачлыкъ не олгъаныны бильмейик.

Ватанымыз, халкъымыз тынч яшасын,

Яшларымыз дженк не олгъанын бильмесин.

Дженк олмасын! Бунъа джан куйдюрейик,

Къолумыздан кельгенини этейик.

Дженк

Дженк -бу джебэге кетюв,

Дженк - бу къырымтатарларны сюргюн этюв,

Дженк -бу эвини ,ватаныны джоймакъ,

Дженк-бу гедже -куньдюз агъламакъ.

Дженк-бу бинълернен олю одам.

Дженк-бу олип кеткен ананъ ве бабанъ,

Дженк -бу топ, гранаталар,

Дженк -бу оксюз къалгъан балалар.

Дженк-бу ашсыз- сувсызлыкъкъа чыдамакъ,

Дженк бу - баракларда яшамакъ.

Дженк бу -сюргюнлик, хатыра, козьяшлар.

Дженкни ич бир вакъыт унутмаз къырымтатарлар.

***

Дженкнинъ 70-йыллыгъы,

Сёнмез къырымтатарларнынъ хатырасы.

Эр йыл 18 майыста топлашамыз,

Бита-къартбабаларымызны анъамыз.

Чокъ адам дженкте хорланып ёкъ олды ,

Ойле оладжакъны кимсе бильмеди.

Бойле дженк бир вакъыт олмасын!

Балаларымыз окюр агъламасын

Къырымтатар халкъы яшасын!

***

Къартбабам джебэде эди,

Дженк хатырасы даа сёнмеди.

О, эр шейни хатырлай,

Дженк акъкъында айткъанда, агълай.

Бабасы дженкте гъайып олды,

Тата-къардашлары ёкъ олды.

Бизге ойле дженкни Алла косьтермесин,

Эписи сагъ олсун,кимсе ольмесин.

Ватанымызда тынчлыкъ олсун,

Миллетимиз муаббет яшасын.

(акрошиир)

Дженк олмасын дюньяда,

Етимлер чокълашмасын.

Ниетлермиз темиз олсун,

Кокте кунеш нурлансын.